രാജ്യത്തെ ആദ്യ ഫ്ലക്​സ്​ എഞ്ചിൻ സിട്രോൺ സി 3ക്ക്​?; വിപ്ലവകരമായ തീരുമാനവുമായി ഫ്രഞ്ച്​ നിർമാതാവ്​

രാജ്യത്തെ വാഹനങ്ങളിൽ ​ഫ്ലക്​സ് എഞ്ചിനുകൾ നിർബന്ധമാക്കുമെന്ന്​​ കേന്ദ്ര സർക്കാർ നേരത്തേ സൂചന നൽകിയിരുന്നു. വാഹനരംഗത്തെ തുടർച്ചയായ പരിഷ്​കരണങ്ങളുടെ ഭാഗമായാണ്​ ഫ്ലക്​സ്​ എഞ്ചിനുകളും നിർബന്ധമാക്കുന്നത്​. രാജ്യത്ത്​ വിൽക്കുന്ന പെട്രോളിൽ എഥനോൾ ചേർക്കാനുള്ള തീരുമാനത്തി​െൻറ തുടർച്ചയായാണ്​ ഫ്ലക്​സ്​ എഞ്ചിനുകൾ നിർബന്ധമാക്കുന്നത്​. ഇത്തരം ഇന്ധനത്തിന്​ അനുയോജ്യമായ എഞ്ചിനായാണ്​ ഫ്ലക്​സ്​ എഞ്ചിനുകൾ കണക്കാക്കപ്പെടുന്നത്​.

നിലവിൽ 10 ശതമാനം എഥനോൾ ചേർത്ത ഇന്ധനമാണ്​ വിൽക്കുന്നത്​. ഇത്​ പടിപടിയായി ഉയർത്താനും 20 ശതമാനത്തിൽ എത്തിക്കാനുമാണ്​ കേന്ദ്ര റോഡ്​ ഗതാഗത മന്ത്രാലയത്തി​െൻറ തീരുമാനം. അങ്ങിനെ വന്നാൽ വാഹനങ്ങളിൽ ഫ്ലക്​സ്​ എഞ്ചിൻ നിർബന്ധമാക്കാനും സാധ്യതയുണ്ട്​. എന്നാൽ ഇതിനായുള്ള ടൈംലൈനുകൾ ഒന്നും ഇനിയും തീരുമാനിച്ചിട്ടില്ല.

സിട്രോൻ സി 3

അടുത്തിടെയാണ്​ ഫ്രഞ്ച്​ വാഹന നിർമാതാവായ സിട്രോൺ ഇന്ത്യയിലെത്തിയത്​. സിട്രോൺ സി 5 എയർക്രോസ്​ എസ്​.യു.വിയാണ്​ ഇവരുടെ ആദ്യ വാഹനം. അടുത്തതായി കുറച്ചുകൂടി ചെറിയ കോമ്പാക്​ട്​ എസ്​.യു.വി പുറത്തിറക്കാനാണ്​ സിട്രോൺ ലക്ഷ്യമിടുന്നത്​. സിട്രോൺ സി 3 എന്നാണ്​ വാഹനത്തി​െൻറ പേര്​. സി 3യുടെ നിരവധി പരീക്ഷണ ഒാട്ടങ്ങൾ രാജ്യത്ത്​ നടന്നിട്ടുണ്ട്​. വാഹനത്തെപറ്റി പുറത്തുവരുന്ന സൂചനകൾ വിശ്വസിക്കാമെങ്കിൽ ഇന്ത്യയിലെ ആദ്യ ഫ്ലക്​സ്​ എഞ്ചിൻ വാഹനമായിരിക്കും സിട്രോൺ സി 3.

സിസി 21 എന്ന കോഡ്​നാമമുള്ള സിട്രോൺ സി 3 അടുത്ത വർഷം ആദ്യമാവും ഇന്ത്യൻ വിപണിയിൽ അവതരിപ്പിക്കുക. സെപ്റ്റംബർ 16 ന് സിട്രോൺ C3 ഒൗദ്യോഗികമായി പുറത്തിറക്കാനും സിട്രോണിന്​ പദ്ധതിയുണ്ട്​. സി 3 എസ്‌യുവിയുടെ ഉത്പാദനം ഒരേസമയം ചെന്നൈയ്‌ക്കടുത്തുള്ള തിരുവള്ളൂരിലെ സിട്രോൺ ഇന്ത്യ പ്ലാൻറിലും ബ്രസീലിലെ പോർട്ടോ റിയൽ പ്ലാൻറിലും നടക്കും. റിപ്പോർട്ടുകൾ അനുസരിച്ച് ടർബോചാർജറുള്ള 1.2 ലിറ്റർ ഫ്ലക്​സ്​-ഫ്യുവൽ എഞ്ചിനാകും വാഹനത്തിന്​.

