'ബി.​ജെ.പിയിൽ നിന്നല്ലേ, ശുദ്ധിയായിട്ട്​ വന്നാൽ മതി' -തിരികെയെത്തിയ 300 പ്രവർത്തകരെ തൃണമൂൽ സ്വീകരിച്ചത്​ ഗംഗാജലം തളിച്ച്​

കൊൽക്കത്ത: തെരഞ്ഞെടുപ്പ്​ കഴിഞ്ഞതോടെ പശ്​ചിമ ബംഗാളിൽ ബി.ജെ.പിയിൽനിന്ന്​ തൃണമൂൽ കോൺഗ്രസിലേക്ക്​ തിരികെ എത്തുന്ന പ്രവർത്തകരുടെ എണ്ണം കൂടി വരികയാണ്​. ബിര്‍ഭൂം ജില്ലയില്‍ വെള്ളിയാഴ്ച 300 പ്രവര്‍ത്തകരാണ് ബി.ജെ.പിയില്‍ നിന്ന് തൃണമൂലിലേക്ക് തിരികെ എത്തിയത്. ഇവരെ ഗംഗാജലം തളിച്ച്​ 'ശുദ്ധീകരിച്ചാണ്' തൃണമൂല്‍ കോൺഗ്രസ്​ നേതാക്കള്‍ സ്വീകരിച്ചത്.

കഴിഞ്ഞ ദിവസം പാർട്ടിയില്‍ തിരികെ എടുക്കണമെന്നാവശ്യപ്പെട്ട് ഇവർ തൃണമൂൽ കോൺഗ്രസ് ഓഫിസിനു മുന്നിൽ നിരാഹാര സമരം നടത്തിയിരുന്നു. തുടർന്നാണ്​ പാർട്ടിയില്‍ ചേരാന്‍ നിരാഹാരമിരുന്ന എല്ലാ പ്രവർത്തകരേയും ഗംഗാജലം തളിച്ച് തൃണമൂൽ കോൺഗ്രസ്​ നേതാക്കൾ സ്വീകരിക്കുകയായിരുന്നു. മൂന്ന്​ മണിക്കൂറെടുത്താണ്​ 'ശുദ്ധീകരണം' പൂർത്തിയായത്​. രാവിലെ എട്ട്​ മുതൽ 11 വ​രെ അത്​ നീണ്ടു. തൃണമൂൽ നേതാവ് തുഷാർ കാന്തി മൊണ്ഡലാണ് പ്രവർത്തകർക്ക് പാർട്ടി പതാക കൈമാറിയത്. ബി.ജെ.പി അവരുടെ വിഷചിന്തകൾ പ്രവർത്തകരുടെ മനസ്സിൽ നിറച്ചിട്ടുണ്ടാകുമെന്നും ആ മോശം കാര്യങ്ങൾ മനസ്സിൽനിന്ന് നീക്കാനാണ് പുണ്യജലം തളിച്ചതെന്നും തുഷാർ കാന്തി മൊണ്ഡൽ വ്യക്തമാക്കി.

'ഗ്രാമത്തിൽ വികസനം വരുമെന്ന്​ ആഗ്രഹിച്ചാണ്​ ബി.ജെ.പിയിൽ ചേർന്നത്​. അത്​ ഒരുതരത്തിലും ഞങ്ങളെ സഹായിച്ചില്ല. പകരം, ഞങ്ങൾക്ക്​ ഒരുപാട്​ നഷ്​ടങ്ങളുമുണ്ടായി. ഞങ്ങൾക്ക്​ തൃണമൂലിലേക്ക്​തിരികെ പോകണം. ബി.ജെ.പി ഒരു വർഗീയ പാർട്ടിയാണ്​. അവർ ഞങ്ങളുടെ മനസ്സിൽ വിഷം നിറച്ചു' -സത്യഗ്രഹത്തിൽ പ​ങ്കെടുത്ത അശോക്​ മൊണ്ഡൽ എന്ന പ്രവർത്തകൻ പറഞ്ഞു.

അതേസമയം, ഇതെല്ലാം തൃണമൂൽ കോൺഗ്രസ്​ ​നേതാക്കളുടെ നാടകമാണെന്നും പ്രവർത്തകരെ നിർബന്ധിച്ച് തൃണമൂലിൽ ചേർക്കുകയാണെന്നുമാണ്​ ബി.ജെ.പി പ്രതികരിച്ചത്​. മുകുള്‍ റോയ്‌യെ പോലുള്ള വലിയ നേതാക്കള്‍ക്ക് പുറമെ സാധാരണ പ്രവര്‍ത്തകരും തൃണമൂല്‍ കോണ്‍ഗ്രസിലേക്ക് മടങ്ങുന്നത് ബി.ജെ.പിക്ക് വലിയ തലവേദനയാണ് സൃഷ്ടിക്കുന്നത്.