വാഹന മേഖലയിലെ പ്രതിസന്ധി: തൊഴിൽ നഷ്​ടമായത്​ മൂന്നര ലക്ഷം പേർക്ക്​

ന്യൂഡൽഹി: ഇന്ത്യയിലെ ഓ​ട്ടോമൊബൈൽ സെക്​ടറിൽ തുടരുന്ന പ്രതിസന്ധി മൂലം ഇതുവരെ തൊഴിൽ നഷ്​ടമായത്​ മൂന്നര ലക്ഷം പേർക്കെന്ന്​ റിപ്പോർട്ട്​. വിൽപന ഇടിഞ്ഞതോടെ നിർമാണശാലകൾ താൽക്കാലികമായി അടച്ചിടാൻ വാഹന നിർമാതാക്കൾ നിർബന്ധിതരായിരുന്നു. ഇത്​ തൊഴിൽ നഷ്​ടത്തിനിടയാക്കി.

ഇരുചക്ര നിർമാതാക്കളും കാർ നിർമാതാക്കളും ചേർന്ന്​ ഏകദേശം 15,000 പേരെയാണ്​ പിരിച്ച്​ വിട്ടതെന്ന റിപ്പോർട്ടുകൾ നേരത്തെ പുറത്ത്​ വന്നിരുന്നു. ഇതിന്​ പുറമേ വാഹന ഘടകങ്ങൾ നിർമിക്കുന്ന കമ്പനികൾ ഏകദേശം ഒരു ലക്ഷം പേരെയും ഒഴിവാക്കിയിരുന്നു. എന്നാൽ, ഈ കണക്കുകൾക്ക്​ അപ്പുറത്തുള്ള തൊഴിൽ നഷ്​ടം ഉണ്ടായിട്ടുണ്ടെന്നാണ്​ റിപ്പോർട്ട്​.

മേഖലയിലെ പ്രതിസന്ധി പരിഹരിക്കാൻ നികുതിയിളവ്​ നൽകണമെന്നാണ്​ വാഹനനിർമാതാക്കളുടെ പ്രധാന ആവശ്യം. ഇതിന്​ പുറമേ ഉപഭോക്​താക്കൾക്കും ഡീലർമാർക്കും കൂടുതൽ വായ്​പ ലഭ്യമാക്കണമെന്നും ആവശ്യമുയരുന്നുണ്ട്​. അതേസമയം, റിസർവ്​ ബാങ്ക്​ വായ്​പ പലിശ നിരക്കുകൾ കുറച്ചത്​ ഓ​ട്ടോമൊബൈൽ സെക്​ടറിന്​ ഗുണകരമാവുമെന്നാണ്​ പ്രതീക്ഷ.