80 മോഡൽ റോൾസിൽ കറങ്ങി മഹി ഭായ്​; വിഡിയോ വൈറൽ

ക്രിക്കറ്റിനോട് എന്നപോലെ വിന്റേജ് വാഹനങ്ങളോടും പ്രത്യേക കമ്പമുള്ളയാളാണ് എം.എംസ്. ധോണി. അടുത്തിടെ ധോണിയുടെ വാഹന ശേഖരം കണ്ട ഇന്ത്യന്‍ താരം വെങ്കിടേഷ് പ്രസാദ് പോലും ഞെട്ടിയിരുന്നു. സ്​പോർട്​സ്​ ബൈക്കുകളാണ് ആരാധകരുടെ മഹി ഭായ്ക്ക്​ ഏറെ പ്രിയമെങ്കിലും വിന്റേജ് കാറുകളുടെ വലിയ ശേഖരവും താരത്തിന്റെ പക്കലുണ്ട്. അന്താരാഷ്ട്ര ക്രിക്കറ്റിൽ നിന്നും വിരമിച്ചതിനു ശേഷം കുടുംബത്തോടൊപ്പം റാഞ്ചിയിലെ ഫാം ഹൗസിൽ താമസിക്കുന്ന ധോണി അവിടെത്തന്നെ തന്‍റെ വാഹനങ്ങൾക്കായി വലിയ ഗരാജും നിർമിച്ചിട്ടുണ്ട്​.

തന്റെ സൂപ്പര്‍ ബൈക്കുകളുമായി റാഞ്ചിയിലെ നിരത്തുകളിലൂടെ പോവുന്ന ധോണി ഒരു സ്ഥിരം കാഴ്ച്ചയാണ്. എന്നാൽ ഇപ്പോൾ വൈറലായിരിക്കുന്നത്​ ഒരു വിന്‍റേജ്​ കാറിൽ കുതിക്കുന്ന ധോണിയുടെ വിഡിയോയാണ്​. 1980 മോഡല്‍ റോള്‍സ് റോയ്സ് കാറാണ് ഇങ്ങിനെ വൈറലായിരിക്കുന്നത്​.

ഇന്ത്യയിൽ അപൂർവമായ റോൾസ് റോയ്‌സിന്റെ 1980 മോഡൽ സിൽവർ റെയ്ത്​ II ആണ്​ ധോണി ഓടിക്കുന്നത്​. ക്ലാസിക് കാറുകളിൽ ഒന്നാണെന്ന് വിളിച്ചുപറയുന്ന രൂപമാണ് ഇതിന്റെ ഏറ്റവും വലിയ പ്രത്യേകത. ഡ്യുവൽ-ടോൺ ബ്ലൂ-ബ്ലാക്ക് നിറത്തിൽ ഒരുങ്ങിയിരിക്കുന്ന ഈ രാജകീയ സെഡാൻ സ്റ്റോക്ക് കണ്ടീഷനിൽ അതേപടി നിലനിർത്താനും ധോണി ശ്രദ്ധിച്ചിട്ടുണ്ട്. 1976-ൽ പുറത്തിറങ്ങിയ ഈ മോഡൽ വിപണിയിലും ഹിറ്റായിരുന്നു.

View this post on Instagram

A post shared by subodh singh Kushwaha (@kushmahi7)

ലോംഗ്-വീൽബേസിലുള്ള ലക്ഷ്വറി സെഡാൻ 1980 വരെയാണ് നിർമാണത്തിലുണ്ടായിരുന്നത്. റോൾസ്കൂടാതെ ലാൻഡ് റോവർ ഡിഫെൻഡർ 110, 1971 ലെ ലാൻഡ് റോവർ സീരീസ് 3 സ്റ്റേഷൻ വാഗൺ, പോണ്ടിയാക് ഫയർബേർഡ്, നിസ്സാൻ ജോംഗ, ട്രാൻസ്‌ആം പോലുള്ള വിന്റേജ് കാറുകളുടെ അപൂർവ ശേഖരവും ധോണിയുടെ പക്കലുണ്ട്​.

ജീപ്പ് ഗ്രാൻഡ് ചെറോക്കി ട്രാക്ക്ഹോക്കാണ് ഇതിലെ കണ്ണഞ്ചിപ്പിക്കുന്ന മോഡൽ. ഇന്ത്യയിലെ ഒരേയൊരു മോഡലാണിതെന്നതാണ് ശ്രദ്ധേയമാക്കുന്നത്. ഈ പവർഫുൾ എസ്‌യുവിയിൽ 6.2 ലിറ്റർ ഹെൽകാറ്റ് എഞ്ചിനാണ് പ്രവർത്തിക്കുന്നത്.