ഇത്​ അസാധാരണ ജനുസ്സ്​, വാനായി രൂപം മാറുന്ന കാനൂ ഇലക്​ട്രിക്​ ​ട്രക്​

ഇലക്​ട്രിക്​ പിക്കപ്പ്​ ട്രകുകളിൽ പുതിയ തരംഗംതീർത്ത് അമേരിക്കൻ സ്റ്റാർട്ടപ്പ്​​ കാനൂ. വാനായി രൂപം മാറ്റാവുന്ന ഇലക്​ട്രിക്​ ​ട്രകാണ്​ ലോസ്ഏഞ്ചൽസ് ആസ്ഥാനമായി പ്രവർത്തിക്കുന്ന കാനൂ നിർമിച്ചിരിക്കുന്നത്​. ജിഎംസി ഹമ്മർ ഇവി, ടെസ്​ല സൈബർട്രക്ക്, ഫോർഡ് എഫ് 150 ബിഇവി, റിവിയൻ ആർ 1 ടി, ലോർഡ്സ്റ്റൗൺ എൻ‌ഡുറൻസ്, ഷെവർലെ ഇവി പിക്കപ്പ് തുടങ്ങിയ മോഡലുകളുമായിട്ടായിരിക്കും കാനൂ മത്സരിക്കുക.

കാനൂ സ്വന്തമായി വികസിപ്പിച്ച പ്ലാറ്റ്​ഫോമിൽ നിർമിച്ച ഇലക്ട്രിക് പിക്കപ്പ് ട്രക്കിന്‍റെ സവിശേഷത അതിന്‍റെ രൂപവും പ്രായോഗികതയുമാണ്​. വിവിധ രീതികളിൽ ക്രമീകരിക്കാവുന്ന കിടക്കയും വാഹനത്തിലുണ്ട്​. അതിന്‍റെ നീളം ആറ് മുതൽ എട്ട് അടിവരെ വർധിപ്പിക്കാനാകും. ക്യാമ്പർ വാനായും മോഡുലാർ രൂപത്തിലും വാഹനം എളുപ്പത്തിൽ ഉപയോഗിക്കാം എന്നതും പ്രത്യേകതയാണ്​.

ഹെഡ്‌ലാമ്പുകളും ടെയിൽ‌ലൈറ്റുകളുമെല്ലാം എൽ.‌ഇ.ഡിയിലാണ്​ തീർത്തിരിക്കുന്നത്​. ടെയിൽ‌ഗേറ്റ് തുറന്നതിനുശേഷം ടെയിൽ‌ ലൈറ്റുകൾ‌ ദൃശ്യമാകാത്തതിനാൽ‌ കാനൂ ടെയിൽ‌ഗേറ്റിന്‍റെ അരികുകളിൽ‌ ഒരു നേർത്ത ലംബ എൽ‌ഇഡി സ്ട്രിപ്പ് ഉൾപ്പെടുത്തിയിട്ടുണ്ട്​. ഇവിയുടെ ക്യാബിന് നിരവധി സവിശേഷതകൾ ലഭിക്കുന്നുണ്ട്​. വർക്ക്ടേബിൾ, മേൽക്കൂരയിൽ റാക്ക്, കൂടാരമാക്കി മാറ്റാവുന്ന ക്യാമ്പർ ടെന്‍റും വാഹനം വാഗ്​ദാനം ചെയ്യുന്നു.

ഉപകരണങ്ങൾ ചാർജ് ചെയ്യാൻ, എളുപ്പത്തിൽ ആക്‌സസ് ചെയ്യാവുന്ന നിരവധി പവർ ഔട്ട്‌ലെറ്റുകളുണ്ട്. കാനൂ ഇലക്ട്രിക് പിക്കപ്പ് ട്രക്കിന് കരുത്തുപകരുന്നത്​ ഇരട്ട മോട്ടോറുകളാണ്​. 600 എച്ച്പി കരുത്തും 746 എൻഎം ടോർക്കും ഇലക്​ട്രിക്​ മോ​ട്ടോറുകൾ ഉത്പാദിപ്പിക്കും. 322 കിലോമീറ്റർ ദൂരം ഒറ്റ ചാർജിൽ സഞ്ചരിക്കും. വാഹനത്തിന്‍റെ പരമാവധി പേലോഡ് ശേഷി 816 കിലോഗ്രാം ആണ്.