പാകിസ്​താ​െൻറ അതി​പ്രിയ രാഷ്​ട്രപദവി ഇന്ത്യ പുന:പരിശോധിക്കുന്നു

ന്യൂഡൽഹി: ഉറി സൈനിക ക്യാമ്പിന്​ നേരെ നടന്ന ഭീകരാക്രമണത്തി​​െൻറ പശ്ചാത്തലത്തിൽ ഇന്ത്യ പാകിസ്​താനോടുള്ള നിലപാട്​ കടുപ്പിക്കുന്നു. പാകിസ്​താന്​ നൽകിയ അതിപ്രിയ രാഷ്​ട്ര പദവിഇന്ത്യ പുന:പരിശോധിക്കും. ഇക്കാര്യം ചർച്ച ചെയ്യുന്നതിനായി  വ്യാഴാഴ്​ച ​പ്രധാനമ​ന്ത്രി പ്രത്യേക യോഗം വിളിച്ചു. വിദേശകാര്യ മന്ത്രാലയത്തിലെയും വാണിജ്യ മന്ത്രാലയത്തിലെയും ഉ​ന്നത ഉദ്യോഗസ്ഥരും യോഗത്തിൽ പ​െങ്കടുക്കും.

1996ലാണ് പാകിസ്​താന് ഇന്ത്യ അതിപ്രിയ രാജ്യ പദവി നൽകിയത്. എന്നാൽ പാകിസ്​താൻ ഇന്ത്യക്ക്​ അതിപ്രിയ  രാഷ്​ട്ര പദവി നൽകിയിട്ടില്ല. അതിപ്രിയ രാജ്യ പദവിയുള്ള രാജ്യങ്ങൾക്കിടയിൽ വാണിജ്യ നേട്ടങ്ങളിൽ തുല്യതയുണ്ടായിരിക്കും. പദവി പിൻവലിക്കുന്നതോടെ ഇരു രാജ്യങ്ങളും തമ്മിലുള്ള വ്യാപാരം പരിമിതമാവും. അതേസമയം ഇന്ത്യയുടെ വിദേശ വ്യാപാരത്തിൽ ചെറിയ അംശം മാത്രമാണ്​ പാകിസ്​താനുമായുള്ളത്​.

ഉറി ആക്രമണത്തി​​െൻറ പശ്ചാത്തലത്തിൽ പാകിസ്​താനുമേൽ നയതന്ത്ര സമ്മർദങ്ങൾക്ക്​ അപ്പുറമുള്ള സാധ്യതകൾ ഉപയോഗപ്പെടുത്തുകയാണ്​ ഇന്ത്യയുടെ ലക്ഷ്യം.  നേരത്തെ സിന്ധു നദീജല കരാർ റദ്ദാക്കുന്നത്​ സംബന്ധിച്ച്​ ചർച്ച ചെയ്​തെങ്കിലും കരാറിൽ നിന്ന്​ പിന്മാറില്ലെന്ന്​ ഇന്ത്യ തീരുമാനിച്ചിരുന്നു. അതേസമയം പാകിസ്​താനിലേക്ക്​ വെള്ളം നൽകുന്ന മൂന്ന്​ നദികളിലെ ജലം കൂടുതലായി ഉപയോഗിക്കാൻ ഇന്ത്യ തീരുമാനിച്ചിരുന്നു. ജലകൈമാറ്റ കരാറിൽ നിന്ന്​ പിന്മാറുന്നത്​ യു.എൻ പോലുള്ള അന്താരാഷ്​ട്ര വേദികളിൽ ഇന്ത്യക്ക്​ തിരിച്ചടിയാവുമെന്ന്​ വിദേശകാര്യമന്ത്രാലയം അറിയിച്ചതിനെ തുടർന്നാണ്​ കേന്ദ്രത്തി​​െൻറ തീരുമാനം.