ഒന്നല്ല രണ്ട്; ​പ്രീമിയം വിഭാഗത്തിലേക്ക്​ സ്പീഡ്,​ സ്ക്രാംബ്ലർ ബൈക്കുകളുമായി ട്രയംഫ്; ബുക്കിങ്​ തുടങ്ങി

മിഡ് കപാസിറ്റി പ്രീമിയം മോട്ടോര്‍സൈക്കിള്‍ വിഭാഗത്തിൽ രണ്ട്​ ബൈക്കുകൾ അവതരിപ്പിച്ച്​ ബജാജ്​-ട്രയംഫ്​ കൂട്ടുകെട്ട്​. 400 സിസി വിഭാഗത്തിലാണ്​ ബൈക്കുകൾ വിപണിയില്‍ എത്തിക്കുന്നത്. സ്പീഡ് 400, സ്‌ക്രാംബ്ലര്‍ 400x എന്നിങ്ങനെ വ്യത്യസ്ത ബോഡി ശൈലിയിലുള്ള ബൈക്കുകളാണിവ​. ഇരു വാഹനങ്ങളുടേയും ബുക്കിങ്​ ആരംഭിച്ചിട്ടുണ്ട്​.

ട്രയംഫിന്‍റെ ഏറ്റവും വിലകുറഞ്ഞ മോഡലുകളായിരിക്കും പുതിയ ബൈക്കുകൾ. ബജാജിന്‍റെ വിതരണ ശൃഖല ഉപയോഗിച്ചാവും വാഹനം ഉപഭോക്​താക്കളിലേക്ക്​ എത്തുക. ജൂലൈ ആദ്യ വാരം തന്നെ ഇരു മോട്ടോര്‍സൈക്കിളുകളുടെയും വില പ്രഖ്യാപനം ഉണ്ടാകുമെന്നാണ് സൂചന. ബോള്‍ട്ട്-ഓണ്‍ റിയര്‍ സബ്ഫ്രെയിമോടുകൂടിയ ട്യൂബുലാര്‍ സ്റ്റീല്‍ പെരിമീറ്റര്‍ ഫ്രെയിമിലാണ് ബൈക്കുകൾ നിർമിച്ചിരിക്കുന്നത്. എൽ.ഇ.ഡി ഹെഡ്ലാമ്പുകള്‍, ടേണ്‍ ഇന്‍ഡിക്കേറ്ററുകള്‍, ടെയില്‍ ലാമ്പുകള്‍ എന്നിവയാണ്​ വാഹനത്തിന്​. ട്രയംഫിന്റെ പ്രീമിയം ബൈക്കുകളില്‍ നിന്ന് ഡിസൈന്‍ ഘടകങ്ങള്‍ സ്വീകരിച്ചിട്ടുണ്ട്​. സ്‌ക്രാംബ്ലറിൽ ഒരു ജോടി ഹാന്‍ഡ് ഗാര്‍ഡുകള്‍, സ്പ്ലിറ്റ് സീറ്റുകള്‍, ഡ്യുവല്‍ പര്‍പ്പസ് ടയറുകള്‍, വ്യത്യസ്ത എക്സ്ഹോസ്റ്റ് എന്നിവ നൽകിയിട്ടുണ്ട്.

ഓള്‍-എല്‍ഇഡി ലൈറ്റിങ്​, റൈഡ്-ബൈ-വയര്‍ ടെക്, ഡ്യുവല്‍-ചാനല്‍ എബിഎസ്, സ്വിച്ചബിള്‍ ട്രാക്ഷന്‍ കണ്‍ട്രോള്‍, ഇമ്മൊബിലൈസര്‍, പാര്‍ട്ട്-അനലോഗ് പാര്‍ട്ട്-ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍ എന്നിങ്ങനെ ഫീച്ചറുകളും ബൈക്കുകളിലുണ്ട്​.

398.15 സിസി, ലിക്വിഡ് കൂള്‍ഡ്, 4-വാല്‍വ്, DOHC, ഓവര്‍സ്‌ക്വയര്‍ എഞ്ചിനാണ് ബൈക്കുകള്‍ക്ക് കരുത്ത് പകരുന്നത്. എഞ്ചിന്‍ 8,000 rpm-ല്‍ 39.5 bhp പവറും 6,500 rpm-ല്‍ 37.5 Nm ടോര്‍ക്കും ഉല്‍പ്പാദിപ്പിക്കും. സ്ലിപ്പ് & അസിസ്റ്റ് ക്ലച്ച് ഉള്ള 6-സ്പീഡ് ഗിയര്‍ബോക്സാണ് എഞ്ചിനുമായി ജോടിയാക്കിയിരിക്കുന്നത്. ഒരു എക്സ്​-റിംഗ് ചെയിന്‍ ഡ്രൈവ് വഴി പിന്‍ ചക്രങ്ങളിലേക്ക് പവര്‍ അയയ്ക്കുന്നു.

രണ്ട് മോട്ടോര്‍സൈക്കിളുകളും ട്വിന്‍ സൈഡഡ് കാസ്റ്റ് അലുമിനിയം സ്വിംഗാര്‍മിലാണ് വരുന്നത്. ട്രയംഫ് സ്പീഡ് 400 ബൈക്കിന് വെറും 170 കിലോഗ്രാമാണ് ഭാരം. അതേസമയം സ്‌ക്രാംബ്ലര്‍ 400 X-ന് ഇതിനേക്കാള്‍ 9 കിലോഗ്രാം അധികം ഭാരമുണ്ട്. രണ്ട് മോട്ടോര്‍സൈക്കിളുകളിലും മുന്നില്‍ 43 mm അപ്‌സഡൈ് ഡൗണ്‍ ബിഗ് പിസ്റ്റണ്‍ ഫോര്‍ക്കുകളും പിന്നില്‍ എക്സ്റ്റേണല്‍ റിസര്‍വോയറുള്ള ഗ്യാസ് ചാര്‍ജ്ഡ് മോണോഷോക്കുമാണ് ഉപയോഗിച്ചിരിക്കുന്നത്.

ഇരു ബൈക്കുകളിലും പിന്നില്‍ ഫ്ലോട്ടിങ്​ കാലിപ്പറോട് കൂടിയ 230 mm ഫിക്സഡ് ഡിസ്‌ക് ബ്രേക്കാണ്​. മുന്‍വശത്ത് 4 പിസ്റ്റണ്‍ കാലിപ്പറിനൊപ്പം ഡ്യുവല്‍-ചാനല്‍ എബിഎസ് നൽകിയിട്ടുണ്ട്​. ട്രയംഫ് സ്പീഡ് 400 മോട്ടോര്‍സൈക്കിളിന്റെ ഫ്രണ്ട് ഡിസ്‌ക് സൈസ് 300 mm ആണ്, അതേസമയം ട്രയംഫ് സ്‌ക്രാമ്പ്‌ളര്‍ 400 X-ന്റെ ഫ്രണ്ട് ഡിസ്‌ക് യൂണിറ്റ് 320 mm ആണ്.