സ്വർണ ചിറകുള്ള ബൈക്ക്​; ഗോൾഡ്​വിങ്​ ഇന്ത്യൻ നിരത്തുകൾക്കായി​ തയ്യാറെന്ന്​ ഹോണ്ട

2021 ഗോൾഡ് വിങ്​ പ്രീമിയം മോട്ടോർസൈക്കിൾ രാജ്യത്ത്​ ഉടൻ വിപണിയിലെത്തുമെന്ന് ഹോണ്ട. ബിഎസ് 6 നിരയിലേക്ക്​ പരിഷ്​കരിച്ച വാഹനം ഇതിനകം വിദേശ വിപണികളിൽ വിൽപ്പനയ്‌ക്കെത്തിയിരുന്നു. ഹോണ്ടയുടെ ഏറ്റവും മികച്ച ടൂറിങ്​ ബൈക്കായാണ്​ ഗോൾഡ്​വിങ്​ കണക്കാക്കുന്നത്​. അന്താരാഷ്​ട്ര വിപണിയിൽ വിൽക്കുന്ന അതേ മോഡൽ തന്നെയാണ്​ ഇന്ത്യക്കായും ഒരുക്കിയിരിക്കുന്നത്​. ആഡംബര തികവാർന്ന വാഹനമാണ്​​ ഗോൾഡ്​വിങ്​​. ഏഴ് ഇഞ്ച് ടിഎഫ്​ടി സ്ക്രീൻ, ആപ്പിൾ കാർപ്ലേ/ആൻഡ്രോയിഡ് ഓട്ടോ കണക്റ്റിവിറ്റി എന്നിവയൊക്കെയുള്ള ബൈക്കാണിത്​. പുതിയ ഗോൾഡ് വിങിന് ഏകദേശം 30 ലക്ഷം രൂപ (എക്സ്-ഷോറൂം) വില വരുമെന്നാണ്​ പ്രതീക്ഷിക്കപ്പെടുന്നത്​.

അപ്‌ഗ്രേഡ് ചെയ്​ത ഓഡിയോ സ്പീക്കർ സിസ്റ്റം, നാവിഗേഷൻ എന്നിവ പുതുതായി ഉൾപ്പെടുത്തിയിട്ടുണ്ട്​. ഗോൾഡ്​ വിങി​െൻറ മറ്റൊരു പ്രത്യേകത ഇലക്​ട്രോണിക്​ ആയി നിയന്ത്രിക്കാവുന്ന വിൻഡ്​ സ്​ക്രീൻആണ്​. ഇവ ആവശ്യമുള്ളപ്പോൾ മാത്രം ഉയർത്തിവയ്​ക്കാനാവും. സ്​മാർട്ട് കീ, നാല് റൈഡിങ്​ മോഡുകൾ (ടൂർ, സ്‌പോർട്ട്, ഇക്കോൺ, റെയിൻ), ഹിൽ സ്റ്റാർട്ട് അസിസ്റ്റ് എന്നിവയും ലഭിക്കും. എബി‌എസ്, ഡ്യുവൽ കമ്പയിൻഡ് ബ്രേക്ക് സിസ്റ്റം, ഐഡ്‌ലിങ്​ സ്റ്റോപ്പ് (ഡിസിടി വേരിയൻറിൽ മാത്രം) എന്നിവ ബൈക്കി​െൻറ മറ്റ് ഇലക്ട്രോണിക് സവിശേഷതകളാണ്. 1,833 സിസി ഫ്ലാറ്റ് 6, ലിക്വിഡ്-കൂൾഡ് മോട്ടോറാണ്​ ഗോൾഡ്​ വിങിന്​ കരുത്തുപകരുന്നത്​. 5,500 ആർപിഎമ്മിൽ 124.7 ബിഎച്ച്പി കരുത്തും 4,500 ആർപിഎമ്മിൽ 170 എൻഎം ടോർക്കും എഞ്ചിൻ ഉത്​പ്പാദിപ്പിക്കും.

ആറ് സ്പീഡ് മാനുവലും ഏഴ് സ്പീഡ് ഡിസിടി ഗിയർബോക്സും ബൈക്കിലെ ട്രാൻസ്​മിഷൻ ഓപ്ഷനുകളിൽ ഉൾപ്പെടുന്നു. കൂടാതെ, മാനുവൽ ട്രാൻസ്മിഷൻ വേരിയന്റിൽ ഒരു സ്ലിപ്പർ ക്ലച്ച്​ അസിസ്റ്റും കമ്പനി ചേർത്തിട്ടുണ്ട്​. 2018 ൽ, ബൈക്കിന് ഇരട്ട-വിഷ്​ബോൺ ഫ്രണ്ട് സസ്‌പെൻഷൻ സജ്ജീകരണം ഉൾപ്പെടെ ചില പ്രധാന അപ്‌ഡേറ്റുകൾ ലഭിച്ചിരുന്നു. ഇതുകൂടാതെ, പിൻവശത്ത് ഒരു പ്രോ ലിങ്ക് സിസ്റ്റവും ഉൾ​െപ്പടുത്തിയിട്ടുണ്ട്.​ ബ്രേക്കിങിനായി, മുൻവശത്ത് ആറ് പിസ്റ്റൺ കാലിപ്പറുകളുള്ള ഇരട്ട 320 എംഎം ഡിസ്കും മൂന്ന് പിസ്റ്റൺ കാലിപറുള്ള പിൻ സിംഗിൾ 316 എംഎം റോട്ടറും ഉപയോഗിക്കുന്നു.