2035 മുതൽ ​ൈവദ്യുത കാറുകൾ മാത്രം വിറ്റാൽ മതി; കടുത്ത തീരുമാനവുമായി ഏഷ്യൻ രാജ്യം

ലോകം ഏറിയും കുറഞ്ഞും വൈദ്യുത വാഹനങ്ങളെ ആശ്ലേഷിക്കവേ കടുത്ത തീരുമാനവുമായി ഒരു ഏഷ്യൻ രാജ്യം രംഗത്ത്​. 2035ന്​ ശേഷം രാജ്യത്ത്​ വൈദ്യുത വാഹനങ്ങൾ മാത്രം വിറ്റാൽ മതിയെന്ന ദൃഡനിശ്​ചയത്തിലാണ്​ തായ്​ലൻഡ്​. മലിനീകരണ തോത്​ പൂജ്യത്തിലെത്തിക്കുക എന്നതാണ്​ ഇതിലൂടെ തായ്​ലൻഡ്​ ഭരണകൂടം ആഗ്രഹിക്കുന്നത്​. 2021 മുതൽ 2030വരെയുള്ള കാലയളവിൽ രാജ്യത്തെ വാഹന രജിസ്​ട്രേഷനിൽ 50 ശതമാനം വൈദ്യുത വാഹനങ്ങളാക്കുകയാണ്​ ആദ്യ ലക്ഷ്യം. 2035ൽ പൂർണമായും ഇ.വികൾ മാത്രമാവും രജിസ്റ്റർ ചെയ്യുക.

മലിനീകരണം കുറക്കുക എന്നതിനൊപ്പം വൈദ്യുത വാഹന നിർമാണത്തിന്‍റെ ഏഷ്യൻ ഹബ്ബായി മാറാനും പുതിയ നീക്കത്തിലൂടെ തായ്​ലൻഡ്​ ലക്ഷ്യംവയ്​ക്കുന്നുണ്ട്​. 850,000 തൊഴിലാളികൾ പണിയെടുക്കുന്ന വാഹന വ്യവസായമാണ്​ ഇപ്പോൾ തായ്​ലൻഡിലുള്ളത്​. സമ്പദ്‌വ്യവസ്ഥയിൽ 10 ശതമാനവും സംഭാവന ചെയ്യുന്നതും ഓ​ട്ടോ സെക്​ടറാണ്​. ഇവിടെ നിർമിക്കുന്ന കാറുകളിൽ പകുതിയോളം ഫിലിപ്പീൻസ്, ഇന്തോനേഷ്യ, മലേഷ്യ തുടങ്ങിയ സ്ഥലങ്ങളിലേക്ക് കയറ്റുമതി ചെയ്യുന്നുണ്ട്​. 'ലോകം വൈദ്യുത ഇന്ധനങ്ങളുടെ ദിശയിലേക്കാണ് നീങ്ങുന്നതെന്ന് നമുക്ക് കാണാൻ കഴിയും. അതിനാൽ ഞങ്ങൾക്ക്​ വേഗത്തിൽ നീങ്ങേണ്ടതുണ്ട്​'-തായ്​ലൻഡ്​ ഊർജ്ജ മന്ത്രാലയത്തിന്‍റെ ദേശീയ നയ സമിതിയുടെ ഉപദേഷ്ടാവ് കവിൻ തങ്‌സുപാനിച് പറയുന്നു. പരമ്പരാഗത വാഹനങ്ങൾ ഘട്ടംഘട്ടമായി നിർത്തുന്നതിന് നിശ്ചിത തീയതി പ്രഖ്യാപിച്ചതിനാൽ നിരവധി തുടർനടപടികൾ സർക്കാർ സ്വീകരിക്കേണ്ടതുണ്ട്​.

ഇവികൾ കൂടുതലായി നിർമിക്കുന്നതിന്​ അനുയോജ്യമായ അടിസ്ഥാന സൗര്യങ്ങൾ കെട്ടിപ്പടുക്കുകയാണ്​ ഇതിൽ പ്രധാനം. ബാറ്ററിയിൽ പ്രവർത്തിക്കുന്ന വാഹനങ്ങളിലേക്ക് മാറുന്നതിലൂടെ ലഭിക്കുന്ന നേട്ടങ്ങളെക്കുറിച്ച് ജനങ്ങളെ ബോധവാന്മാരാക്കുന്നതിന് വിവിധ പരിപാടികൾ സംഘടിപ്പിക്കാനാണ്​ തായ്​ലൻഡിന്‍റെ തീരുമാനം. 'ഇവി നയം സ്വാഭാവികമായും സംഭവിക്കാൻ ഞങ്ങൾ അനുവദിക്കുകയാണെങ്കിൽ, ഇതിന് വളരെയധികം സമയമെടുക്കും'- തായ്‌ലൻഡിലെ ഇലക്ട്രിക് വെഹിക്കിൾ അസോസിയേഷന്‍റെ ഓണററി ചെയർമാൻ യോസപോംഗ് ലോൺവൽ പറഞ്ഞു.

'ഒരു നിർമാതാവ് എന്ന നിലയിൽ, വ്യക്തമായ ലക്ഷ്യം വെക്കുന്നത് രാജ്യത്തെ നിക്ഷേപാന്തരീക്ഷം കൂടുതൽ ആകർഷകമാക്കുമെന്നുതന്നെയാണ്​ വിശ്വാസം'-അദ്ദേഹം പറഞ്ഞു. ഇലക്ട്രിക് വെഹിക്കിൾ അസോസിയേഷൻ ഓഫ് തായ്‌ലാൻഡിന്‍റെ കണക്കുകൾ പ്രകാരം നിലവിൽ തായ്‌ലൻഡിൽ ഒരു ശതമാനം ഇലക്ട്രിക് വാഹനങ്ങളാണുള്ളത്. 2020ൽ രാജ്യത്ത് ഇവി കാർ വിൽപ്പന 1.4 ശതമാനം ഉയരുകയും പരമ്പരാഗത വാഹന വിൽപ്പന 26 ശതമാനം ഇടിയുകയും ചെയ്​തിരുന്നു.