ഡൽഹിയിലെ സ്​കൂളിൽ ആറുവയസുകാരി പീഡനത്തിനിരയായി

ന്യൂഡല്‍ഹി: സൗത്ത്​ ഡല്‍ഹിയിലെ സ്വകാര്യ സ്‌കൂളില്‍ ആറുവയസ്സുകാരി ലൈംഗിക പീഡനത്തിനിരയായി. സംഭവത്തിൽ സ്‌കൂളിലെ ഹൗസ്​ കീപ്പിങ്​ ജീവനക്കാരനെ പൊലീസ്​ അറസ്​റ്റു ചെയ്​തു.  

ബുധനാഴ്ച ഉച്ചകഴിഞ്ഞായിരുന്നു സംഭവം. ഒന്നാം ക്​ളാസ്​ വിദ്യാർഥിയാണ്​  സ്‌കൂളിലെ ​ശൗചാലയത്തിൽ വെച്ച്​ പീഡിപ്പിക്കപ്പെട്ടത്​. 
ശൗചാലയത്തില്‍ കുട്ടികളെ സഹായിക്കാന്‍ ചുമതലയുണ്ടായിരുന്ന സ്ത്രീ ആ സമയത്ത് അവിടെയുണ്ടായിരുന്നില്ല. കുട്ടി സഹായം ആവശ്യപ്പെട്ടപ്പോള്‍ ശൂചാലയത്തിന്​ സമീപത്തുണ്ടായിരുന്ന ഇയാൾ അകത്തെത്തുകയും കുട്ടിയെ ഉപദ്രവിക്കുകയുമായിരുന്നുവെന്ന്​ പെണ്‍കുട്ടിയുടെ രക്ഷിതാക്കൾ പറഞ്ഞു. 

വീട്ടിലെത്തിയ കുട്ടി അമ്മയോട് സംഭവത്തെ കുറിച്ച്​ പറഞ്ഞു. തുടര്‍ന്ന് മാതാപിതാക്കള്‍ സ്‌കൂളിലെത്തി പ്രിന്‍സിപ്പാളിനെ ഇക്കാര്യം അറിയിക്കുകയും പൊലീസിൽ പരാതി നൽകുകയുമായിരുന്നു. എയിംസിൽ നടത്തിയ വൈദ്യപരിശോധനയില്‍ പെണ്‍കുട്ടി പീഡിപ്പിപ്പെട്ടതായി കണ്ടെത്തിയിട്ടുണ്ട്. പോക്‌സോ നിയമപ്രകാരമാണ് ജീവനക്കാരനെതിരെ കേസ് എടുത്തിട്ടുള്ളത്. ഇയാൾ മൂന്നുമാസം മുമ്പാണ്​ സ്​കൂളിൽ ജോലിക്കെത്തിയത്​.
കഴിഞ്ഞമാസം ഗുഡ്ഗാവിലെ റയാന്‍ ഇന്റര്‍നാഷണല്‍ സ്‌കൂളിലെ ശൗചാലയത്തില്‍ പ്രദ്യുമ്‌നന്‍ എന്ന ഏഴുവയസ്സുകാരനെ കൊല്ലപ്പെട്ട നിലയില്‍ കണ്ടെത്തിയിരുന്നു.