എന്താണീ ഫ്ലക്​സ്​ എഞ്ചിൻ

ഫ്ലക്​സ്​ എഞ്ചിനുകൾ എന്നത്​ പുതിയൊരു ആശയമല്ല. വിവിധ രാജ്യങ്ങളിൽ ഇപ്പോൾതന്നെ ഇവ ഉപയോഗിക്കുന്നുണ്ട്​. ഒന്നിൽ കൂടുതൽ ഇന്ധനത്തിലോ മിശ്രിത ഇന്ധനത്തിലോ പ്രവർത്തിക്കാൻ കഴിയുന്ന എഞ്ചിനാണ്​ ഫ്ലക്​സ്​ എഞ്ചിനുകൾ. സാധാരണഗതിയിൽ പെട്രോൾ, എഥനോൾ അല്ലെങ്കിൽ മെഥനോൾ എന്നിവയുടെ മിശ്രിതമാണ്​ ഇവയിൽ ഉപയോഗിക്കുന്നത്​. ഏത് മിശ്രിതത്തിനും അനുയോജ്യമായി സ്വയം ക്രമീകരിക്കാൻ കഴിയുന്ന എഞ്ചിനുമാണിത്​. ആധുനിക വാഹനങ്ങളിലുള്ള ഫ്യൂവൽ കോമ്പോസിഷൻ സെൻസർ, ഇ.സി.യു പ്രോഗ്രാമിങ്​ പോലുള്ള പരിഷ്​കാരങ്ങളാണ്​ ഇത്​ സാധ്യമാക്കുന്നത്​.

ഫ്ലക്​സ്​ എഞ്ചിനുകൾ നിർബന്ധമാക്കുമെന്ന സൂചന നൽകിയത്​​ കേന്ദ്ര ഗതാഗത മന്ത്രി നിതിൻ ഗഡ്​കരിയാണ്​. ഫ്ലക്​സ്​ എഞ്ചിനുകൾ 100 ശതമാനം പെട്രോൾ അല്ലെങ്കിൽ 100 ​​ശതമാനം എഥനോൾ എന്നിവയിലും പ്രവർത്തിക്കാൻ കഴിവുള്ളവയാണ്. ഇവ ഇതിനകം ബ്രസീൽ, അമേരിക്ക, കാനഡ തുടങ്ങിയ രാജ്യങ്ങളിൽ ലഭ്യമാണ്. ഇന്ത്യ നിലവിൽ എഥനോൾ മിശ്രിത പെട്രോളാണ്​ ഉപയോഗിക്കുന്നത്​. 2025 ആകു​േമ്പാഴേക്ക്​ 20 ശതമാനം എഥനോൾ മിശ്രിത പെട്രോൾ ഉത്പാദിപ്പിക്കുകയാണ്​ രാജ്യം ലക്ഷ്യമിടുന്നത്​.

പ്രതീക്ഷകൾ നിരവധി

ഒരുപാട്​ പ്രതീക്ഷകളുമായാണ്​ കേന്ദ്രം എഥനോൾ മിശ്രിത പെട്രോളും ഫ്ലക്​സ്​ എഞ്ചിനുകളുമൊക്കെ വാഹനരംഗത്ത്​ കൊണ്ടുവരുന്നത്​. ധാന്യം, കരിമ്പ് തുടങ്ങിയ വിളകൾ പുളിപ്പിച്ചാണ് സാധാരണ എഥനോൾ ഉത്പാദിപ്പിക്കുന്നത്. അതിനാൽ, ഫ്ലക്സ് എഞ്ചിനുകൾ നിർബന്ധമാക്കാനുള്ള നീക്കം കാർഷിക മേഖലയ്ക്കും ഗുണം ചെയ്യുമന്നാണ്​ പ്രതീക്ഷിക്കപ്പെടുന്നത്​. കൂടാതെ രാജ്യത്തെ എണ്ണ ഇറക്കുമതി ചിലവ്​ കുറയുമെന്നും പ്രതീക്ഷിക്കുന്നുണ്ട്​. രാജ്യത്തി​െൻറ മിക്ക ഭാഗങ്ങളിലും പെട്രോളി​െൻറ നിലവിലെ വില ലിറ്ററിന് 100 രൂപയ്ക്ക് പുറത്താണ്​. എന്നാൽ എഥനോൾ വില ലിറ്ററിന് 60-62 രൂപയുമാണ്. കൂടാതെ, എഥനോൾ ഉപയോഗിച്ച് പ്രവർത്തിക്കുന്ന വാഹനങ്ങളുടെ മലിനീകരണ തോതും കുറവാണ്​.