ജമ്മുകശ്​മീരിൽ സുരക്ഷാസേനയുമായുണ്ടായ ഏറ്റുമുട്ടലിൽ മൂന്ന്​ തീവ്രവാദികൾ കൊല്ലപ്പെട്ടു

ശ്രീനഗർ: ജമ്മുകശ്​മീരിൽ സുരക്ഷാസേനയുമായുണ്ടായ ഏറ്റുമുട്ടലിൽ മൂന്ന്​ തീവ്രവാദികൾ കൊല്ലപ്പെട്ടു. ഷോപിയാൻ ജില്ലയിലാണ്​ സംഭവം. തീവ്രവാദികളോട്​ കീഴടങ്ങാൻ നിർദേശിച്ചുവെന്നും അവർ അതിന്​ തയാറാവാതെ സുരക്ഷാസേനക്ക്​ നേരെ ഗ്രനേഡ്​ എറിയുകയായിരുന്നു​വെന്ന്​ ജമ്മുകശ്​മീർ പൊലീസ്​ അറിയിച്ചു. തുടർന്ന്​ സുരക്ഷാ സേന നടത്തിയ പ്രത്യാക്രമണത്തിലാണ്​ തീവ്രവാദികൾ കൊല്ലപ്പെട്ടതെന്നും കശ്​മീർ ​പൊലീസ്​ വ്യക്​തമാക്കി.

കനാഗാം മേഖലയി​ലെ തീവ്രവാദികളുടെ താമസസ്ഥലം സുരക്ഷാസേന വളയുകയായിരുന്നുവെന്നാണ്​ റിപ്പോർട്ട്​. തുടർന്നാണ്​ ഇവരോട്​ കീഴടങ്ങാൻ ആവശ്യപ്പെട്ടത്​. അൽബദർ എന്ന തീവ്രവാദ സംഘടനയിലെ ആളുകളാണ്​ പിടിയിലായതെന്നാണ്​ സൂചന.