ഹിമാചലിൽ സ്​കൂൾ ബസ്​ കൊക്കയിലേക്ക്​ മറിഞ്ഞ്​ 27 കുട്ടികൾ ഉൾ​െപ്പടെ 30 മരണം

ഷിംല: ഹിമാചൽപ്രദേശിൽ സ്​കൂൾ ബസ്​ 100 അടി താഴ്​ചയുള്ള കൊക്കയിലേക്കു വീണ്​  27 വിദ്യാർഥികൾ ഉൾ​െപ്പടെ 30 പേർ മരിച്ചു. നുർപുർ -ച​മ്പ്ര ഹൈവേയിലാണ്​ ദുരന്തം. ഡ്രൈവറായ മദൻലാലും (67) രണ്ട്​ അധ്യാപികമാരുമാണ്​ മരിച്ച മറ്റു മൂന്നുപേരെന്ന്​ പൊലീസ്​ അറിയിച്ചു. ഗുരുതരമായി പരിക്കേറ്റ 13 പേരെ പത്താൻകോട്ടിലെ ആശുപത്രിയിൽ പ്രവേശിപ്പിച്ചു. 

വസീർ റാം സിങ്​ പതാനിയ മെമ്മോറിയൽ സ്​കൂളിലെ വിദ്യാർഥികളാണ്​ മരിച്ചത്​.  മരിച്ച കുട്ടികളിലേറെയും പ്രൈമറി ക്ലാസിൽ പഠിക്കുന്ന 10​ വയസ്സിന്​ താഴെയുള്ളവരാണ്​. അപകടം നടക്കു​േമ്പാൾ ബസിൽ 40 മുതൽ 45 വരെ ആളുകൾ ഉണ്ടായിരുന്നു. വളവ്​ തിരിക്കുന്നതിനിടെ നിയന്ത്രണം തെറ്റിയ ബസ്​ കൊക്കയിലേക്ക്​ പതിക്കുകയായിരുന്നെന്ന്​ കണ്ടെത്തിയതായി അധികൃതർ അറിയിച്ചു. ലോകത്തിലെതന്നെ ഏറ്റവും ദുർഘടമായ റോഡുള്ള മേഖലയാണിത്​.

മരിച്ചവരുടെ കുടുംബാംഗങ്ങൾക്ക്​ മുഖ്യമന്ത്രി ജയ്​റാം താക്കൂർ അഞ്ചുലക്ഷം രൂപ അടിയന്തര ധന സഹായം പ്രഖ്യാപിച്ചു. ഭക്ഷ്യമന്ത്രി കൃഷൻ കപൂർ സ്​ഥലത്തെത്തി രക്ഷാപ്രവർത്തനങ്ങൾക്ക്​ നേതൃത്വം നൽകി. ഉപരാഷ്​ട്രപതി എം. വെങ്കയ്യ നായിഡു, പ്രധാനമന്ത്രി നരേന്ദ്ര മോദി എന്നിവർ അനുശോചനം രേഖപ്പെടുത്തി.