സൗജന്യ സർവീസും വാറൻറിയും തീരാറായോ? ഹ്യൂണ്ടായ്​ ഉടമയാണെങ്കിൽ ആശങ്കപ്പെടേണ്ടതില്ല.

കോവിഡ്​ ലോക്​ഡൗൺ കാലത്തെ വാഹന ഉടമകളുടെ പ്രധാന ആശങ്കകളിലൊന്ന്​ സൗജന്യ സർവീസും വാറൻറിപീരീഡുമൊക്കെ അവസാനിക്കുന്നതിനെകുറിച്ചാണ്​. ഇതേപറ്റി ബോധ്യമുള്ളവരാണ്​ കസ്​റ്റമർമാരെപറ്റി ചിന്തയുള്ള വാഹനകമ്പനികൾ. ലോക്​ഡൗൺ കണക്കിലെടുത്ത് ഉപയോക്താക്കൾക്ക് വാറൻറി, എക്സ്റ്റെൻഡഡ് വാറൻറി, സൗജന്യ സേവനങ്ങൾ എന്നിവ രണ്ട്​ മാസത്തേക്ക് നീട്ടിയതായി ഹ്യൂണ്ടായ് മോട്ടോർ ഇന്ത്യ അറിയിച്ചു. വെല്ലുവിളി നിറഞ്ഞ സമയങ്ങളിൽ ഉപഭോക്താക്കൾക്ക് പിന്തുണ നൽകുന്നത്​ തുടരുമെന്നും ശനിയാഴ്ച പുറത്തിറക്കിയ പത്രക്കുറിപ്പിൽ ഹ്യൂണ്ടായ്​ അധികൃതർ അറിയിച്ചു.

'ജീവൻ രക്ഷിക്കുന്ന ഓക്സിജൻ ഉപകരണങ്ങൾ വിതരണം ചെയ്യുന്നതിലൂടെ രാജ്യമെമ്പാടുമുള്ള ആളുകൾക്ക് ആശ്വാസം പകരുന്നതിനായി ഹ്യൂണ്ടായ് ഒന്നിലധികം പരിപാടികൾ ആരംഭിച്ചു. വാഹനങ്ങളുടെ വാങ്ങൽ അനുഭവം പൂർണമായും ഡിജിറ്റൈസ് ചെയ്തു. 360 ഡിഗ്രി ഡിജിറ്റൽ, കോൺടാക്റ്റ്-ലെസ് സർവീസ് വഴിയും സൗകര്യങ്ങൾ നൽകി'-ഹ്യൂണ്ടായ് മോട്ടോർ ഇന്ത്യ ലിമിറ്റഡ് ഡയറക്ടർ (സെയിൽസ്, മാർക്കറ്റിംഗ് & സർവീസ്) തരുൺ ഗാർഗ് പറഞ്ഞു. ഓൺ‌ലൈൻ സർവീസ് ബുക്കിങ്​, വെഹിക്കിൾ സ്റ്റാറ്റസ് അപ്‌ഡേറ്റ്, ഓൺ‌ലൈൻ പേയ്‌മെൻറ്​, പിക്​ ആൻഡ് ഡ്രോപ്പ് തുടങ്ങിയ സൗകര്യങ്ങൾ ഹ്യുണ്ടായ്​ ഉപഭോക്​താക്കൾക്ക്​ നലകുന്നുണ്ട്​. രാജ്യത്തുടനീളം 1300 ലേറെ വർക്ക്‌ഷോപ്പുകളുടെ ശൃംഖലയുണ്ട് ഹ്യുണ്ടായ് മോ​േട്ടാഴ്​സിന്​.

വെല്ലുവിളി നിറഞ്ഞ സമയത്ത് മതിയായ പിന്തുണ ഉറപ്പാക്കുന്നതിന് ഉപയോക്താക്കൾക്ക് വാറൻറി, എക്സ്റ്റെൻഡഡ് വാറൻറി, സൗജന്യ സർവീസ്​ എന്നിവ 2 മാസത്തേക്ക് നീട്ടുന്നതായി ഞങ്ങൾ പ്രഖ്യാപിക്കുന്നു. 24 മണിക്കൂർ റോഡ് സൈഡ് സഹായ പദ്ധതിയിലൂടെ ഹ്യുണ്ടായ് ഉപഭോക്താക്കളുടെ കൂടെ നിൽക്കുകയും തടസ്സമില്ലാത്ത പിന്തുണ ഉറപ്പാക്കുകയും ചെയ്യും'-ഗാർഗ് കൂട്ടിച്ചേർത്തു.