രാജ്യത്തെ ആദ്യ സി.എൻ.ജി എസ്.യു.വിയാകാൻ ടൊയോട്ട ഹൈറൈഡർ; മൈലേജ് 26.10 കി.മീ/കിലോ

രാജ്യത്തെ ആദ്യ സി.എൻ.ജി എസ്.യു.വിയെന്ന ഖ്യാതിയുമായി ടൊയോട്ട ഹൈറൈഡർ. പുതിയ അർബൻ ക്രൂയിസർ ഹൈറൈഡർ എസ്.യു.വിയുടെ സി.എൻ.ജി വേരിയന്റ് ഉടൻ അവതരിപ്പിക്കുമെന്ന് ടൊയോട്ട അറിയിച്ചു. ഇടത്തരം എസ്.യു.വി സെഗ്‌മെന്റിലെ ആദ്യത്തെ സി.എൻ.ജി-പവർ മോഡലായിരിക്കും ഇത്. വില ഇതുവരെ വെളിപ്പെടുത്തിയിട്ടില്ല. 25,000 രൂപ നൽകി ഹൈറൈഡർ സി.എൻ.ജി ഇപ്പോൾ ബുക്ക് ചെയ്യാം. സി.എൻ.ജിയിൽ പ്രവർത്തിക്കുന്ന ഗ്ലാൻസ ഹാച്ച്ബാക്ക് ടൊയോട്ട നേരത്തേ പുറത്തിറക്കിയിരുന്നു.

മിഡ്-സ്പെക്ക് എസ്, ജി ട്രിമ്മുകളിലാവും ഹൈറൈഡർ സി.എൻ.ജി ലഭ്യമാവുക. മൈൽഡ് ഹൈബ്രിഡ് എഞ്ചിനാണ് ഈ മോഡലുകളിൽ വരുന്നത്. മാരുതിയിൽ നിന്നുള്ള 1.5-ലിറ്റർ K15C, ഫോർ സിലിണ്ടർ എഞ്ചിനൊപ്പമാണ് സി.എൻ.ജി കിറ്റ് വാഗ്ദാനം ചെയ്യുന്നത്.

ഹൈറൈഡർ സി.എൻ.ജിയുടെ കരുത്തും ടോർക്കും ടൊയോട്ട ഔദ്യോഗികമായി വെളിപ്പെടുത്തിയിട്ടില്ല. ഈ എഞ്ചിൻ XL6-ൽ CNG മോഡിൽ 88hp കരുത്തും 121.5Nm ടോർക്കും ഉത്പാദിപ്പിക്കും. ഹൈറൈഡറിലെ ഔട്ട്പുട്ട് കണക്കുകളും ഇതിന് സമാനമായിരിക്കും. 5-സ്പീഡ് മാനുവൽ ഗിയർബോക്‌സിൽ മാത്രമേ വാഹനം ലഭ്യമാകൂ എന്ന് ടൊയോട്ട സ്ഥിരീകരിച്ചിട്ടുണ്ട്. വാഹനത്തിന്റെ ഇന്ധനക്ഷമത 26.10 കി.മീ/കിലോ ആണ്. ഇത് XL6 MPV-യുടെ ഇന്ധനക്ഷമതയേക്കാൾ (26.32km/kg) നേരിയ തോതിൽ കുറവാണ്.

ട്രിമ്മുകളും ഫീച്ചറുകളും

സ്റ്റാൻഡേർഡ് എസ്.യു.വിയുടെ മിഡ്-സ്പെക്ക് എസ്, ജി ട്രിമ്മുകളിലാവും ഹൈറൈഡർ സി.എൻ.ജി ലഭ്യമാവുക. ഫുൾ എൽ.ഇ.ഡി ഹെഡ്‌ലാമ്പുകൾ, 17 ഇഞ്ച് അലോയ് വീലുകൾ, 9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ്, ആംബിയന്റ് ഇന്റീരിയർ ലൈറ്റിംഗ്, സൈഡ്, കർട്ടൻ എയർബാഗുകൾ തുടങ്ങിയ ഫീച്ചറുകളോട് കൂടിയാണ് ജി ട്രിം വരുന്നത്. വാഹനം വിൽപ്പനയ്‌ക്കെത്തുമ്പോൾ, രാജ്യത്ത് ലഭ്യമായ ഏറ്റവും പ്രീമിയം സി.എൻ.ജി മോഡലായിരിക്കും ഹൈറൈഡർ.