കളിക്കുന്നതിനിടെ പത്തായത്തിൽ കുടുങ്ങി അഞ്ചു കുട്ടികൾ​ മരിച്ചു

ബിക്കാനീർ: രാജസ്​ഥാനിൽ കളിക്കുന്നതിനിടെ ധാന്യം സംഭരിക്കുന്ന പത്തായത്തിൽ കുടുങ്ങി അഞ്ചു കുട്ടികൾ​ ശ്വാസം മുട്ടി മരിച്ചു. ബിക്കാനീറിലെ ഹിമ്മാതാസർ ഗ്രാമത്തിലാണ്​ ദാരുണസംഭവം.

നാലുവയസായ സേവാറാം, രവീന(7), രാധ (5), പൂനം (എട്ട്​), മാലി എന്നിവരാണ്​ മരിച്ചത്​. കാലിയായ പത്തായത്തിലേക്ക്​ ഓരോ കുട്ടികൾ വീതം എടുത്തുചാടുകയായിരുന്നു. കുട്ടികൾ അകത്ത്​​ കടന്നതോടെ പത്തായത്തിന്‍റെ വാതിൽ അടഞ്ഞു. തുടർന്ന്​ ശ്വാസം കിട്ടാതെ പിടഞ്ഞ്​ മരിക്കുകയായിരുന്നു.

മാതാവ്​ വീട്ടിലെത്തിയപ്പോൾ കുട്ടികളെ കാണാത്തതിനാൽ നടത്തിയ തിരച്ചിലിലാണ്​ പത്തായത്തിൽ ബോധമില്ലാത്ത നിലയിൽ ഇവരെ ക​ണ്ടെത്തിയത്​. ഉടൻ ആശുപത്രിയിലെത്തിച്ചെങ്കിലും മരിച്ചതായി ഡോക്​ടർമാർ അറിയിക്കുകയായിരുന്നു.