'സർവീസ് കെയർ‌ 24': പുതിയ സർവ്വീസ്​ പാക്കേജുമായി റോയൽ എൻഫീൽഡ്;

റോയൽ‌ എൻ‌ഫീൽ‌ഡ് ഇന്ത്യയിലെ ഉപഭോക്താക്കൾ‌ക്കായി പുതിയ സർവ്വീസ്​ പാക്കേജ് പ്രഖ്യാപിച്ചു. 'സർവീസ് കെയർ‌ 24' എന്ന പാക്കേജ് ​പ്രകാരം ആദ്യത്തെ സർവ്വീസ്​ സൗജന്യമായിരിക്കും. തുടർന്ന്​ നാല്​ ജനറൽ സർവ്വീസുകളും രണ്ട് എഞ്ചിൻ ഓയിൽ മാറ്റങ്ങളും വാഗ്​ദാനം ചെയ്യുന്നുണ്ട്​. ഇൗ പാക്കേജിനായി 2,499 രൂപയാണ്​ ഉപഭോക്​താവ്​ മുടക്കേണ്ടത്​. സർവ്വീസിനിടയിൽ കൂടുതൽ തകരാറുകൾ കണ്ടുപിടിച്ചാലും പുതിയ പദ്ധതി പ്രകാരം ഇളവുകളും ലഭിക്കും.

അധിക അറ്റകുറ്റപ്പണികൾ വേണ്ടിവന്നാൽ വാഹനഭാഗങ്ങൾക്കും ലൂബ്രിക്കൻറുകൾക്കും​ അഞ്ച്​ ശതമാനം കിഴിവാണ്​ നൽകുക. ഇതോടൊപ്പം 20 ശതമാനം ലേബർ കോസ്​റ്റും ലാഭിക്കാം. കോവിഡ്​ ലോക്​ഡൗണിനുശേഷം സാധാരണ നിലയിലേക്ക്​ മടങ്ങിവരുന്ന വാഹന വിപണിക്ക്​ ഉണർവ്വ്​ പകരാനാണ്​ റോയൽ പുതിയ പദ്ധതി പ്രഖ്യാപിച്ചത്​. പുതിയ സാമ്പത്തിക പദ്ധതികളിലൂടെ വാഹനം വാങ്ങുന്നവരെ ആകർഷിക്കാനും നിലവിലുള്ളവരെ നിലനിർത്താനും എല്ലാ നിർമാതാക്കളും ശ്രമിക്കുന്ന സമയംകൂടിയാണിത്​.

റോയലി​െൻറ പുതിയ തലമുറ ക്ലാസിക് 350 ഉടൻ പുറത്തിറക്കുമെന്ന പ്രതീക്ഷയിലാണ്​ ആരാധകർ. ഇതിന് പിന്നാലെ 650 സിസി പ്ലാറ്റ്ഫോമിനെ അടിസ്ഥാനമാക്കി ക്രൂസർ മോഡലും അവതരിപ്പിക്കും. റോയലിനായി ഒരു വർഷത്തിനുള്ളിൽ ഏറ്റവും കൂടുതൽ പുതിയ ലോഞ്ചുകൾ ഉണ്ടാകുമെന്ന്​ കഴിഞ്ഞദിവസം സിഇഒ വിനോദ് ദസാരി പറഞ്ഞിരുന്നു​. 650 സിസി പ്ലാറ്റ്‌ഫോമിൽ നിന്നുള്ള പുതിയ മോട്ടോർസൈക്കിളുകൾ ആർ.ഇ അടുത്തിടെ നിരത്ത്​ പരിശോധനയ്ക്ക് വിധേയമാക്കിയിരുന്നു. ജെ പ്ലാറ്റ്ഫോമിനെ അടിസ്ഥാനമാക്കിയുള്ള ഒരു റോഡ്സ്റ്ററി​േൻറയും പണിപ്പുരയിലാണ്​ കമ്പനി.