794 മുറി, 11 നില; ലഹരി പാർട്ടി നടന്ന​ കൊർഡെലിയ കപ്പലിൽ കൊട്ടാര സമാന സൗകര്യങ്ങൾ

മുംബൈ: ബോളിവുഡ്​ സൂപ്പർ സ്റ്റാർ ഷാരൂഖ്​ ഖാന്‍റെ മകൻ ആര്യൻ ഖാൻ അടക്കമുള്ള പ്രമുഖർക്ക്​ പങ്കുണ്ടെന്ന്​ കരുതുന്ന ലഹരി പാർട്ടി നടന്നത്​ ഒഴുകുന്ന ആഡംബര കൊട്ടാരത്തിൽ. 794 റൂമുകളുള്ള, ഫൈവ്​സ്​റ്റാറിന്​ സമാനമായ എല്ലാ സൗകര്യങ്ങളുമുള്ള കപ്പലാണ്​ ലഹരി പാർട്ടി നടത്തിയ കൊർഡെലിയ​ (cordelia). മുംബൈ -കൊച്ചി​​ സർവിസും ഇവർ നടത്തുന്നുണ്ട്​​.

അമേരിക്കൻ കമ്പനിയായ റോയൽ കരീബിയൻെറ പഴയ ക്രൂയിസ്​ കപ്പലാണിത്​. പക്ഷേ, എല്ലാ ആധുനിക സൗകര്യങ്ങളും 11 നിലയുള്ള ഈ കപ്പലിൽ സജ്ജീകരിച്ചിട്ടുണ്ട്​. സ്വിമ്മിങ്​ പൂൾ, ബാറുകൾ, റെസ്റ്റോറൻറ്, ഫിറ്റ്നസ് ഏരിയ, പ്ലേയിങ്​ ഏരിയ, ഷോപ്പിങ് കേന്ദ്രങ്ങൾ, കാസിനോ, തിയറ്ററുകൾ തുടങ്ങിയവയെല്ലാം ഈ ഒഴുകും കൊട്ടാരത്തിലുണ്ട്​. കെൽറ്റിക്​ ഭാഷയിൽ​ കടലിൻെറ മകളെന്നാണ്​​ 'കൊർഡെലിയ'യുടെ അർത്ഥം.

1800 യാത്രക്കാരെ വഹിക്കാൻ കഴിയും. എണ്ണൂറോളം ജീവനക്കാരും ഇതിലുണ്ട്​. കു​ട്ടികൾക്കായുള്ള വലിയ ​േപ്ല​ ഏരിയയും മുകളിലേക്ക്​ പോകാനും ഇറങ്ങാനും ലിഫ്​റ്റുകളുമുണ്ട്​. ലൈവ്​ മ്യൂസിക്​ ഷോ, ക്വിസ്​ ​മത്സരങ്ങൾ, ഗെയിമുകൾ എന്നിവയും യാത്രക്കാർക്കായി ഒരുക്കിയിരിക്കുന്നു​.

ഇന്ത്യൻ റെയി​ൽവേക്ക്​ കീഴിലെ ഐ.ആർ.സി.ടി.സിയാണ് കൊർഡെലിയ ക്രൂയിസ്​ കപ്പൽ​ സർവിസ്​ ഓപറേറ്റ്​ ചെയ്യുന്നത്​. രണ്ട്​ രാത്രിയും ഒരു പകലും നീളുന്ന കപ്പൽ യാത്രക്ക് മുംബൈയിൽ നിന്ന്​​ 20,000 രൂപ മുതലുള്ള പാക്കേജുകളാണുള്ളത്​. ​കൊച്ചിയിൽനിന്ന്​ 30,000 രൂപ മുതലാണ് പാക്കേജ്​ ആരംഭിക്കുന്നത്​.

