നാഗ്​പൂരിൽ കോവിഡ്​ ആശുപത്രിയിൽ തീപിടിത്തം; നാല്​ പേർ മരിച്ചു

നാഗ്​പൂർ: നഗരത്തിലെ കോവിഡ്​ ആശുപത്രിയിലുണ്ടായ തീപിടിത്തത്തിൽ നാല്​ പേർ മരിച്ചു. വെള്ളിയാഴ്ച രാത്രിയാണ്​ തീപിടിത്തമുണ്ടായത്​. ആശുപത്രിയിലുണ്ടായിരുന്ന 27 രോഗികളെ മറ്റ്​ സ്ഥലങ്ങളിലേക്ക്​ മാറ്റി. രോഗികളുടെ ആരോഗ്യസ്ഥിതിയെ കുറിച്ച്​ ഇപ്പോ​ഴൊന്നും പറയാനാവില്ലെന്നും ആശുപത്രിയിലുള്ള എല്ലാവരേയും ഒഴിപ്പിച്ചെന്നും പൊലീസ്​ അറിയിച്ചു.

നാല്​ മൃതദേഹങ്ങൾ കണ്ടെടുത്താതായി ആശുപത്രി അധികൃതരും സ്ഥിരീകരിച്ചിട്ടുണ്ട്​. രണ്ട്​ പേരുടെ നില ഗുരുതരമായി തുടരുകയാണ്​. 30 കോവിഡ്​ രോഗികളെ ചികിത്സിക്കാനുള്ള സൗകര്യമാണ്​ ആശുപത്രിയിലുള്ളത്​. ഇതിൽ 15 എണ്ണം ഐ.സി.യു ബെഡുകളാണ്​​. ഐ.സി.യുവിലെ എ.സിയിൽ നിന്നാണ്​ തീപടർന്നതെന്ന്​​ സൂചന.

തീപിടിത്തത്തിൽ നാല്​ പേർ മരിച്ചതിൽ അതീവ ദുഃഖമുണ്ടെന്ന്​ പ്രധാനമന്ത്രി നരേന്ദ്ര മോദി ട്വീറ്റ്​ ചെയ്​തു. പരിക്കേറ്റവർക്ക്​ എളുപ്പത്തിൽ രോഗമുക്​തിയുണ്ടാവ​ട്ടെയെന്നും അദ്ദേഹം ആശംസിച്ചു.