ഒരാൾക്ക്​ ഒരായുസ്സിൽ എത്ര കാർ വേണം?

കനത്ത നഷ്ടം വരുമ്പോഴും മലയാളി ചിരിച്ചുകൊണ്ടുനിൽക്കുന്ന രണ്ടേരണ്ട്​ അവസരങ്ങളേ ഉണ്ടാകൂ. സ്വർണാഭരണം മാറ്റിവാങ്ങുമ്പോഴും കാർ വിറ്റു പുതിയത്​ വാങ്ങുമ്പോഴും. കേരളത്തിൽ തെക്കുവടക്കു സഞ്ചരിക്കുമ്പോൾ ബോധ്യമാകുന്ന ഒരു കാര്യമുണ്ട്​. നമ്മുടെ നാട്ടിൽ പുതിയ വണ്ടികൾ വിൽക്കുന്നതിനെക്കാൾ കൂടുതൽ ഷോറൂമുകൾ ഉപയോഗിച്ച വാഹനങ്ങൾ വിൽക്കുന്നതിനുണ്ട്​. ഇവയിൽ വിൽപനക്കു കിടക്കുന്ന വണ്ടികളിൽ മിക്കതിന്‍റെയും വിശേഷണം ‘ഷോറൂം കണ്ടീഷൻ’ എന്നായിരിക്കും. എന്തിനാണ്​ ഷോറൂം കണ്ടീഷനിലുള്ള വാഹനങ്ങൾ ആളുകൾ വിറ്റുകളയുന്നത്? വാങ്ങു​മ്പോൾ തന്നെ 15 വർഷം നികുതിയടക്കുന്നവർ എത്രകാലം അതുപയോഗിക്കുന്നുണ്ടാവും? ഇതൊക്കെയറിയും മുമ്പ്​ കാറുകളുടെ ആയുസ്സ്​ എത്രയാണെന്ന്​ അന്വേഷിക്കുന്നത്​ നന്നായിരിക്കും.

രണ്ടാം ലോകമഹായുദ്ധകാലത്ത്​ ഉപയോഗിച്ച വില്ലീസ്​ ജീപ്പുകൾ ഓമനിച്ചു കൊണ്ടുനടക്കുന്ന​വരുടെ അഭിപ്രായത്തിൽ വാഹനങ്ങളുടെ ആയുസ്​ ആമയുടേതിനേക്കാൾ കൂടുതലാണ്​. അതായത്​ നൂറ്റാണ്ടിനപ്പുറവും അവർ അത്​ കൊണ്ടുനടക്കും. പാറിപ്പറക്കുന്ന പുതുതലമുറ ഫ്രീക്കൻമാരോടു ചോദിച്ചാൽ കാറിനൊക്കെ ചിത്രശലഭത്തിനുള്ളതിനെക്കാൾ അൽപം കൂടി ആയുസ്സ്​ മതി. ഇതു രണ്ടും സ്വീകാര്യമാകാത്തവർക്ക്​ പുതിയ കാർ വിൽക്കുന്നവരോടും ഉപയോഗിച്ച കാർ വിൽക്കുന്നവരോടും അഭിപ്രായം തേടാം. ആവശ്യമില്ലാത്തവർക്ക്​ എങ്ങനെ വാഹനം വിൽക്കാം എന്നതാണ്​ പുതിയ വാഹനങ്ങൾ വിൽക്കുന്നവരുടെ എക്കാലത്തേയും ഗവേഷണ വിഷയം. കാർ ഇല്ലാത്തവരോട്​ കാറില്ലാതെ എങ്ങനെ ജീവിക്കുന്നു എന്ന്​ ചോദിക്കുന്ന എക്സികുട്ടന്മാർ കാറുള്ളരോട്​ ഇതിനിയും മാറ്റിവാങ്ങാറായില്ലേ എന്ന്​ അത്ഭുതപ്പെടും. പുത്തൻപോലുള്ള വണ്ടികൾ കിട്ടുമ്പോൾ എന്തിനു ലക്ഷങ്ങൾ പാഴാക്കി പുതിയ കാർ വാങ്ങണമെന്നതാണ്​ പഴയ കാർ വിൽക്കുന്നവരുടെ ചോദ്യം.

