സൈനിക നടപടികൾ നിർത്തിവെച്ച കാലയളവിൽ കശ്​മീരിൽ 41 മരണം

ജമ്മുകശ്​മീർ: കശ്​മീരിൽ സൈനിക നടപടികൾ നിർത്തിവച്ച ഒരു മാസത്തിനുള്ളിലുണ്ടായ സംഘർഷത്തിൽ 41 പേർ മരിച്ചതായി റിപ്പോർട്ട്​. 20ഒാളം ഗ്രനേഡ്​ ആക്രമണങ്ങളും 50ഒാളം അക്രമാസക്​തമായ സമരങ്ങളും നടന്നതായും സൈനിക വൃത്തങ്ങൾ അറിയിച്ചു. റമദാൻ മാസത്തോടനുബന്ധിച്ചാണ്​ സൈനിക നടപടികൾ നിർത്തി വെച്ചത്​.

അക്രമ സംഭവങ്ങൾ അതിരു കടന്നതോടെ റമദാന്​ ശേഷം വെടിനിർത്തൽ തുടരേണ്ടതില്ലെന്നും ഭീകരവാദികൾക്കെതിരെ ആവ​ശ്യമായ എല്ലാ നടപടികളും സ്വീകരിക്കണമെന്നും​ സർക്കാർ ഉത്തരവിട്ടു. മെയ്​ 16നായിരുന്നു കേന്ദ്ര ആഭ്യന്തര വകുപ്പ്​ മന്ത്രി രാജ്​നാഥ്​ സിങ്​ പുണ്യമാസമായ റമദാനിൽ വെടിനിർത്തൽ പാലിക്കുമെന്നും ഇൗ കാലയളവിൽ സൈനിക നടപടികൾ ഉണ്ടാവില്ലെന്നുമുള്ള തീരുമാനം പ്രഖ്യാപിച്ചത്​. 

ദിവസേന നടക്കുന്ന കൊലപാതകങ്ങൾക്ക്​ ശമനമാകുമെന്ന പ്രതീക്ഷയിൽ മുഖ്യമന്ത്രി മെഹബൂബ മുഫ്​തി ഇൗ തീരുമാനത്തെ സ്വാഗതം ​െചയ്​തിരുന്നു. റമദാൻ മാസത്തിനു ശേഷവും കേന്ദ്ര സർക്കാർ തൽസ്​ഥിതി തുടരുമെന്നായിരുന്നു മുഫ്​തി കരുതിയത്​. എന്നാൽ കേന്ദ്ര തീരുമാനത്തെ അവഗണിച്ചുകൊണ്ട്​ നിരവധി അക്രമസംഭവങ്ങൾ അരങ്ങേറി.

സൈനിക നടപടികൾ നിർത്തി വെച്ച മെയ്​17 മുതൽ ജൂൺ 17 വരെയുള്ള കാലയളവിലാണ്​ 41 ജീവനുകൾ പൊലിഞ്ഞത്​. മരിച്ചവരിൽ 24 പേരും പ്രദേശത്തേക്ക്​ ഒളിച്ചു കടന്നെത്തിയ ലഷ്​കറെ ത്വയ്യിബ, ഹിസ്​ബുൽ മുജാഹിദീൻ, ജെയ്​ഷെ മുഹമ്മദ്​ അൽ ബദർ സംഘങ്ങളിൽപെട്ട അക്രമികളായിരുന്നു. ഇതിൽ ഭൂരിഭാഗം പേരും കൊല്ലപ്പെട്ടത്​ കുപ്​വാര ജില്ലയിൽ വെച്ചാണ്​. ഒമ്പത്​ സുരക്ഷ ഉദ്യോഗസ്​ഥരും നാല്​ ​ൈസനിക ഉദ്യോഗസ്​ഥരും ഇൗ കാലയളവിൽ കൊല്ലപ്പെട്ടിട്ടുണ്ട്​. ഭീകരവാദികളുടെ ആക്രമണത്തിൽ മൂന്ന്​ സിവിലിയൻമാരും​ കൊല്ല​െപ്പട്ടു. 

ഏപ്രിൽ 17 മുതൽ മെയ്​ 17വരെ18 ഭീകര ആക്രമണങ്ങളാണ്​ നടന്നത്​​. എന്നാൽ റമദാൻ മാസത്തിൽ ഇത്​ 50ലേറെയായി ഉയർന്നു. മുതിർന്ന മാധ്യമപ്രവർത്തകൻ ശുജഅത്ത്​ ബുഖാരിയെയും അദ്ദേഹത്തി​​​​​െൻറ രണ്ട്​ ​സുരക്ഷ ഉദ്യോഗസ്​ഥരേയും ഭീകരവാദികൾ വെടിവെച്ച്​ കൊലപ്പെടുത്തിയത്​ ജൂൺ 14ന്​ ആയിരുന്നു. ശക്തമായ കാവലുള്ള കോളനിയിൽ നിന്ന്​ ബുഖാരിയെ വെടിവെച്ച്​ വീഴ്​ത്തിയ ശേഷം മൂന്ന്​ അക്രമികളും രക്ഷപ്പെട്ടു.