കശ്​മീരിൽ നുഴഞ്ഞുകയറാൻ ശ്രമിച്ച അഞ്ചു തീവ്രവാദികളെ വധിച്ചു

ശ്രീനഗർ: ജമ്മു-കശ്​മീരിലെ മാച്ചിൽ സെക്​ടറിൽ നുഴഞ്ഞുകയറാൻ ശ്രമിച്ച അഞ്ചു തീവ്രവാദികളെ സുരക്ഷാ ​സേന വെടിവെച്ചുകൊന്നു. പാക്​ അധീന കശ്​മീരിൽനിന്ന്​ നിയന്ത്രണ രേഖ വഴി വടക്കൻ കശ്​മീരിലെ കുപ്​വാരയിലേക്ക്​ കടക്കാൻ ശ്രമിച്ചവരെയാണ്​ വെടിവെപ്പിനൊടുവിൽ വധിച്ചത്​. ഇവരിൽനിന്ന്​ ആയുധങ്ങൾ കണ്ടെടുത്തിട്ടുണ്ട്​. 

കൊല്ലപ്പെട്ടവരെക്കുറിച്ച കൂടുതൽ വിശദാംശങ്ങൾ അന്വേഷിച്ചുവരുകയാണെന്നും പ്രദേശത്ത്​ സൈനിക നീക്കം തുടരുകയാണെന്നും പ്രതിരോധ മന്ത്രാലയ വക്​താവ്​ കേണൽ രാജേഷ്​ കാലിയ പറഞ്ഞു. നുഴഞ്ഞുകയറാൻ ശ്രമിച്ച 38 തീവ്രവാദികളെ​ ഇൗ വർഷം സൈന്യം വെടിവെച്ചുകൊന്നിട്ടുണ്ട്​. അതിനിടെ, ഉറി സെക്​ടറിൽ പാക്​ സൈന്യം വെടിനിർത്തൽ ലംഘിച്ച്​ ഇന്ത്യൻ സുരക്ഷാസേനക്കു നേരെ വെടിവെപ്പുനടത്തിയതായി സൈന്യം അറിയിച്ചു.