നിലവിലുള്ള വണ്ടി നൽകി പുതിയതെടുക്കാനുള്ള സൗകര്യം ഡീലർമാർ ഒരുക്കിത്തുടങ്ങിയതോടെയാണ്​ ഉടുപ്പുമാറുന്നപോലെ കാറുകൾ മാറിവാങ്ങുന്നവരുടെ എണ്ണവും കൂടിയത്​. ഒരു കാറിന്‍റെ ഗുണങ്ങൾ അറിയാൻ ആ മോഡൽ വാങ്ങാൻ ഒരു ഷോറൂമിൽ ചെന്നാൽ മതി. ദോഷം അറിയണമെങ്കിൽ ആ കാർ എക്സ്​ചേഞ്ച്​ ചെയ്യാൻ ശ്രമിച്ചാൽ മതി. സത്യത്തിൽ മനുഷ്യരെ പോലെ തന്നെയാണ്​ വാഹനങ്ങളുടെയും ആരോഗ്യവും. നന്നായി ശ്രദ്ധിച്ചാൽ ദീർഘായുസ്​ കിട്ടും. അശ്രദ്ധമൂലം ജന്മനാ മരിച്ചുപോകുന്നവരുമുണ്ട്.

അൽപം ഫ്ലാഷ്​ ബാക്​

80 കളുടെ ഒടുക്കമെടുത്താൽ മാരുതിയും അമ്പാസിഡറും ഫിയറ്റും പേരിനൊരു മൊണ്ടാനയുമടങ്ങുന്നതായിരുന്നു ഇവിടുത്തെ കാർലോകം. മഹീന്ദ്രയുടെ സി.ജെയും ഹിന്ദുസ്ഥാൻ മോട്ടോഴ്​സിന്‍റെ ട്രക്കറുമടങ്ങൂന്ന യൂട്ടിലിറ്റി വണ്ടികൾ. കോണ്ടസയിലും 118 എൻഇയിലുമൊതുങ്ങുന്ന ആഢംബ​രം. സ്റ്റാൻഡേർഡ്​ 2000 എന്ന ഒറ്റപ്പേരിലെ അത്യാഢംബരം. ഇവയും പട്ടാളത്തിൽ ചേർന്നതുകൊണ്ടുമാത്രം നാലുപേർ അറിയാൻ തുടങ്ങിയ ജോങ്ക, ജിപ്സി എന്നിങ്ങനെ അല്ലറചില്ല പാർട്ടികളും ചേർന്നതായിരുന്നു നമ്മുടെ നാട്​. ഇതൊക്കെ വാങ്ങാൻ മുന്തിയ ശമ്പളം വാങ്ങുന്ന കുറച്ച്​ സർക്കാർ ജീവനക്കാർ, ഡോക്ടറും എൻജിനീയറും പോലുള്ള ചില പ്രാഫഷണലുകൾ, ബിസിനസുകാർ, സിനിമക്കാർ, എസ്​റ്റേറ്റുടമകൾ എന്നിവർ മാത്രം. സൗകര്യമുണ്ടേൽ വണ്ടി വാങ്ങിയാൽ മതിയെന്നതായിരുന്നു കമ്പനികളുടെ നിലപാട്​. അംബാസിഡർ പോലുള്ള വണ്ടികൾക്കൊപ്പം കുറെ സ്​പെയർപാർട്​സ്​ പെട്ടിയിലാക്കി കിട്ടും. വർക്​ഷോപ്പിൽ കൊണ്ടുപോയി കൂട്ടിപ്പിടിപ്പിച്ചെടുത്താൽ വാങ്ങുന്നവനു കൊള്ളാം.

