ബിഹാറിലും വിഷമദ്യ ദുരന്തം; മൂന്ന്​ പേർ മരിച്ചു, രണ്ട്​ പേർ ഗുരുതരാവസ്ഥയിൽ

പട്​ന: രാജസ്ഥാന്​ പിന്നാലെ ബിഹാറിലും വിഷമദ്യ ദുരന്തം. കയ്​മൂർ ജില്ലയിൽ വിഷ മദ്യം കഴിച്ചതിനെ തുടർന്ന്​​ മൂന്നുപേർക്കാണ്​ ജീവൻ നഷ്​ടമായത്​. മദ്യം കഴിച്ച അഞ്ചുപേർ ചികിത്സയിലാണെന്നും​ അതിൽ രണ്ടുപേരുടെ നില ഗുരുതരമാണെന്നും ​എ.എൻ.​െഎ റിപ്പോർട്ട്​ ചെയ്​തു.

വിഷമദ്യത്തെ കുറിച്ച്​ തങ്ങൾ പരാതിപ്പെട്ടിരുന്നതായി പ്രദേശവാസികൾ അറിയിച്ചു. വിവരം ലഭിച്ചതിനെ തുടർന്ന്​ ഡി.എസ്​.പി, ജില്ലാ മജിസ്​ട്രേറ്റ്​ അടക്കമുള്ള അധികൃതർ സംഭവ സ്ഥലത്തെത്തിയിരുന്നു. മദ്യം കഴിച്ച്​ മരിച്ച ഒരാളുടെ മൃതദേഹം പ്രദേശത്തുവെച്ച്​ ലഭിച്ചിട്ടുണ്ടെന്നും മറ്റു ​രണ്ടുപേരുടെ മൃതദേഹങ്ങൾ അവരുടെ ബന്ധുക്കൾ കൊണ്ടുപോയതായും പൊലീസ്​ അറിയിച്ചു. എന്നാൽ, മൂന്നുപേരും മരിച്ചത്​ വിഷമയമായ മദ്യം കഴിച്ചാണെന്ന കാര്യത്തിൽ ഒൗദ്യോഗിക സ്ഥിരീകരണമൊന്നും വന്നിട്ടില്ല. പോസ്​റ്റ്​മോർട്ടത്തിന്​ ശേഷം മരണകാരണം വെളിപ്പെടുത്തുമെന്നും അന്വേഷണം പുരോഗമിക്കുന്നുണ്ടെന്നും പൊലീസ്​ കൂട്ടിച്ചേർത്തു.