ഗാന്ധി സ്​മരണയിൽ രാഷ്​ട്രം

ന്യൂഡൽഹി: രാഷ്​ട്രപിതാവ്​ മഹാത്മഗാന്ധിയുടെ 150ാം ജൻമ വാർഷികദിനത്തിൽ ഗാന്ധി സ്​മരണ പുതുക്കുകയാണ്​ രാഷ്​ട്രം. പ്രധാനമന്ത്രി ന​േ​രന്ദ്രമോദിയും ലോക്​സഭ സ്​പീക്കർ ഓം ബിർലയും ഗാന്ധിജി അന്ത്യവിശ്രമം കൊള്ളുന്ന രാജ്​ഘട്ടിലെത്തി ആദരാഞ്​ജലി അർപ്പിച്ചു.

കോൺഗ്രസ്​ ഇടക്കാല അധ്യക്ഷ സോണിയ ഗാന്ധി, മുൻ പ്രധാനമന്ത്രി മൻമോഹൻ സിങ്​, മുതിർന്ന ബി.ജെ.പി നേതാവ്​ ലാൽ കൃഷ്​ണ അദ്വാനി എന്നിവരുൾപ്പടെയുള്ള വിശിഷ്​ട വ്യക്തികളും രാജ്​ഘട്ടിലെത്തി മഹാത്മഗാന്ധിക്ക്​ ആദരമർപ്പിച്ചു. കോൺഗ്രസും ബി.ജെ.പിയും രാജ്യത്തിൻെറ വിവിധി ഭാഗങ്ങളിൽ ഗാന്ധി സ്​മരണ പുതുക്കുന്നതിനായി വിവിധ പരിപാടികൾ നടത്തുന്നുണ്ട്​.

രാജ്യത്തിൻെറ വിവിധ ഭാഗങ്ങളിൽ കോൺഗ്രസ്​ പദയാത്രകൾ സംഘടിപ്പിക്കുന്നുണ്ട്​. ഡല്‍ഹിയില്‍ കോൺഗ്രസ്‌ അധ്യക്ഷ സോണിയ ഗാന്ധിയുടേയും രാഹുല്‍ ഗാന്ധിയുടേയും നേതൃത്വത്തിലും ലഖ്​നോവില്‍ പ്രിയങ്ക ഗാന്ധിയുടെ നേതൃത്വത്തിലുമാണ്​ പദയാത്രകൾ നടക്കുക.

ബി.ജെ.പിയുടെ ആഭിമുഖ്യത്തിൽ നടത്തുന്ന ഗാന്ധി സങ്കൽപ്​ യാത്ര 120 ദിവസമാക്കി നീട്ടിയിട്ടുണ്ട്​. നേരത്തെ നിശ്ചയിച്ചിരുന്നത്​ ഇന്ന്​ തുടങ്ങി, ഈ മാസം31 വരെ നടത്താനായിരുന്നു. യാത്ര 2020 ജനുവരി 31ന്​ ആയിരിക്കും സമാപിക്കുക.

മുൻ പ്രധാനമന്ത്രി ലാൽ ബഹദൂർ ശാസ്​ത്രിയുടെ 115ാം ജൻമ വാർഷികദിനത്തോടനുബന്ധിച്ച്​ പ്രധാനമന്ത്രി, സ്​പീക്കർ, രാഷ്​ട്രപതി, കോൺഗ്രസ്​ അധ്യക്ഷ സോണിയാ ഗാന്ധി, മൻമോഹൻസിങ്​ തുടങ്ങിയവർ ഇന്ന്​ വിജയ്​ ഘട്ടിലെത്തി ലാൽ ബഹദൂർ ശാസ്​ത്രിക്ക്​ ആദരാഞ്​ജലികൾ അർപ്പിച്ചു.