ഈ നൂറ്റാണ്ടിന്‍റെ തുടക്കം മുതൽ സ്ഥിതി മാറി. നിർത്തിപ്പോയതും കൂട്ടുകെട്ടുപിരിഞ്ഞതുമൊക്കെ ചേർത്താൽ 43 കമ്പനികളുടെ പേരിൽ നമ്മുടെ നാട്ടിൽ കാറുകൾ ഉണ്ടെന്നു കാണാം. ബി.എം.ഡബ്ല്യു, ബെൻസ്​, പോർഷെ പോലുള്ളവ മാറ്റി നിർത്തി സാധാരണക്കാർക്ക്​ വാങ്ങാൻ പറ്റുന്ന വണ്ടികളുണ്ടാക്കുന്ന കമ്പനികളെ മാ​ത്രം നോക്കിയാലും 15 എണ്ണം സജീവമാണ്​. ഇവയെല്ലാംകൂടി വിൽപനക്കൊരുക്കുന്നത്​​​ 102 മോഡലുകളാണ്​. ചിലതിനു പെട്രോളും ഡീസലും എന്നിങ്ങനെ തിരിവുമുണ്ട്​. ഓരോ മോഡലിനും ശരാശരി നാലു വേരിയന്‍റ്​ പ്രകാരം കൂട്ടിയാൽ പോലും വിപണിയിലെത്തുന്നത്​ നാനൂറിലേറെ വകഭേദങ്ങളാണ്​. ഒരു വണ്ടിയെടുത്ത്​ ഏതാനും വർഷം പിന്നിടു​മ്പോഴേക്കും കൂടുതൽ സാ​ങ്കേതിക വിദ്യ കൂട്ടിച്ചേർത്തുള്ള ഫേസ്​​ ലിഫ്​റ്റ്​ ഇറങ്ങുന്നതും ഇതോടൊപ്പം കണക്കുകൂട്ടണം. ഏതുവാങ്ങണമെന്നതു സംബന്ധിച്ച്​ വലിയൊരു തുണിക്കടയിൽ കയറുമ്പോഴത്തേക്കാൾ ആശയക്കുഴപ്പമുണ്ടാകുമെന്ന്​ ഉറപ്പ്​.

എന്തുവാങ്ങും, എന്തിനുവാങ്ങും?

നാനൂറിൽപരം മോഡലുകൾ വിൽക്കാൻ നാലായിരത്തിലേറെ തന്ത്രങ്ങൾ കമ്പനികൾക്കുണ്ട്​. കാർ ഷോറൂമുകളിലെ എക്സിക്യൂട്ടീവുമാരുടെ ഭാഷ കടമെടുത്താൽ ആഗ്രഹവും രണ്ടു ചെക്​ ലീഫുമുണ്ടെങ്കിൽ കേരളത്തിൽ ആർക്കും കാർ വാങ്ങാം. പ്രമുഖ കമ്പനികളെല്ലാം സർവീസ്​ ചെയ്യാൻ തങ്ങളുടെ വർക്ക്​ഷോപ്പുകളിൽ എത്തുന്നവർക്ക്​ മുന്നിൽ പുതിയ കാർ മാറ്റി വാങ്ങാനുള്ള പ്രലോഭനം വെക്കാറുണ്ട്​. നിലവിലെ മോഡൽ നിർത്താനാലോചിക്കുന്നുവെന്നും അതിലും നല്ല മോഡൽ വരുന്നുണ്ടെന്നുമുള്ള നിസ്സാരമായ കുശലം പറച്ചിലിലാണ്​ മനംമാറ്റത്തിനുള്ള പ്രേരണ തുടങ്ങുക. തൽപരരെന്നുതോന്നിയാൽ മാറ്റിവാങ്ങിയാൽ കിട്ടുന്ന അധിക ആനുകൂല്യങ്ങളുടെ കെട്ടഴിയും. ‘റോഡിൽ മുഴുവൻ സാറിന്‍റെ കൈയിലുള്ള കാറാണ്​ പുതിയതെടുത്താൽ മറ്റുള്ളവരെക്കാൾ ഗമയുണ്ടാകുമെന്ന ആണവായുധത്തിൽ ഒരുമാതിരിപ്പെട്ടവർ വീഴുകയാണ്​ പതിവ്​. അഞ്ചാം വർഷം ഗാരന്‍റി തീരുംമുമ്പ്​ വിറ്റാൽ കൂടുതൽ വില വാങ്ങിത്തരാം എന്ന മോഹന വാഗ്​ദാനം കൂടിയാകുമ്പോൾ ഉപഭോക്താവ്​ ഫ്ലാറ്റ്​. ‘ഉണരൂ.. ഉപഭോക്താവേ ഉണരൂ..’ എന്നൊന്നും വിളിച്ചുകൂവിയിട്ട്​ ഇനി കാര്യവുമില്ല.

