ഇന്ധനം പ്രീമിയം വേണോ സാദാ മതിയോ? നമ്മുടെ വാഹനത്തിന്​ പറ്റിയ പെട്രോളും ഡീസലും തിരിച്ചറിയാം

ഇന്ധനം നിറക്കാനുള്ള ഓരോ യാ​ത്രയിലും നാം അഭിമുഖീകരിക്കുന്നൊരു ചോദ്യമുണ്ട്​. പെട്രോളാക​ട്ടെ ഡീസലാക​ട്ടെ, പ്രീമിയം വേണോ സാദാ വേണോ എന്ന സുപ്രധാനമായ ചോദ്യമാണത്​. പെട്രോൾ പമ്പിലേക്കുള്ള നമ്മുടെ ദൈനംദിന യാത്രകളിൽ ഈ ചോദ്യം കേട്ടിരിക്കുമെങ്കിലും വില കൂടുതലായതിനാൽ നാമീ സാധ്യത ഉപയോഗിക്കാറില്ല എന്നതാണ്​ സത്യം. പമ്പിൽ ചെന്നാൽ പ്രീമിയം വേണോ സാദാ വേണോ എന്നായിരിക്കും ആദ്യ ചോദ്യംവരിക. 'സാദാ' എന്ന ഒറ്റവാക്കിൽ നാം മറ്റെല്ലാത്തിനേയും തള്ളിക്കളയാറുണ്ട്​. ഇവ കേവലം ഫാൻസി പേരുകളാണെന്നും യഥാർഥ നേട്ടങ്ങളില്ലെന്നും നാം വിശ്വസിക്കുന്നതുകൊണ്ടാണ്​ മറ്റെല്ലാം വേണ്ടെന്ന്​ വയ്​ക്കുന്നത്​.

ലോകത്തെ സർവ്വ വസ്​തുക്കളിലും ഇനങ്ങളും തരംതിരിവുകളും ഉള്ളതുപോലെ പ്രകൃതിവാതക ഇന്ധനങ്ങളിലും അതുണ്ട്​. പെട്രോൾ, ഡീസൽ, ഏവി​േയഷൻ ഫ്യൂവൽ, എഞ്ചിൻ ഓയിൽ മുതൽ കോൾടാർ വരെ പ്രകൃതിവാതകത്തിന്‍റെ പലതരം വകഭേദങ്ങളാണ്​. അതിൽതന്നെ പെട്രോളിലും ഡീസലിലും അതിന്‍റെ ശുദ്ധീകരണ പ്രക്രിയ അനുസരിച്ച്​ എക്‌സ്ട്രാ പ്രീമിയം, സ്പീഡ്, പവർ, 93 ഒക്ടെയിൻ, സ്പീഡ് 97 തുടങ്ങി പലതരം ഗ്രേഡുകളുണ്ട്​. പെട്രോളിലും ഡീസലിലും അതിന്‍റെ ഗ്രേഡ്​ തീരുമാനിക്കുന്നത്​ രണ്ട്​ മാനദണ്ഡങ്ങൾ അനുസരിച്ചാണ്​. പെട്രോളിൽ അത്​ ഒക്​ടേൻ നമ്പർ എന്നാണ്​ അറിയ​പ്പെടുന്നത്​. ഡീസലിൽ ആക​ട്ടെ സീറ്റേൻ നമ്പർ എന്നും പറയും.

പ്രീമിയം ഡീസൽ

സ്റ്റാൻഡേർഡ് ഡീസലിൽ നിന്ന് പ്രീമിയത്തെ വേർതിരിക്കുന്ന സവിശേഷതയാണ് അതിൽ ചേർക്കുന്ന അഡിറ്റീവുകൾ. അഡിറ്റീവുകൾ ഇന്ധനത്തിന്‍റെ ഗുണനിലവാരവും എഞ്ചിന്‍റെ ആയുസ്സും വർധപ്പിക്കുമെന്നാണ്​ ഓയിൽ കമ്പനികൾ അവകാശപ്പെടുന്നത്​. പ്രീമിയം ഡീസൽ ഉപയോഗിക്കുന്നതുകൊണ്ട്​ ചില മെച്ചങ്ങൾ ഉണ്ടാകുമെന്ന്​ പഠനങ്ങൾ തെളിയിച്ചതായും കമ്പനികൾ പ്രചരിപ്പിക്കുന്നുണ്ട്​​.

