യാത്രകൾ ഇനി സാഹസികമാകും, ട്രയംഫ്​ ടൈഗർ 900 ജി.ടി സ്വന്തമാക്കി ഇന്ദ്രജിത്ത്​ സുകുമാരൻ

പ്രശസ്​ത ബ്രിട്ടീഷ്​ വാഹന നിർമാതാക്കളായ ട്രയംഫിന്‍റെ അഡ്വഞ്ചർ ബൈക്കായ ​ ടൈഗർ 900 ജി.ടി ഗ്യാരേജിലെത്തിച്ച്​ നടൻ ഇന്ദ്രജിത്ത്​ സുകുമാരൻ. കൊച്ചി ട്രയംഫ്​ ഷോറൂമിൽ നിന്നാണ്​ വാഹനം സ്വന്തമാക്കിയത്​. നടൻ തന്‍റെ സമൂഹമാധ്യമ അകൗണ്ടുകളിൽ വാഹനത്തിന്‍റെ ചിത്രങ്ങളും ഓടിച്ചുപോകുന്ന വീഡിയോയും പങ്കുവച്ചിട്ടുണ്ട്​. 13.7 ലക്ഷം രൂപയാണ്​ വാഹനത്തിന്‍റെ എക്​സ്​ഷോറൂം വില. അറിയപ്പെടുന്ന ഓഫ്​റോഡ്​ ബൈക്കുകിൽ ഒന്നാണ്​ ട്രയംഫ്​ ടൈഗർ 900 ജി.ടി. 888 സിസി എഞ്ചിൻ 95 എച്ച്പി കരുത്തും 87എൻ.എം ടോർക്കും​ ഉത്​പാദിപ്പിക്കും.

ട്രാക്ഷൻ കൺട്രോൾ, എബിഎസ് എന്നിവയുൾപ്പെടെ യാത്ര സുരക്ഷിതമാക്കും. 7.0 ഇഞ്ച് ടിഎഫ്ടി ഡിസ്പ്ലേയിൽ ബൈക്കിനെകുറിച്ചുള്ള വിവരങ്ങളെല്ലാം അറിയാനാകും. ബ്ലൂടൂത്ത് ഉപയോഗിച്ച് നിങ്ങളുടെ സംഗീതം, നാവിഗേഷൻ എന്നിവ ആസ്വദിക്കാനും ഡിസ്പ്ലേയിലൂടെ ഗോ പ്രൊ നിയന്ത്രിക്കാനും കഴിയും. ഏറ്റവും മോശമായ വഴിയിലൂടെയും ട്രയ​ംഫിനെ ഓടിക്കാൻ കഴിയുമെന്നതാണ്​ ഏറ്റവുംവലിയ പ്രത്യേകത. 19 ഇഞ്ച് അലോയ് വീലുകളാണ്​ വാഹനത്തിന്​. 180 മില്ലിമീറ്റർ ഗ്രൗണ്ട് ക്ലിയറൻസും ലഭ്യമാണ്.

മലയാള സിനിമയിലെ വാഹന കമ്പക്കാരിൽ ഒരാളാണ്​ ഇന്ദ്രജിത്ത്​. നേരത്തേ തന്നെ ഹാർലി ഡേവിഡ്​സൺ ഫാറ്റ്​ബോബ്​ പോലുള്ള ആഢംബര ബൈക്കുകൾ അദ്ദേഹം സ്വന്തമാക്കിയിട്ടുണ്ട്​. വോൾവോ എക്​സ്​.സി 90, ബിഎംഡബ്ള്യു ഫൈവ്​ സീരീസ് തുടങ്ങിയ വാഹനങ്ങളും ഇന്ദ്രജിത്ത്​ ഉപയോഗിക്കുന്നുണ്ട്​. നോയിഡയിലെ ബുദ്ധ്​ സർക്യൂട്ടിൽ ബിഎംഡബ്ള്യു എം ഡ്രൈവിലും പ​ങ്കെടുത്തിട്ടുണ്ട്​.