ഗുജറാത്തിൽ 18 അടി നീളമുള്ള ഭീമൻ തിമിംഗലത്തി​െൻറ ജഡം കരക്കടിഞ്ഞു

അഹ്​മദാബാദ്​: ഗുജറാത്തിലെ വൽസദ്​ ജില്ലയിലെ നർഗോൽ കടൽതീരത്ത്​ 18 അടി നീളമുള്ള തിമിംഗലത്തി​െൻറ ജഡം അടിഞ്ഞു. ജഡം അഴുകിയ നിലയിലായതിനാൽ അധികൃതർക്ക്​ ഇത്​ ഏത്​ വിഭാഗത്തിൽ പെട്ടതാണെന്ന്​ ഇതുവരെ തിരിച്ചറിയാൻ സാധിച്ചിട്ടില്ല. കൂടുതൽ അന്വേഷണങ്ങൾക്കായി വനം വകുപ്പ്​ സാംപിളുകൾ ശേഖരിച്ച്​ കൊണ്ടുപോയി​. പ്രദേശവാസികളാണ്​ അധികൃതരെ വിവരമറിയിച്ചത്​.

ഭീമൻ തിമിംഗലത്തി​െൻറ ജഡം സംസ്​കരിക്കുന്ന കാര്യത്തിൽ തീരുമാനമായിട്ടില്ല. വലിപ്പം പരിഗണിക്കു​േമ്പാൾ മറവ് ചെയ്യുന്നതാകും ഉത്ത​മം എന്നാണ്​ കരുതുന്നത്​. ​തിമിംഗലം ചത്തതാണോ അതോ കൊന്നതാണോ എന്ന കാര്യത്തിൽ ഇതുവരെ ഒരു നിഗമനത്തിൽ എത്തിയിട്ടില്ലെന്ന്​ ഡെപ്യൂട്ടി ഫോറസ്​റ്റ്​ കൺസർവേറ്ററായ യദു ഭരദ്വാജ്​ പറഞ്ഞു.

ദിവസങ്ങൾക്ക്​ മു​േമ്പ തന്നെ തിമിംഗലം ചത്തിരിക്കാമെന്നാണ്​ അധികൃതർ കരുതുന്നത്​. എന്നാൽ ഇത്​ സ്​ഥിരീകരിക്കാൻ കുടുതൽ പരിശോധനകൾ ആവശ്യമാണ്​. ഭീമൻ തിമിംഗലത്തി​െൻറ ജഡം കാണാൻ സമീപത്തെ ഗ്രാമത്തിൽ നിന്ന്​ പോലും ജനക്കൂട്ടമെത്തി. അടുത്തകാലത്തായി ചത്ത തിമിംഗലങ്ങളുടെ ജഡങ്ങൾ കരക്കടിയുന്നത്​ സാധരണയായി മാറിയിരിക്കുകയാണ്​.

വന്യജീവി സംരക്ഷണ നിയമത്തിലെ ഷെഡ്യൂള്‍ ഒന്നിലാണ്​ തിമിംഗലങ്ങൾ വരുന്നത്​.