1. എഞ്ചിൻ വൃത്തിയായി സൂക്ഷിക്കും

പ്രീമിയം ഡീസലിൽ ചേർക്കുന്ന ഡിറ്റർജന്‍റുകൾ എഞ്ചിൻ ഘടകങ്ങൾ വൃത്തിയായി സൂക്ഷിക്കുമെന്നാണ്​ ആദ്യ അവകാശവാദം. മെച്ചപ്പെട്ട ഇന്ധനക്ഷമതയും കൂടുതൽ കരുത്തും ഇതുമൂലം ലഭിക്കുമെന്നും പ്രചരണമുണ്ട്​. പ്രീമിയം ഡീസലി​െല ഇഞ്ചക്ഷൻ സ്റ്റെബിലൈസറുകൾ ഇന്ധനത്തിന്‍റെ ഓക്‌സിഡേഷൻ പ്രശ്‌നങ്ങൾ പരിഹരിക്കും. മറ്റൊരു മെച്ചം ഡെമൽസിഫയറുകൾ എന്നറിയപ്പെടുന്നഘടകങ്ങളുടെ സാന്നിധ്യമാണ്​. ജലത്തെ ഇന്ധനത്തിൽ നിന്ന് വേർതിരിക്കുന്ന ഇവ അനാവശ്യമായ ഈർപ്പം ഇന്ധന സംവിധാനത്തിലൂടെ കടന്നുപോകുന്നത് തടയും. ഇത്​ അടിക്കടി ഫിൽറ്റർ മാറ്റിവയ്​ക്കുന്നത്​ തടയാൻ സഹായിക്കുമെന്നും ഓയിൽ കമ്പനികൾ പറയുന്നു.

2.ജ്വലനത്തിന്​ സഹായിക്കും

പെട്രോളിനെ അപേക്ഷിച്ച്​ ഡീസലിനുള്ള പ്രശ്​നം കത്താനുള്ള അതിന്‍റെ ശേഷിക്കുറവാണ്​. പ്രത്യേക ഇഗ്​നിഷൻ സംവിധാനം ഉപയോഗിച്ചാണ്​ ഡീസലിൽ ഇഗ്​നിഷൻ നടക്കുന്നത്​. പ്രീമിയം ഡീസലിൽ ഉയർന്ന അവളിൽ സീറ്റെയിൻ ഉണ്ടാകും. മികച്ച ഇഗ്നിഷൻ നിലവാരം കാരണം ബാറ്ററിയുടേയും സ്റ്റാർട്ടറിന്‍റെയും ആയുസ്സ്​ വർധിക്കുകയും മാലിന്യം അടിഞ്ഞുകൂടുന്നത്​ തടയുകയും ചെയ്യും. പ്രീമിയം ഡീസലിലെ ലൂബ്രിക്കന്‍റുകൾ ഇന്ധന പമ്പിന്‍റെയും ഇഞ്ചക്ഷൻ ഘടകങ്ങളുടെയും ഘർഷണം കുറയ്ക്കുന്നു. സാധാരണ ഡീസലിനേക്കാൾ 10 മുതൽ 15 ശതമാനം വരെ ഘർഷണം കുറച്ച്​ ഇന്ധന പമ്പിനുൾപ്പടെ മികച്ച സംരക്ഷണം നൽകാൻ പ്രീമിയം ഡീസലിനാവുമെന്നാണ്​ പ്രധാന അവകാശവാദം​.

പ്രീമിയം പെട്രോൾ

സാധാരണ പെട്രോളിനെ അപേക്ഷിച്ച് പ്രീമിയം പെട്രോൾ വാഹനത്തിന്‍റെ മികച്ച പെർഫോമൻസും ഇന്ധനക്ഷമതയും വാഗ്ദാനം ചെയ്യുന്നുവെന്നാണ്​ ഇന്ധന നിർമാതാക്കൾ അവകാശപ്പെടുന്നത്​. പെട്രോളിന്‍റെ ഗ്രേഡുകളെ ഒക്​ടെയിൻ എന്ന പാരാമീറ്റർ കൊണ്ട് വേർതിരിച്ചിരിക്കുന്നു. ഇന്ത്യയിൽ വിൽക്കുന്ന സാധാരണ പെട്രോളിന്‍റെ ഒക്ടേൻ മൂല്യം 87 ആണ്​. പ്രീമിയം പെട്രോളിന് 91 ഒക്ടേൻ ഉണ്ട്. ജ്വലിക്കുന്നതിനുമുമ്പ് ഇന്ധനത്തിന് എത്രമാത്രം കംപ്രഷൻ നേരിടാൻ കഴിയും എന്നതാണ് ഒക്ടേൻ മൂല്യത്തിലൂടെ കണക്കാക്കുന്നത്​. ഉയർന്ന ഒക്ടേൻ ഇന്ധനം എളുപ്പത്തിൽ കത്തില്ല. എഞ്ചിനിൽ അസാധാരണമായും അസ്വസ്​ഥമായും ഇന്ധനം കത്തുന്നത്​ ഒഴിവാക്കാനും ഒക്​ടേൻ മൂല്യം വർധിച്ച പെട്രോളിനാകും.

