സമാധാന യാത്ര; ഗ്രേസിക്കൊപ്പം

സാംസങിൻറെയും ആപ്പിളിൻറെയുമൊക്കെ കൊള്ളാവുന്ന മൊബൈൽഫോൺ വാങ്ങുന്ന വിലക്ക്​ സ്കൂട്ടർ വാങ്ങാൻ പറ്റുമെന്നാണ്​ ഇലക്​ട്രിക്​ വാഹന യുഗം വന്നതുകൊണ്ടുണ്ടായ ഏറ്റവും വലിയ ഗുണങ്ങളിൽ ഒന്ന്​. ഡെയിലി മൊബൈൽ ചാർജ്​ ചെയ്യുന്നതിനൊപ്പം ഇനി സ്കൂട്ടറും ചാർജ്​ ചെയ്യാൻ ഓർക്കേണ്ടിവരുമെന്നു മാ​ത്രം. രണ്ടിനും ഒരേ ചാർജർ ഇറങ്ങുന്ന കാലമാണ്​ യൂത്തിൻറെ സ്വപ്​നങ്ങളിൽ ഇപ്പോഴുള്ളത്​. കേട്ടാൽ ഞെട്ടുന്ന പേരുമിട്ട്​ വിദേശത്തുനിന്ന്​ എത്തിയിരുന്ന സ്കൂട്ടറുകൾക്ക്​ പകരം നല്ല നാടൻ പേരുകളിൽ ഇ സ്കൂട്ടറുകൾ വരുന്നു എന്നതും കുളിരു കോരുന്ന അനുഭവമാണ്​.

ഗൃഹാതരത്വം ​പേറുന്ന മലയാളിതനിമയുള്ള പേരുള്ള സ്കൂട്ടറുകൾ വൈറലാകുന്ന കാഴ്ചയാണ്​ രാജ്യത്തുള്ളത്​. ഓല എന്നു കേൾക്കുമ്പോഴുണ്ടാകുന്ന ഒരിത്​ ഇല്ലേ അതാണ്​ ഉദ്ദേശിച്ചത്​. ഇപ്പോഴിതാ 59,273 രൂപയ്ക്ക് 120 കി.മീ. ഓടിക്കാവുന്ന ഇലക്‌ട്രിക് സ്‌കൂട്ടർ വിപണിയിലെത്തിയിരിക്കുന്നു. പേര്​ ഗ്രേസി. രാജ്യത്തെ മുൻനിര ഇവി സ്റ്റാർട്ടപ്പായ സീലിയോ ഇബൈക്‌സാണ്​ നിർമാതാക്കൾ. പരമാവധി 83,073 രൂപ വരെ എക്‌സ്‌ഷോറൂം വിലയിൽ ഗ്രേസി, ഗ്രേസി ഐ, ഗ്രേസി പ്ലസ് മോഡലുകളാണ് എത്തിയിരിക്കുന്നത്​. ലക്ഷം രൂപയിൽ താഴെ വിലയുള്ള മോഡലുകൾക്ക്​ ആരാധകർ കൂടുന്നത്​ മുതലെടുക്കാനാണ്​ സീലിയോയുടെ നീക്കം. വർഷം 1,50,000 വാഹനങ്ങൾ നിർമിക്കാൻ കഴിയും വിധം ഹരിയാനയിലെ ഹിസാറിലെ ലാഡ്‌വയിൽ പുതിയ നിർമാണ യൂണിറ്റും തുടങ്ങിയിട്ടുണ്ട്. വലിയ വേഗത്തിലല്ലാതെ കുറച്ചുദൂരമൊക്കെ മാത്രം പോകേണ്ടിവരുന്നവരെയാണ്​ ഗ്രേസി നോട്ടമിട്ടിരിക്കുന്നത്​. വിദ്യാർത്ഥികളും പ്രൊഫഷണലസുമൊക്കെ ഇത്തരക്കാരാണല്ലോ.

ആൻ്റി-തെഫ്റ്റ് അലാറം, കീ ലെസ്​ ഡ്രൈവ്​, യു.എസ്​.ബി പോർട്ട്​, ഫ്രണ്ട് ഡിസ്‌ക് ബ്രേക്ക്​ എന്നിവയൊക്കെ എല്ലാ മോഡലുകൾക്കുണ്ട്​. 48/60V ബി.എൽ.ഡി.സി മോട്ടോറും 28 AH ലിഥിയം ബാറ്ററിയുമുള്ള ഗ്രേസിക്ക്​ സിംഗിൾ ചാർജിൽ 60 മുതൽ 90 വരെ കിലോമീറ്റർ റേഞ്ച് കിട്ടുമെന്ന്​ കമ്പനി പറയുന്നു. ചാർജിംഗിനായി ഒന്നര യൂണിറ്റ്​ വൈദ്യുതി എടുത്തേക്കാം. ഗ്രേസി ഐക്ക്​ കുറച്ചുകൂടി മസിലൻ ഭാവമാണുള്ളത്​. മികച്ച ആക്സിലറേഷനും പെർഫോമൻസുമുള്ള ഗ്രേസി പ്ലസിനു 60​/72v ബി.എൽ.ഡി.സി മോട്ടോറാണുള്ളത്​.