ഇന്നോവ ഹൈക്രോസ് രഹസ്യമായി​ തിരിച്ചുവിളിക്കുന്നോ?; വാഹന ഉടമകൾക്കിടയിൽ കിംവദന്തികൾ സജീവം

ഇന്നോവയുടെ ഹൈബ്രിഡ്​ എസ്​.യു.വിയെച്ചൊല്ലി വാഹനപ്രേമികൾക്കിടയിൽ കിംവദന്തികൾ പ്രചരിക്കുന്നു. ഇന്നോവ ഹൈക്രോസ് രഹസ്യമായി കമ്പനി തിരിച്ചുവിളിക്കുന്നു എന്നാണ്​ പ്രചരണം. പീപ്പിൾസ്​ ​കാർ പോർട്ടലായ ടീം ബി.എച്ച്​.പി ആണ്​ വാർത്ത ആദ്യമായി പങ്കുവച്ചത്​. ടൊയോട്ടയിൽനിന്ന്​ ഔ​ദ്യോഗിക സ്ഥിരീകരണമൊന്നും ഇതിന്​ ലഭിച്ചിട്ടില്ല.

ഹൈക്രോസിന്റെ ഹൈബ്രിഡ്, നോൺ-ഹൈബ്രിഡ് വകഭേദങ്ങളിൽ ഫ്യുവൽ ടാങ്കിൽ തകരാറുണ്ടെന്ന്​ കണ്ടെത്തിയിരിക്കുന്നെന്നാണ്​ റിപ്പോർട്ട്​. പ്രശ്നം ബാധിച്ച യൂനിറ്റുകളുടെ കൃത്യമായ എണ്ണം പുറത്തുവന്നിട്ടില്ല. തകരാർ സംഭവിക്കാൻ സാധ്യതയുള്ള മോഡലുകളുടെ ഉടമകളെ കമ്പനി നേരിട്ട് ബന്ധപ്പെടുന്നുണ്ടെന്നും റിപ്പോർട്ടുകൾ പറയുന്നു.

ഇന്നോവ ഹൈക്രോസ്​ ഉടമ ടീം ബി.എച്ച്​.പിയോട്​ വെളിപ്പെടുത്തിയത് അനുസരിച്ച് അദ്ദേഹത്തെ​ കമ്പനി നേരിട്ട്​ ബന്ധപ്പെടുകയായിരുന്നു. തുടർന്ന്​ വാഹനം സർവ്വീസ്​ സെന്‍ററിൽ എത്തിക്കുകയും വാഹനത്തിന്റെ ഫ്യൂവൽ ട്യൂബ് സെറ്റ്, ഗാസ്കറ്റ്​, ഫ്യുവൽ ടാങ്ക് കുഷ്യൻ ഉൾപ്പെടെ മുഴുവൻ ഫ്യുവൽ ടാങ്ക് അസംബ്ലിയും മാറ്റിനൽകുകയും ചെയ്തു. ഇതു മുഴുവൻ വാറണ്ടി പ്രകാരം ഫ്രീയായാണ് ടൊയോട്ട പരിഹരിച്ച് തന്നത് എന്നതും ഉടമ പറയുന്നു.

കമ്പനിയുടെ ഔദ്യോഗിക വെബ്‌സൈറ്റിൽ വി.ഐ.എൻ ചെക്കർ ഉപയോഗിച്ച് കാറിന്​ തകരാറുണ്ടോ എന്ന്​ പരിശോധിക്കാനാകും എന്നും റിപ്പോർട്ടുകളുണ്ട്​. വെബ്‌സൈറ്റിൽ ഉപഭോക്താക്കൾ അവരുടെ വെഹിക്കിൾ ഐഡന്റിഫിക്കേഷൻ നമ്പർ (VIN) നൽകി പരിശോധിച്ചാൽ മതിയാവും. ഈ തിരിച്ചുവിളിക്കൽ ടൊയോട്ട ഇന്നോവ ഹൈക്രോസിൽ മാത്രമായി പരിമിതപ്പെടുത്തിയിട്ടുണ്ടോ അതോ മാരുതി സുസുകി ഇൻവിക്റ്റോയെയും ബാധിക്കുമോ എന്നും വ്യക്തമാക്കിയിട്ടില്ല.