മയങ്ങിക്കിടക്കുന്ന കാറുടമക്കിട്ട്​ വെക്കുന്ന അടുത്ത മയക്കുവെടിയാണ്​ കാർവായ്പ എന്നത്​. കഴിഞ്ഞ നൂറ്റാണ്ടിന്‍റെ ഒടുക്കത്തിൽ പ്രമുഖ ധനകാര്യ സ്ഥാപനങ്ങൾ അഞ്ചുവർഷമൊക്കെയായിരുന്നു വാഹനങ്ങൾക്കു അനുവദിച്ചിരുന്ന വായ്പ കാലാവധി. 12, 13 ശതമാനവും അതിൽ കൂടുതലുമൊക്കെയായിരുന്നു പലിശ നിരക്ക്​. വണ്ടി വാങ്ങി വായ്പ തീർത്ത്​ പിന്നെയും നാലഞ്ചു വർഷം കഴിഞ്ഞാണ്​ ഉടമകൾ വണ്ടി വിറ്റിരുന്നത്​. 2011 കടന്നപ്പോൾ ലോൺ കാലാവധി ഏഴുവർഷമൊക്കെയായി. പലിശ പത്തിലൊക്കെയെത്തി. ലോൺ അടച്ചുകഴിഞ്ഞാൽ വണ്ടി വിറ്റ്​ പുതിയതെടുക്കണം. നിലവിൽ 7.5, എട്ട്​ ശതമാനം പലിശക്ക്​ വാഹനവായ്പ കിട്ടുമെന്നായി. ഇതോടെ വാഹനം വാങ്ങൽ കുട്ടിക്കളിയായി. കൊറോണ കാലം കഴിഞ്ഞു വിപണി പച്ചപിടിച്ചു തുടങ്ങിയപ്പോൾ ഒരു കാർ വാങ്ങിയാൽ ശരാശരി നാലുവർഷം ഉപയോഗിച്ച്​ വിൽക്കുന്നതായി മലയാളിയുടെ രീതി. വാഹനം ഷോറൂമിൽ എത്തിച്ചു വിൽക്കുന്നു. വായ്പ അടച്ചശേഷം ബാക്കിയാവുന്ന തുക ഡൗൺപേയ്​മെന്‍റായി നൽകുന്നു. പുതിയ വണ്ടിയുമായി പോകുന്നു എന്നതായി ശീലം. ഫിഷിങ്​ ഹാർബറിൽ കടൽക്കാക്കയെപ്പോലെയാണ്​ ഇവിടങ്ങളിൽ വാഹനബ്രോക്കർമാർ കറങ്ങുന്നത്​.

എങ്ങനെ സംരക്ഷിക്കണം; എപ്പോൾ വിൽക്കണം?

