ഒരാഴ്ചക്കി​ടെ 13കാരിയെ രണ്ടുതവണ തട്ടിക്കൊണ്ടുപോയി കൂട്ടബലാത്സംഗം ചെയ്​തു

ഭോപാൽ: അഞ്ചുദിവസത്തിനിടെ രണ്ടുതവണ തട്ടിക്കൊണ്ടുപോയി 13കാരിയെ ഒമ്പതംഗ സംഘം ബലാത്സംഗം ചെയ്​തു. മധ്യപ്രദേശിലെ ഉമാരിയ ജില്ലയിലാണ്​ സംഭവം.

​ജനുവരി നാലിനാണ്​ പെൺകുട്ടിയെ പരിചയത്തിലുള്ള യുവാവ്​ തട്ടികൊണ്ടുപോകുന്നത്​. തുടർന്ന്​ രണ്ടുദിവസത്തോളം പെൺകുട്ടിയെ യുവാവും സുഹൃത്തുക്കളായ ആ​റുപേരും ചേർന്ന്​ ബലാത്സംഗം ചെയ്​തു.

ജനുവരി അഞ്ചിന്​ പെൺകുട്ടിയെ വിട്ടയച്ച സംഘം സംഭവം പുറത്തുപറഞ്ഞാൽ കൊലപ്പെടുത്തുമെന്ന്​ ഭീഷണിപ്പെടുത്തുകയും ചെയ്​തു. തുടർന്ന്​ പെൺകുട്ടി സംഭവം പുറത്തുപറഞ്ഞിരുന്നില്ല.

ആറുദിവസത്തിന്​ ശേഷം ജനുവരി 11ന്​ വീണ്ടും ആദ്യസംഘത്തിലെ ഒരാൾ പെൺകുട്ടിയെ തട്ടികൊണ്ടുപോയി. തുടർന്ന്​ കാട്ടിനുള്ളിലും വഴിയോര ഭക്ഷണശാലയിലും വെച്ച്​ മൂന്നുപേർക്കൊപ്പം ബലാത്സംഗം ചെയ്യുകയായിരുന്നു. അവിടെനിന്ന്​ രക്ഷപ്പെട്ട പെൺകുട്ടിയെ രണ്ടു ട്രക്ക്​ ഡ്രൈവർമാരും ബലാത്സംഗം ചെയ്​തതായി പൊലീസ്​ പറഞ്ഞു.

അവരിൽനിന്ന്​ ​രക്ഷപ്പെട്ട പെൺകുട്ടി വെള്ളിയാഴ്​ച വെളുപ്പിന്​ വീട്ടിലെത്തുകയായിരുന്നു. തുടർന്ന്​ പെൺകുട്ടിയുടെ വീട്ടുകാർ വിവരം പൊലീസിനെ അറിയിച്ചു. ആറു പ്രതികളെ പോക്​സോ വകുപ്പുകൾ ഉൾപ്പെടെ ചുമത്തി​ അറസ്റ്റ് ചെയ്​തതായും മറ്റു പ്രതികൾക്കായി തെര​ച്ചിൽ ആരംഭിച്ചതായും പൊലീസ്​ പറഞ്ഞു​.

മുഖ്യമ​ന്ത്രി ശിവരാജ്​ സിങ്​ ചൗഹാന്‍റെ നേതൃത്വത്തിൽ സ്​ത്രീകൾക്കെതിരായ അതിക്രമങ്ങൾക്കെതിരെ രണ്ടാഴ്ച നീണ്ടുനിൽക്കുന്ന 'സമ്മാൻ' അവബോധ കാമ്പയിൻ തുടരുന്നതിനിടെയാണ്​ ദാരുണ സംഭവം. കഴിഞ്ഞ ആറുദിവസത്തിനിടെ സംസ്​ഥാനത്ത്​ നാലോളം ബലാത്സംഗ കേസുകൾ റിപ്പോർട്ട്​ ചെയ്​തിട്ടുണ്ട്​. ഇതോടെ സംസ്​ഥാനത്ത്​ സ്​ത്രീ സുരക്ഷ സംബന്ധിച്ച് ചോദ്യങ്ങൾ ഉയർത്തുകയാണ്​ പ്രതിപക്ഷം.