പോകുന്നിടത്തെല്ലാം കൂടെകൊണ്ടുപോകാവുന്ന വീട്​​, ഇതാണ്​ ഐകിയ ട്രെയിലർ ഹോം

ജനപ്രിയ സ്വീഡിഷ്​ ഫർണിച്ചർ ബ്രാൻഡായ ഐകിയ ട്രെയിലർ ഹോം നിർമിക്കുന്നു. 187 ചതുരശ്രയടി വിസ്തീർണമുള്ള വീടുകളുമായാണ്​ ഐകിയ വിപണിയിൽ എത്തുന്നത്​. മീഡിയ കമ്പനിയായ വോക്സ് ക്രിയേറ്റീവ്, വിസ്കോസിൻ ആസ്ഥാനമായുള്ള ആർ‌വി ബിൽഡർ എസ്‌കേപ്പ് എന്നിവയുമായി കൈകോർത്താണ്​ ചലിക്കുന്ന വീടുകൾ നിർമിക്കുന്നത്​. ചക്രങ്ങൾ ഘടിപ്പിച്ച ഫ്ലാറ്റ്​ പ്ലാറ്റ്​ഫോമിൽ നിർമിച്ചിരിക്കുന്ന വീട്​ പിക്കപ്പുകളിലോ ട്രക്കുകളിലോ കെട്ടിവലിച്ച്​ കൊണ്ടുപോകാവുന്നതാണ്​.

ഒരു വീട്ടിൽ ആവശ്യമായ എല്ലാ സൗകര്യങ്ങളും ഈ ചെറിയ ഫ്ലാറ്റ്ബെഡ് ട്രെയിലർ ഹോമുകളിലുണ്ട്​. നമ്മുക്ക്​ ഇഷ്​ടമുള്ള ഇടങ്ങളിൽ പാർക്ക്​ ചെയ്യാവുന്ന വാഹനത്തിൽ വെള്ളവും സൗരോർജ്ജവും ഉള്ളതിനാൽ ഉപഭോക്താവിന് ഒന്നിനും ബാഹ്യ പിന്തുണയെ ആശ്രയിക്കേണ്ടിവരില്ല. ഐകിയ ബോഹോ എക്സ്.എൽ മോഡലിന് 47,500 ഡോളർ(34,61,327.38 ലക്ഷം രൂപ) വില നിശ്ചയിച്ചിട്ടുണ്ട്, ഇ​തോടൊപ്പം നമ്മുക്ക്​ ആവശ്യമുള്ള തരത്തിൽ വേണ്ട കൂട്ടിച്ചേർക്കലുകൾ വരുത്താനും സാധിക്കും. ചെറിയ വീടിനെ മൾട്ടിഫങ്ഷണൽ ആക്കുന്നതിന്​ ആധുനിക സ​ങ്കേതങ്ങളാണ്​ ഐകിയ ഉപയോഗിച്ചിരിക്കുന്നത്​.

ചെറിയ വീടിനുള്ളിലെ മുഴുവൻ സ്ഥലവും വളരെ കാര്യക്ഷമമായാണ് രൂപകൽപ്പന ചെയ്തിരിക്കുന്നത്. മടക്കിവയ്​ക്കാവുന്ന കിങ്​ സൈസ്​ ബെഡിന്​​ താളെ ധാരാളം സംഭരണ ഇടങ്ങളും ക്രമീകരിച്ചിട്ടുണ്ട്​. അടുക്കള ബാത്ത്​റൂം തുടങ്ങി ഒരു വീട്ടിൽവേണ്ട സൗകര്യങ്ങളും ഒരുക്കിയിട്ടുണ്ട്​. 'ഒരു ചക്രത്തിന് ചുറ്റും നിങ്ങൾ എങ്ങനെ രൂപകൽപ്പന ചെയ്യുന്നു എന്നത്​ വളരെപ്രധാനമാണ്​. പുനരുൽപ്പാദിപ്പിക്കാവുന്നതും പുനരുപയോഗിക്കാവുന്നതുമായ വസ്തുക്കൾ സാധ്യമാകുമ്പോൾ സ്ഥലം പ്രവർത്തനക്ഷമവും മനോഹരവുമാകുക്കുന്നു'- ഐകിയ സീനിയർ ഇന്‍റീരിയർ ഡിസൈനർ ആബി സ്റ്റാർക്ക് പറഞ്ഞു

വീടുകളുടെ സുഖസൗകര്യങ്ങളിൽ യാത്ര ചെയ്യാൻ ഇഷ്ടപ്പെടുന്ന ആളുകൾക്കിടയിൽ ഫ്ലാറ്റ്ബെഡ് ട്രെയിലർ ഹോംസ് ആശയം വളരെ ജനപ്രിയമാണ്. ഹൈദരാബാദ്, മുംബൈ, പുനെ, അഹമ്മദാബാദ്, സൂററ്റ്, വഡോദര എന്നീ നഗരങ്ങളിൽ നിലവിൽ ഐകിയക്ക്​ ഓൺലൈൻ വിതരണം ഉണ്ട്​.