ലഹരി പാർട്ടിയുമായി ബന്ധമില്ലെന്ന് കൊർഡെലിയ

ലഹരി പാർട്ടിയുമായി ബന്ധമില്ലെന്ന് ആഡംബര കപ്പലായ​ കൊർഡെലിയ സി.ഇ.ഒ ജുർഗെൻ ബായ്​ലോം. ചില യാത്രക്കാരുടെ ബാഗേജിൽ നിന്നാണ്​ ലഹരിവസ്​തുക്കൾ കണ്ടെത്തിയത്​. ഇവരെ ഉടൻ തന്നെ കപ്പലിൽ നിന്ന്​ ഇറക്കി വിടുകയും ചെയ്​തിരുന്നു. ഇതുമൂലം കപ്പൽ വൈകിയതിൽ ക്ഷമ ചോദിക്കുകയാണെന്നും കമ്പനി സി.ഇ.ഒ പറഞ്ഞു.

പാർട്ടി നടത്തിയത്​ ഫാഷൻ ടി.വി

ലഹരി പിടികൂടിയ 'ക്രേ ആർക്ക്'​ എന്ന ഡി.ജെ പാർട്ടി നടത്തിയത്​ ഫാഷൻ ടി.വി. മിയാമിയിൽ നിന്നുള്ള ഡി.ജെ സതാൻ കോലേവ്​, ബുൽസിയ ബ്രോൺകോട്ട്​, ദീപേഷ്​ ശർമ്മ എന്നിവരുടെ പരിപാടികൾ ആദ്യദിവസമുണ്ടാവുമെന്നായിരുന്നു നോട്ടീസിൽ അറിയിച്ചിരുന്നത്​.

രണ്ടാം ദിവസം ഒരു മണി മുതൽ എട്ട്​ മണി വരെ ഐവറികോസ്റ്റിൽ നിന്നുള്ള ഡി.ജെ റാവോൽ കെ, ഇന്ത്യയിൽ നിന്നുള്ള ഡി.ജെ കോഹ്​റ, മൊറോക്കൻ കലാകാരൻ കയാസയും പരിപാടിയിൽ അവതരിപ്പിക്കുമെന്നാണ്​ അറിയിച്ചിരുന്നത്​. രാത്രി വിവിധ രാജ്യങ്ങളിൽ നിന്നുള്ള കലാകാരൻമാർ അവതരിപ്പിക്കുന്ന സംഗീത പരിപാടിയും ഉണ്ടാവുമെന്നും നോട്ടീസിലുണ്ട്​​. എന്നാൽ, പാർട്ടി തുടങ്ങി മണിക്കൂറുകൾക്കകം തന്നെ രഹസ്യവിവരത്തെ എൻ.സി.ബി സംഘം കപ്പൽ റെയ്​ഡ്​ ചെയ്യുകയായിരുന്നു.

പിടിച്ചെടുത്തത്​ വമ്പൻ ലഹരി വസ്​തുക്കൾ

മുംബൈയിൽ നിന്നും ഗോവയിലേക്ക്​ യാത്രതിരിച്ച കപ്പലിൽ നടത്തിയ റെയ്​ഡിൽ രണ്ട്​ സ്​ത്രീകളുൾപ്പടെ എട്ട്​ പേരാണ്​ ഇതിനകം അറസ്റ്റിലായത്​. എം.ഡി.എം.എ, എകാസ്​റ്റേ, കൊക്കൈയ്​ൻ, മെഡാഫെഡ്രോ, ചരസ്​ എന്നിവ പിടിച്ചെടുത്തിട്ടുണ്ടെന്ന്​ അധികൃതർ അറിയിച്ചു.

ശനിയാഴ്ച രാത്രിയാണ്​ മുംബൈ തീരത്തെ ക്രൂയിസ്​ കപ്പലിൽ എൻ.സി.ബി റെയ്​ഡ്​ നടത്തിയത്​. മൂന്നുദിവസത്തെ സംഗീത പരിപാടിക്കായിരുന്നു അനുമതി. ബോളിവുഡ്​, ഫാഷൻ, ബിസിനസ്​ രംഗത്തെ പ്രമുഖരാണ്​ പാർട്ടിയിൽ പങ്കാളികളായിരുന്നത്​. തുടർന്ന്​ നിരോധിത ലഹരി ഉൽപന്നങ്ങൾ ഉപയോഗിക്കുന്നുവെന്ന രഹസ്യ വിവരത്തെ എൻ.സി.ബി പരിശോധന നടത്തുകയായിരുന്നു. പരിശോധനയിൽ കോടിക്കണക്കിന്​ ലഹരിവസ്​തുക്കൾ കണ്ടെടുത്തു.