ആപ്പിൾ സെൽഫ്​ ഡ്രൈവിങ്​ കാർ ഉടൻ വിപണിയിൽ? പ്രോജക്റ്റ് ടൈറ്റൻ ലക്ഷ്യത്തിലേക്ക്​

ടെക്​ ഭീമൻ ആപ്പിൾ നിർമിക്കുന്ന സ്വയം ഓടുന്ന കാർ 2024ൽ വിപണിയിൽ എത്തുമെന്ന്​ സൂചന. വർഷങ്ങളായി പ്രോജക്റ്റ് ടൈറ്റൻ എന്ന പേരിൽ മേഖലയിൽ ഗവേഷണം നടത്തുകയാണ്​ ആപ്പിൾ. നൂതന ഹെഡ്​ലൈറ്റുകൾ, ഓട്ടോമാറ്റിക് ഡ്രൈവിങ്​ സിസ്റ്റം, ഡിസ്പ്ലേ-ഇൻ-വിൻഡോകൾ തുടങ്ങി വാഹനവുമായി ബന്ധപ്പെട്ട സാങ്കേതിക വിദ്യകൾക്കായി നിരവധി പേറ്റന്‍റുകൾ ആപ്പിൾ എടുത്തിരുന്നു. 2024 മുതൽ ഉപയോക്താക്കൾക്കായി ആപ്പിൾ സെൽഫ്​ ഡ്രൈവിങ്​ വാഹനം നിർമിക്കാൻ തുടങ്ങുമെന്ന് റോയിട്ടേഴ്‌സ്​ റിപ്പോർട്ട് സൂചിപ്പിക്കുന്നു.

വിശ്വസനീയമായ ഉറവിടങ്ങൾ അനുസരിച്ച് 2014 മുതൽ ആപ്പിൾ പ്രോജക്റ്റ് ടൈറ്റനിൽ പ്രവർത്തിക്കുന്നുണ്ട്​. വിവിധ സവിശേഷതകളോടെയാണ് പുതിയ വാഹനം വരുന്നത്. പ്രധാനമായും ബാറ്ററികളിലാണ്​ പരിഷ്​കരണം വരിക. ബാറ്ററിയുടെ വില കുറയ്ക്കാനും വാഹനത്തിന്‍റെ പരിധി വർദ്ധിപ്പിക്കാനും കഴിയുന്ന വിപ്ലവകരമായ ബാറ്ററി ഡിസൈനാണ്​ വാഹനത്തിനെന്നാണ്​ സൂചന.

ആപ്പിൾ കാറിനൊപ്പം കമ്പനി തികച്ചും വ്യത്യസ്തമായൊരു വ്യവസായത്തിലേക്ക് പ്രവേശിക്കും. കുറഞ്ഞ സമയംകൊണ്ട്​ കാറുകൾ നിർമിക്കുന്നതിനും സുഗമമായ വിതരണ ശൃംഖല സൃഷ്ടിക്കുന്നതിനും പരിപാലിക്കുന്നതും ആപ്പിൾ പോലുള്ള കമ്പനിക്ക് കഴിയുമെന്നാണ്​ കരുതപ്പെടുന്നത്​. 'അതിനുള്ള വിഭവങ്ങളുള്ള ഒരു കമ്പനി ഈ ഗ്രഹത്തിൽ ഉണ്ടെങ്കിൽ അത് മിക്കവാറും ആപ്പിൾ ആയിരിക്കും. അതേസമയം ഇത് ഒരു സെൽഫോണല്ല' - പ്രോജക്ട് ടൈറ്റനിൽ പ്രവർത്തിച്ച ഒരാൾ റോയിട്ടേഴ്‌സിനോട് പറഞ്ഞു.

പുതുപുത്തൻ ബാറ്ററി

പുറത്തുവരുന്ന റിപ്പോർട്ടുകൾ അനുസരിച്ച് ആപ്പിൾ കാറിൽ അസാധാരണമായ 'മോണോസെൽ' ഡിസൈനുള്ള ബാറ്ററി അവതരിപ്പിക്കും. ഈ രൂപകൽപ്പന ബാറ്ററിയുടെ വ്യക്തിഗത സെല്ലുകളെ കുറച്ചുകൂടി വിപുലമാക്കുകയും ബാറ്ററി മെറ്റീരിയലുകൾ അടങ്ങിയ മൊഡ്യൂളുകളും പൗച്ചുകളും നീക്കംചെയ്യുകയും ബാറ്ററിയുടെ ഭാരം കുറക്കുകയും ചെയ്യും. ഇതോടൊപ്പം ഐഫോൺ നിർമ്മാതാവ് ബാറ്ററിയ്ക്കായി പുതിയ കെമിസ്ട്രിയും പരീക്ഷിക്കുന്നുണ്ട്​.

എൽ‌എഫ്‌പി എന്നാണിത്​ അറിയപ്പെടുന്നത്​. ലിഥിയം അയൺ ഫോസ്ഫേറ്റ് എന്നാണ്​ എൽഎഫ്​പിയുടെ പൂർണരൂപം. ഇത്തരം ബാറ്ററികൾ അമിതമായി ചൂടാകാനുള്ള സാധ്യത കുറവാണ്. നിലവിലെ ലിഥിയം അയൺ ബാറ്ററികളേക്കാൾ വളരെ സുരക്ഷിതവുമാണ്. ബാറ്ററിക്ക് പുറമേ ലിഡാർ സെൻസറുകൾ പോലെ തങ്ങളുടെ കാറിനായി മറ്റ് ഘടകങ്ങൾ നിർമ്മിക്കുന്നതിന്​ ആപ്പിൾ പങ്കാളികളെയും തിരയുന്നുണ്ട്​. ഈ സെൻസറുകൾ കാറിനെ അതിന്‍റെ ചുറ്റുപാടുകളുടെ ത്രിമാന കാഴ്ച നേടാനും സ്വയം നാവിഗേറ്റുചെയ്യാനും പ്രാപ്‌തമാക്കും.

നിലവിൽ ലഭ്യമാകുന്ന വിവരങ്ങൾ സത്യമാണെങ്കിൽ സമീപഭാവിയിൽ തന്നെ ആപ്പിൾ ഓ​ട്ടോണമസ്​ കാർ പുറത്തിറക്കുമെന്നുന്നാണ്​ വാഹനലോകത്തെ വിദഗ്​ധർ വിശ്വസിക്കുന്നത്​.