പാർലമെൻറ് സമ്മേളനത്തിൻെറ ആദ്യ ദിനം കോവിഡ് സ്ഥിരീകരിച്ചത് 25 എം.പിമാർക്ക്

ന്യൂഡൽഹി: പാർലമെൻറ്​ മൺസൂൺ സ​േമ്മളനത്തിന്​ മുന്നോടിയായി നടത്തിയ കോവിഡ് പരിശോധനയിൽ 25 എം.പിമാർക്ക്​ കോവിഡ്​ സ്​ഥിരീകരിച്ചു. റെയിൽവേ സഹമന്ത്രി സുരേഷ് അങ്കടി, മീനാക്ഷി ലേഖി, അനന്ത് കുമാർ ഹെഗ്‌ഡെ, പർവേഷ് സാഹിബ് സിങ്, റിത ബഹുഗുണ ജോഷി, കൗഷൽ കിഷോർ എന്നിവരടക്കം 12 ബി.ജെ.പി എം.പിമാർക്കാണ് കോവിഡ് സ്ഥിരീകരിച്ചത്.

വൈ.എസ്​.ആർ കോൺഗ്രസ്​, ശിവസേന, ഡി.എം.കെ, ആർ.എൽ.പി പാർട്ടികളുടെ എം.പിമാർക്കും കോവിഡ് സ്ഥിരീകരിച്ചിട്ടുണ്ട്.

സെപ്​റ്റംബർ 13നും 14നും നടത്തിയ പരിശോധനയിലാണ്​ പാർലമെൻറ് അംഗങ്ങൾക്ക് കോവിഡ് സ്ഥിരീകരിച്ചിരിക്കുന്നത്. പാർലമെൻറ് അംഗങ്ങളുടെയും മറ്റ് ഉദ്യോഗസ്ഥരുടെയും അടക്കം 2500 ലധികം സാമ്പിളുകളാണ് ഐ.സി.എം.ആർ യുദ്ധകാലാടിസ്ഥാനത്തിൽ പരിശോധിച്ചത്.

പാർലമെൻറ്​ സമ്മേളനം നടക്കുന്നതിന്​ മുന്നോടിയായി രാജ്യസഭ, ലോക്​സഭ അംഗങ്ങൾ നിർബന്ധമായും കോവിഡ്​ പരിശോധന നടത്തണമെന്ന്​ നിർദേശിച്ചിരുന്നു. തിങ്കളാഴ്​ചയാണ്​ സമ്മേളനം ആ​രംഭിച്ചത്​. കോവിഡ്​ വ്യാപന പശ്ചാത്തലത്തിൽ സഭാസമ്മേളന സമയം ഉൾപ്പെടെ വെട്ടിക്കുറക്കാനും തീരുമാനിച്ചിരുന്നു. സീറ്റ്​ ക്രമീകരണത്തിലും മാറ്റം ഏർപ്പെടുത്തിയിരുന്നു.