നിരത്തിൽ അഭ്യാസപ്രകടനം; 20 കുട്ടികളും മൂന്ന്​ രക്ഷാകർത്താക്കളും ഉൾപ്പടെ 23 പേർക്കെതിരേ കേസെടുത്തു

ജലന്ധർ: നിരത്തിൽ അഭ്യാസപ്രകടനം നടതതിയതിന്​ 20 കുട്ടികളും മൂന്ന്​ രക്ഷാകർത്താക്കളും ഉൾപ്പടെ 23 പേർക്കെതിരേ കേസെടുത്തു. ജലന്ധർ പൊലീസാണ്​ നിരത്തിലെ അതിക്രമങ്ങളുടെ പേരിൽ കേസെടുത്തത്​. ഓടിക്കൊണ്ടിരുന്ന എസ്‌.യു.വികൾക്ക് മുകളിലും വശങ്ങളിലും നിന്ന്​ യാത്രചെയ്​തെന്നാണ് പൊലീസ്​ എഫ്​.ഐ.ആറിൽ പറയുന്നത്​.​

വാഹന ഉടമകളായ ജലന്ധറിലെ ബാബ ദീപ് സിങ്​ നഗറിലെ താമസക്കാരനായ മൻവീർ സിങ്​, ജലന്ധറിലെ കഹൻപൂർ ഗ്രാമത്തിൽ താമസിക്കുന്ന ജതീന്ദർ കുമാർ, ജലന്ധറിലെ മൊഹല്ല കാരാർ ഖാൻ സ്വദേശി കാന്ത, പ്രായപൂർത്തിയാകാത്ത 15 മുതൽ 20 വരെ പ്രായപൂർത്തിയാകാത്ത ആൺകുട്ടികൾ എന്നിവർക്കെതിരെയാണ് എഫ്‌.ഐ.ആർ രജിസ്റ്റർ ചെയ്തിരിക്കുന്നത്.

വാഹനങ്ങൾ ഗുണ്ടാ ആക്രമണത്തിന്​ ഉപയോഗിച്ചിട്ടുണ്ടെന്നും മൂന്ന് വാഹനങ്ങൾ തിരിച്ചറിഞ്ഞിട്ടുണ്ടെന്നും നാലാമത്തെ വാഹനത്തിന്റെ പരിശോധന നടക്കുകയാണെന്നും പൊലീസ് പറഞ്ഞു. മൂന്ന് വാഹന ഉടമകളുടെ പേരുകൾ മാത്രമാണ് എഫ്‌.ഐ.ആറിൽ പരാമർശിച്ചിട്ടുള്ളത്. പ്രായപൂർത്തിയാകാത്തവർ വാഹനങ്ങൾ ഓടിക്കുകയും സ്റ്റണ്ട് അവതരിപ്പിക്കുകയും ചെയ്യുന്നത് നിലവിൽ ഗുരുതര കുറ്റകൃത്യമാണ്​.

‘റോഡുകളിൽ ഇത്തരം അതിക്രമങ്ങളും ശല്യങ്ങളും സൃഷ്ടിക്കുകയും ഗുണ്ടായിസത്തിൽ ഏർപ്പെടുകയും ചെയ്യുന്നവർക്കെതിരെ കർശന നടപടി സ്വീകരിക്കും. മാതാപിതാക്കൾ തങ്ങളുടെ കുട്ടികളെ നിരീക്ഷിക്കണം. പ്രത്യേകിച്ച് അശ്രദ്ധ, അപകടകരമായ ഡ്രൈവിങ്​ അല്ലെങ്കിൽ സ്റ്റണ്ടുകൾ എന്നിവയിൽ ഏർപ്പെടുന്നയിൽ നിന്ന്​ തടയണം’- ജലന്ധർ എഡിസിപി ആദിത്യ പറഞ്ഞു.