തണുത്തുറഞ്ഞ യൂറോപ്പിൽ 12 മുതൽ 14 വർഷം വയെും ചുട്ടുപൊള്ളുന്ന ഗൾഫിൽ ആറുവർഷം വരെയുമൊക്കെ ഉപയോഗിച്ചിട്ടാണ്​ പല വാഹനങ്ങളും മാറണോയെന്ന്​ ശരാശരി വാഹനമുടമ തീരുമാനിക്കുന്നത്​. ചൂടും തണുപ്പും പാകത്തിനുള്ള നമ്മുടെ നാട്ടിൽ ഗ്ലാമർ കുറയുന്നു എന്നുതോന്നുമ്പോഴേക്കും വണ്ടി മാറും. മോശം റോഡുകൾ, നിലവാരം കുറഞ്ഞ ഇന്ധനം... പഴയകാലത്ത്​ നമ്മുടെ വാഹനങ്ങളുടെ അന്തകരായിരുന്നത് ഇതൊക്കെയായിരുന്നു. ക്ഷയരോഗിയെപ്പോലെ അവശനായി പുക തുപ്പിയെത്തുന്ന വണ്ടികളുടെ എഞ്ചിൻ അഴിച്ച്​ സിലിണ്ടറിൽ സ്ലീവിട്ട് പുതിയ പിസ്​റ്റണും ഘടിപ്പിച്ച് പടക്കുതിരയാക്കി വിടുന്ന വർക്ക്​ഷോപ്പുകൾ അന്ന്​ നാടിന്‍റെ മുക്കിലും മൂലയിലും ഉണ്ടായിരുന്നു. കരിപുരണ്ട ജീവിതങ്ങൾ പോലുളള ആശാന്മാരും ശിഷ്യരും ആളെക്കൊല്ലുന്ന കൂലി വാങ്ങിയല്ല ഈ ജോലി ചെയ്​തിരുന്നത്​. വണ്ടിയുണ്ടാക്കിയ കമ്പനിയെയല്ല ഇത്തരം ആശാന്മാരിൽ വിശ്വാസമുറപ്പിച്ചാണ്​ നാട്ടുകാർ വണ്ടികൾ കൊണ്ടുനടന്നിരുന്നത്​.

ഇപ്പോൾ സ്ഥിതി മാറി. അന്താരാഷ്ട്ര സാ​ങ്കേതിക വിദ്യകൾ നമ്മുടെ നാട്ടിലെ വണ്ടികളിലുമെത്തി. നിലവാരമുള്ള ഇന്ധനവും, സൂപ്പർ റോഡുകളുമൊക്കെ ചേർന്നതോടെ വാഹനപരിപാലനം അത്ര ബുദ്ധിമുട്ടില്ലാത്ത കാര്യമായി. എങ്കിലും എൺപതിനായിരം കിലോമീറ്ററിൽ കൂടുതൽ ഓടിയ വണ്ടി എന്നത്​ നശിക്കാറായ വണ്ടിയാണെന്നാണ്​ പൊതുവെയുള്ള വിശ്വാസം. ഇവ വിറ്റൊഴിവാക്കുന്നതാണ്​ നല്ലതെന്ന അഭിപ്രായം ഷോറൂമിൽ നിന്നുതന്നെ വന്നേക്കാം. അതേസമയം, കമ്പനി നിർദേശിച്ചിരിക്കുന്ന രീതിയിൽ പരിപാലിച്ചാൽ ഭൂരിപക്ഷം വാഹനങ്ങളും ഒന്നര ലക്ഷം കിലോമീറ്റർ വരെ സുഖമായി ഉപയോഗിക്കാമെന്നാണ്​ മെക്കാനിക്കുകൾ പറയുന്നത്​. ഓരോ പതിനായിരം കിലോമീറ്ററിനും എഞ്ചിനോയിൽ മാറിയുള്ള സർവീസും ഇരുപതിനായിരം കിലോമീറ്ററിൽ സ്വാഭാവികമായി തകരാറിലാകുന്ന ഭാഗങ്ങൾ മാറിയുള്ള സർവീസുമെന്ന രീതിയാണ്​ മിക്ക കമ്പനികളും പിന്തുടരുന്നത്​. എൺപതിനായിരം കിലോമീറ്റർ കടക്കുമ്പോൾ പ്രത്യേകിച്ച്​ ഡീസൽ വാഹനങ്ങളിൽ ഇ.ജി.ആർ വൃത്തിയാക്കുന്ന ചടങ്ങും ലക്ഷം കിലോമീറ്ററിൽ എത്തുമ്പോൾ ടൈമിങ്​ ചെയിൻ മാറുകയെന്ന ചടങ്ങും കൃത്യമായി നടത്തിയിരിക്കണം. വാഹനത്തിനൊപ്പം കിട്ടുന്ന യൂസർ മാന്വൽ കൃത്യമായി വായിക്കുക എന്നത്​ പലതരം തെറ്റിദ്ധാരണകളും മാറ്റാൻ സഹായിക്കും.