ഉയർന്ന കംപ്രഷൻ എഞ്ചിനുകൾ ഉപയോഗിക്കുന്ന സ്​പോർട്​സ്​ കാറുകൾ ഇതുകൊണ്ടാണ് ഹൈ ഒക്​ടേൻ പെട്രോൾ ഉപയോഗിക്കുന്നത്​. പ്രീമിയം പെട്രോൾ ഉപയോഗിക്കുന്നത് ഇന്ധനക്ഷമത വർദ്ധിപ്പിക്കുമെന്ന് ഇന്ധന കമ്പനികൾ അവകാശപ്പെടുന്നുണ്ട്​. സമാന്യമായി ഇത്​ ശരിയാണെന്ന്​ പറയാം. കത്താനുള്ള ശേഷി പ്രീമിയം പെട്രോളിന്​ കുറവായതിനാൽ ഇന്ധനക്ഷമത അൽപ്പം വർധിക്കാനുള്ള സാധ്യതയുണ്ട്​. സാധാരണ പെട്രോളിനെ അപേക്ഷിച്ച് ഉയർന്ന ഒക്ടേൻ പെട്രോളിന്​ മലിനീകരണം കുറവാണ്. ചില ഇന്ധന നിർമ്മാതാക്കൾ പ്രീമിയം ഇന്ധനം മികച്ച പെർഫോമൻസും വാഗ്ദാനം ചെയ്യുന്നുണ്ട്​. ഇത് പ്രധാനമായും വാഹനത്തിലെ എഞ്ചിനെ ആശ്രയിച്ചാണിരിക്കുന്നത്​.

പ്രീമയം ഇന്ധനം വാങ്ങണോ വേണ്ടേ?

ഇനിയാണാ സുപ്രധാന ചോദ്യം വരുന്നത്​. നമ്മൾ പ്രീമിയം ഇന്ധങ്ങൾ ഉപയോഗിക്കണോ വേണ്ടേ? ഒറ്റ വാക്കിൽ ഉത്തരം പറയാവുന്ന ചോദ്യമല്ലിത്​. അതേപറ്റി നാം ആദ്യം അന്വേഷിക്കേണ്ടത്​ നാം ഉപയോഗിക്കുന്ന വാഹന നിർമാതാവിനോടാണ്​. കാരണം നമ്മുടെ വാഹനത്തിലെ എഞ്ചിൻ, ഫ്യൂവൽ സിസ്റ്റം തുടങ്ങിയവക്ക്​ ഇത്തരം ഇന്ധനങ്ങൾ അനുയോജ്യമാണോ എന്ന്​ അറിയേണ്ടതുണ്ട്​. വാഹനത്തിന്‍റെ മാനുവലിൽ ഇന്ധന​ത്തെപറ്റി സൂചിപ്പിച്ചിട്ടുണ്ടെങ്കിൽ അതിലേക്ക്​ പോകാവുന്നതാണ്​. ഇല്ലെങ്കിൽ സർവീസ്​ എക്​സ്​പർട്ടുകളോട്​ അന്വേഷിക്കാവുന്നതാണ്​. പ്രീമിയം പെട്രോൾ ഉപയോഗിക്കാൻ വാഹന നിർമ്മാതാവ് വ്യക്തമായി ശുപാർശ ചെയ്തിട്ടില്ലെങ്കിൽ അത്തരം ഇന്ധനം ഉപയോഗിക്കുന്നത് അധികം നേട്ടമുണ്ടാക്കില്ല.

എഞ്ചിന്‍റെ കംപ്രഷൻ റേറ്റും മറ്റും കൂടുതലാണെങ്കിൽ ഹൈ ഒക്​ടേൻ പെട്രോൾ പെട്രോൾ ഉപയോഗിക്കാവുന്നതാണ്​. ഇന്ത്യയിലെ ചില പ്രധാന കമ്പനികൾ പ്രീമിയം പെട്രോളും ഡീസലും ഉപയോഗിക്കുന്നതിനെ ശക്​തിയായി എതിർക്കുന്നുണ്ട്​. പ്രത്യേകിച്ചും പ്രീമിയം ഡീസൽ. കുറച്ച്​ ഡിറ്റർജന്‍റുകൾ തള്ളിയിട്ടുള്ള വേസ്റ്റ്​ എന്നാണ്​ ഇക്കൂട്ടർ ഇത്തരം ഡീസലിനെ വിളിക്കുന്നത്​. മാരുതി, നിസാൻ പോലുള്ള കമ്പനികൾ ഇത്തരത്തിലുള്ളതാണ്​. മാരുതിയുടെ ഇപ്പോൾ വിപണിയിൽ ഇല്ലാത്ത 1.3ലിറ്റർ മൾട്ടിജെറ്റ്​ എഞ്ചിനിൽ ഇത്തരം ഡീസൽ ഒഴിക്കുന്നതിനെ അവർ ശക്​തിയായി എതിർത്തിരുന്നു. നിസാന്‍റെ 1.5എൽ ഡി.സി.ഐ എഞ്ചിന്‍റെയും അവസ്​ഥ ഇതുതന്നെ. അതിനാൽ വാഹന നിർമാതാവിന്‍റെ ഇക്കാര്യത്തിലുള്ള അഭിപ്രായം സുപ്രധാനമാണ്​. പെട്രോളിന്‍റെ കാര്യത്തിലും ഈ നിയമം തന്നെയാണ്​ പിന്തുടരേണ്ടത്​. സാധാരണ വാഹനങ്ങൾക്ക്​ സാദാ പ്രെട്രോളും ഹൈ പെർഫോമൻസ്​ വാഹനങ്ങൾക്ക്​ ഹൈ ഒക്​ടേൻ പെട്രാളും എന്ന നിയമമാണ്​ നാം പിന്തുടരേണ്ടത്​.