ഐ.സി.എ അനുമതിയില്ലാതെ എത്തിയ 22 യാത്രക്കാരെ തിരിച്ചയച്ചു

ദുബൈ: യു.എ.ഇ ഫെഡറൽ അതോറിറ്റി (ഐ.സി.എ) അനുമതിയില്ലാതെ എത്തിയ 22 പേരെ അബൂദബി, ഷാർജ വിമാനത്താവളങ്ങളിൽനിന്ന്​ തിരിച്ചയച്ചു. കൊച്ചിയിൽ നിന്നെത്തിയ നാലു​​ മലയാളികൾ അബൂദബി വിമാനത്താവളത്തിലും ലഖ്​​നോവിൽ നിന്നെത്തിയ 18 ഉത്തർപ്രദേശ്​ സ്വദേശികൾ ഷാർജയിലുമാണ്​ കുടുങ്ങിയത്​. അബൂദബിയിലെത്തിയ മലയാളികളെ 60 മണിക്കൂറിനുശേഷം ദുബൈ വിമാനത്താവളം വഴിയാണ്​ യാത്രയാക്കിയത്​. റെസിഡൻറ്​ വിസക്കാർക്ക്​ യു.എ.ഇയിലേക്ക്​ യാത്ര ചെയ്യാൻ ഐ.സി.എ അനുമതി ആവശ്യമില്ലെന്ന്​ വാർത്തകൾ വന്നിരുന്നു. എയർ ഇന്ത്യ എക്​സ്​പ്രസ്​ ഉൾപ്പെടെ എയർലൈൻ കമ്പനികൾ ഇക്കാര്യം സ്ഥിരീകരിക്കുകയും ചെയ്​തിരുന്നു.

ഇതി​ൻെറ അടിസ്ഥാനത്തിലാണ്​ അനുമതി തേടാതെ യാത്രക്കാർ യു.എ.ഇയിലേക്ക്​ തിരിച്ചത്​. ശനിയാഴ്ച പുലർച്ച 4.30ന്​ കൊച്ചിയിൽനിന്നു പുറപ്പെട്ട ഇത്തിഹാദ് വിമാനത്തിലാണ്​ മലയാളികളായ ബാബു, രമേശ് കുന്നംകുളം, മിഥുൻ, സാലിഹ് ചങ്ങരംകുളം, അബൂബക്കർ എന്നിവർ എത്തിയത്​. ഇതിൽ അബൂബക്കറിന്​ പുറത്തിറങ്ങാൻ അനുമതി ലഭിച്ചു. ബാക്കിയുള്ളവരെ തിങ്കളാഴ്​ച രാത്രി നാട്ടിലേക്ക്​ തിരിച്ചയക്കുമെന്നാണ്​ അറിയിച്ചിരുന്നത്​. എന്നാൽ, തിങ്കളാഴ്ച പകൽ മുഴുവൻ ഇവർ പുറത്തിറങ്ങാനുള്ള ശ്രമംനടത്തിയെങ്കിലും വിഫലമായി. അബൂദബിയിൽനിന്ന്​ കേരളത്തിലേക്ക്​ വിമാനമില്ലാത്തതിനാൽ ദുബൈയിൽനിന്ന്​ രാത്രിയാണ്​​ മടക്കയാത്രയൊരുക്കിയത്​.

ടിക്കറ്റ്​ ചെലവ്​ ഇത്തിഹാദ്​ എയർവേസ്​ നൽകി. കറാച്ചിയിൽ നിന്നെത്തിയ പാകിസ്​താൻ സ്വദേശികളെയും തിരിച്ചയച്ചതായി ഇവർ പറഞ്ഞു. തിങ്കളാഴ്​ച പുലർച്ച ഒരു മണിക്കാണ്​ ലഖ്​​നോ സ്വദേശികളായ തൊഴിലാളികൾ ഷാർജ വിമാനത്താവളത്തിൽ എത്തിയത്​. തിങ്കളാഴ്​ച വൈകീ​ട്ടോടെ ഇവരെ തിരിച്ചയച്ചു. അതേസമയം, സാ​ങ്കേതിക പിഴവുമൂലം ബംഗ്ലാദേശിൽ നിന്നെത്തിയ 127 തൊഴിലാളികളെയും അബൂദബി വിമാനത്താവളത്തിൽനിന്ന്​ മടക്കി. ഇവർക്ക്​ അടുത്ത ദിവസംതന്നെ തിരിച്ചുവരാൻ അവസരം നൽകുമെന്ന്​ അധികൃതർ അറിയിച്ചു.