ത്രിപുരയിൽ ജാഗ്രത; 90 ശതമാനം സാമ്പിളുകളിലും ഡെൽറ്റ പ്ലസ്​

അഗർത്തല: ത്രിപുരയിൽ പരിശോധനക്ക്​ വിധേയമാക്കിയ 90 ശതമാനം സ്രവ സാമ്പിളുകളിലും ഡെൽറ്റ പ്ലസ്​ വകഭേദം. 151 സാമ്പിളുകൾ പരിശോധനക്ക്​ വിധേയമാക്കിയതിൽ 138 സാമ്പിളുകളിലും

അതിവ്യാപന ശേഷിയുള്ള ഡെൽറ്റ പ്ലസ്​ വകഭേദം ക​ണ്ടെത്തിയതായി കോവിഡ്​ നോഡൽ ഒാഫിസർ ഡോ. ദീപ്​ ദേബർമ അറിയിച്ചു.

രാജ്യത്തിന്‍റെ വടക്കുകിഴക്കൻ ഭാഗത്ത്​ ആദ്യമായാണ്​ ഡെൽറ്റ പ്ലസ്​ വകഭേദം സ്​ഥിരീകരിക്കുന്നത്​. ത്രിപുരയിൽനിന്ന്​ 151 സാമ്പിളുകൾ പശ്ചിമബംഗാളിലെ സർക്കാർ ലബോറട്ടറിയിലേക്ക്​ അയച്ചിരുന്നു. ഇതിൽ 138 കേസുകൾ​ ഡെൽറ്റ പ്ലസും മറ്റുള്ളവ ഡെൽറ്റ, ആൽഫ എന്നീ വകഭേദങ്ങളുമായിരുന്നു.

ത്രിപുരയിൽ ഇതുവരെ 56,169 പേർക്കാണ്​ കോവിഡ്​ സ്​ഥിരീകരിച്ചത്​. 574 മരണവും റിപ്പോർട്ട്​ ചെയ്​തു. 5152 പേരാണ്​ നിലവിൽ ചികിത്സയിലുള്ളതെന്നും ആരോഗ്യവകുപ്പ്​ അറിയിച്ചിരുന്നു.

അഞ്ചുശതമാനമാണ്​ കോവിഡ്​ പോസിറ്റിവിറ്റി നിരക്ക്​.