അപകടത്തിൽ പെട്ടതല്ലയെങ്കിൽ യഥാസമയം യഥാവിധി നൽകുന്ന പരിചരണം കാറുകളെ 15 വർഷത്തിനപ്പുറം പോലും ഷോറൂം കണ്ടീഷനിൽ കൊണ്ടുനടക്കാൻ സഹായിക്കും. സർക്കാർ അനുവദിച്ചിരിക്കുന്ന കാലാവധി കഴിഞ്ഞ്​ വാഹനം പൊളിച്ചുവിറ്റ്​ പുതിയ വാഹനം വാങ്ങിയാൽ ഏറ്റവും ലാഭകരവും അതുതന്നെയായിരിക്കും. ഉദാഹരണത്തിന്​ 2019 നവംമ്പറിൽ വാങ്ങിയതും 95000 കിലോമീറ്റർ ഓടിയതുമായ ഡീസൽ ബ്രസ ഇസഡ്​ഡിഐ ഓട്ടോമാറ്റിക്​ എക്സചേഞ്ച്​ ചെയ്താൽ കിട്ടുന്ന പരമാവധി വില 7.75 ലക്ഷമായിരിക്കും. പുറത്തുവിറ്റാൽ ലഭിക്കുക എട്ടു ലക്ഷവും. എതാണ്ട്​ ഇതേ സൗകര്യങ്ങളുള്ള പുതിയ ബ്രസ വാങ്ങാൻ ചിലവാകുക 15 ലക്ഷത്തിലധികമാണ്​. അതായത്​ വിറ്റുകിട്ടുന്ന തുകയേക്കാൾ ഏഴു ലക്ഷം കൂടുതൽ. എന്നാൽ, കമ്പനി നിർദേശിക്കുന്ന സർവീസും ഇത്രയും കാലത്തെ ഉപയോഗശേഷം തകരാറിലായേക്കാമെന്ന്​ ഉടമക്ക്​ തോന്നുന്ന വീൽബെയറിങ്​ അടക്കമുള്ള ഘടകങ്ങളും ടയറുകളുമടക്കം മാറ്റിയിട്ട്​ പുതുപുത്തനാക്കിയിറക്കാൻ ഏകദേശം മുക്കാൽ ലക്ഷം രൂപയെ ചെലവഴിക്കേണ്ടൂ. ഇങ്ങനെ കിട്ടുന്ന വണ്ടി അടുത്ത ഒരു ലക്ഷം കിലോമീറ്റർ കൂടി പാട്ടും കേട്ട്​ ഓടിക്കാം. പുതിയ വണ്ടി വാങ്ങാൻ നീക്കിവെച്ച തുകയിൽ ബാക്കിവരുന്ന 6.25 ലക്ഷത്തിന്‍റെ പലിശ മതി ഒരുമാസത്തെ ഏകദേശ ഇന്ധന ചിലവിനെന്നതും ഓർമ വേണം.