ഒറ്റ ചാർജിൽ 200 കിലോമീറ്റർ റേഞ്ച്​; ഒാലയെ വെല്ലുവിളിച്ച്​ ഒകിനാവ, വേഗത 90 km/h

കുറഞ്ഞ റേഞ്ചും വേഗതയുമായി ഇ.വി വിപണിയിൽ ചുവടുവച്ച ഒക്കിനാവ വലിയ കളികൾക്കൊരുങ്ങുന്നു. റിഡ്​ജ്​, ലൈറ്റ്​, ഡ്യൂവൽ, ​െഎ പ്രൈസ്​ തുടങ്ങിയവക്ക്​ പിൻഗാമികളായി എത്തുന്നത്​ കരുത്തന്മാരായ ഇ.വികൾ. ഒകി 100 എന്ന ഇ.വി ബൈക്കും ഒകി 90 സ്​കൂട്ടറും അണിയറയിൽ ഒരുങ്ങുന്നതായി കമ്പനി വ്യക്​തമാക്കി. ഒകി 100 ഇലക്​ട്രിക്​ ബൈക്ക്​ റിവോൾട്ടിന്​ എതിരാളിയാകും.

ഒകി 90 ഇലക്ട്രിക് സ്​കൂട്ടർ 2022 ​െൻറ തുടക്കത്തിൽ ലോഞ്ച് ചെയ്യാനാണ്​ കമ്പനി ഉദ്ദേശിക്കുന്നത്​. രണ്ട്​ വാഹനങ്ങൾക്കും സമാനമായ റേഞ്ചും വേഗതയുമാണ്​ വാഗ്​ദാനം ചെയ്യുന്നത്​. 90 കിലോമീറ്റർ ടോപ് സ്​പീഡും 175-200 കിലോമീറ്റർ പരിധിയും ഉള്ള അതിവേഗ ഇ.വികളായിരിക്കും ഇവ രണ്ടുമെന്ന്​ ഒകിനാവ ഓട്ടോടെക്ക്​ സഹസ്ഥാപകനും എംഡിയുമായ ജിതേന്ദർ ശർമ്മ പറഞ്ഞു. പെട്രോൾ വില കൂടുന്നതിനൊപ്പം വിപണിയിൽ ഇവി ഉൽ‌പന്നങ്ങൾക്ക് കൂടുതൽ സ്വീകാര്യത ലഭിക്കുന്ന സാഹചര്യത്തിൽ മികച്ച ഉത്​പന്നങ്ങൾ വിപണിയിൽ എത്തിക്കുമെന്നും ശർമ പറഞ്ഞു.

നീക്കം ചെയ്യാവുന്ന ലിഥിയം അയൺ ബാറ്ററിയുള്ള ഒകി 90ന് അതിവേഗ ചാർജിങ്​ ഫീച്ചറും ഉണ്ടായിരിക്കും. 45 മിനിറ്റിൽ 80 ശതമാനം വരെ ബാറ്ററി ചാർജ് ചെയ്യാം. ഒകി 90 കണക്​ടഡ് ഇലക്ട്രിക് സ്​കൂട്ടറായിരിക്കും. കൂടാതെ ജിയോ ഫെൻസിങ്​, നാവിഗേഷൻ, ഡയഗ്​നോസ്​റ്റിക്​ തുടങ്ങിയ സവിശേഷതകളും ലഭിക്കും. സ്​കൂട്ടറിൽ ഉൾപ്പെടുത്തിയ 4G സിമ്മും പ്രത്യേകതയാണ്​.

പുതുതായി പുറത്തിറക്കിയ ഓല ഇലക്ട്രിക് എസ് 1, സിമ്പിൾ വൺ എന്നിവയിൽ നിന്ന് ഓകി 90ന് കടുത്ത മത്സരം ഉണ്ടാകും. അടുത്ത വർഷം ആദ്യം വിൽപ്പനയ്‌ക്കെത്തുമ്പോൾ ഒകി 90 ​െൻറ വില ഒരു ലക്ഷം രൂപയിൽ താഴെയാകുമെന്നാണ്​ പ്രതീക്ഷിക്കുന്നത്​. ഒകി 90ന്​ മുമ്പുതന്നെ ഒകിനാവയുടെ ആദ്യ ഇലക്ട്രിക് മോട്ടോർസൈക്കിളായ ഒകി 100 പുറത്തിറക്കാനും കമ്പനിക്ക്​ പദ്ധതിയുണ്ട്​.