ലക്ഷദ്വീപ്​ കലക്​ടർക്കെതിരെ പ്രതിഷേധം: കിൽത്താനിൽ 12 പേർ അറസ്റ്റിൽ

കവരത്തി: ലക്ഷദ്വീപ്​ കലക്​ടർ അസ്​ഗർ അലി​ക്കെതിരെ പ്രതിഷേധിച്ചവർക്കുനേരെ നടപടിയുമായി അധികൃതർ. കിൽത്താൻ ദ്വീപിൽ 12 പേരെ അറസ്റ്റ്​ ചെയ്​തു. കോൺഗ്രസ്​ കിൽത്താൻ ഘടകം പ്രസിഡന്‍റ്​ റഹ്​മത്തുള്ളയടക്കമുള്ളവരെയാണ്​ അറസ്റ്റ്​ ചെയ്​തത്​.

എറണാകുളത്ത്​ നടന്ന വാർത്താസമ്മേളനത്തിൽ കലക്​ടർ അസ്​ഗർ അലി വ്യാജ പ്രസ്​താവനകൾ നടത്തിയെന്നാരോപിച്ച്​ ലക്ഷദ്വീപിൽ വ്യാപക പ്ര​തിഷേധം ഉയർന്നിരുന്നു. കിൽത്താൻ ദ്വീപിൽ പ്രതിഷേധക്കാർ കലക്​ടറുടെ കോലവും കത്തിച്ചു. കിൽത്താൻ ദ്വീപിൽ മയക്കുമരുന്ന്​ കേസുകൾ വർധിക്കുന്നുവെന്നാണ്​​ കലക്​ടർ പറഞ്ഞത്​. ഇത്​ കൂടാതെ മറ്റു ദ്വീപുകളിലെ വീടുകളിൽ മെഴുതിരി കത്തിച്ചും സമൂഹമാധ്യമങ്ങളിലൂടെയും കലക്​ടർക്കെതിരെ പ്രതിഷേധമിരമ്പി.

കലക്​ടർക്കെതിരെ ലക്ഷദ്വീപ്​ എം.പി മുഹമ്മദ്​ ഫൈസലും രംഗത്തുവന്നിരുന്നു. അഡ്മിനിസ്ട്രേറ്റർ പ്രഫുൽ ഖോദ പട്ടേലിെൻറ ജനവിരുദ്ധ നയങ്ങൾ ന്യായീകരിച്ച് കലക്ടർ പറഞ്ഞ വാദങ്ങൾ പരസ്പരവിരുദ്ധമെന്നാണ്​ എം.പി കുറ്റപ്പെടുത്തിയത്​. നിലവിലെ നിയമങ്ങൾവെച്ച് നേരിടാൻ കഴിയുന്നതിൽ കൂടുതൽ എന്ത് കുറ്റകൃത്യമാണ് ലക്ഷദ്വീപിലുള്ളതെന്നും അദ്ദേഹം ചോദിച്ചു.