സ്വീകരണ മുറി ഷോറൂമുകളാവും; നിർണായക ചുവടുവെയ്​പ്പുമായി ടൊയോട്ട

ഉപഭോക്​താക്കൾക്ക്​ പുതിയ അനുഭവം സമ്മാനിക്കാൻ വിർച്വൽ ഷോറൂം അവതരിപ്പിച്ച്​ ടൊയോട്ട കിർലോസ്​കർ മോട്ടോർസ്​. നേരിട്ട്​ ഡീലർഷിപ്പുകളിൽ എത്താതെതന്നെ ഏതൊരു ടൊയോട്ട വാഹനവും കാണാനും സവിശേഷതകൾ പരിശോധിക്കാനുമുള്ള സൗകര്യമാണ്​ ഒരുക്കിയിരിക്കുന്നത്​. വെർച്വൽ ഷോറൂമിൽ നിന്ന് നേരിട്ട് വാഹനം ബുക്ക് ചെയ്യാനുള്ള സൗകര്യവുമുണ്ട്​. മികച്ച ഓഫറുകൾ, ഫിനാൻസ് ഓപ്ഷനുകൾ, ലോൺ ആപ്ലിക്കേഷനുകൾ എന്നിവയും വിർച്വൽ ഷോറൂമിലൂടെ അറിയാനാകും.

വെർച്വൽ ഷോറൂം പരിശോധിക്കാനായി ഉപഭോക്താക്കൾക്ക് ഏതെങ്കിലും ആപ്ലിക്കേഷനുകൾ ഡൗൺലോഡ് ചെയ്യുകയോ ഇൻസ്റ്റാൾ ചെയ്യുകയോ വേണ്ടതില്ല. www.toyotabharat.com/virtual-showroom/ എന്ന വെബ്സൈറ്റിൽ ലോഗിൻ ചെയ്​താണ്​ വാഹനം പരിശോധിക്കേണ്ടത്​. സ്​മാർട്ട്ഫോൺ, ടാബ്ലെറ്റ്, ലാപ്ടോപ്പ് അല്ലെങ്കിൽ ഡെസ്ക്ടോപ്പ് തുടങ്ങി ഏതിലൂടെയും ഏതാനും ചില ക്ലിക്കുകളിലൂടെ നമ്മുക്ക്​ വിർച്വൽ ഷോറൂമിലെത്താം.

എല്ലാ വാഹനങ്ങളുടേയും 360 ഡിഗ്രി ബാഹ്യ-ആന്തരിക കാഴ്​ചകളും ലഭ്യണ്​. ഇഷ്​ട വാഹനങ്ങളുടെ വിവിധ വകഭേദങ്ങളും കളർ ഓപ്ഷനുകളും ഇതുവഴി പരിശോധിക്കാനുമാകും. ഉപഭോക്താക്കൾക്ക് സ്​മാർട്ട് ഫോണുകളിൽ ഓഗ്​മെൻറഡ് റിയാലിറ്റി മോഡ് ഉപയോഗിച്ച് ഗാരേജിലോ പോർട്ടിക്കോയിലോ പാർക്ക് ചെയ്യുമ്പോൾ ടൊയോട്ട വാഹനം എങ്ങനെ കാണപ്പെടും എന്നും അറിയാനുള്ള സൗകര്യവുമുണ്ട്​. ഒാരോരുത്തരുടേയും പരിധിയിലുള്ള ഡീലർഷിപ്പിലേക്കോ അവരുടെ വീട്ടിലേക്കോ സുരക്ഷിതമായ ഡെലിവറിക്ക് ബുക്ക് ചെയ്യുവാനും വിർച്വൽ ഷോറൂമിലുടെ കഴിയും.

ഇന്ത്യൻ വിപണിയിലുള്ള ടൊയോട്ടയുടെ വാഹനങ്ങളായ വെൽഫയർ, കാമ്രി, ഫോർച്യൂണർ, ഇന്നോവ ക്രിസ്റ്റ, അർബൻ ക്രൂസർ, ഗ്ലാൻസ എന്നിവയെല്ലാം വിർച്വൽ ഷോറൂമിൽ കാണാനാകും.