ഡി.എം.കെ നേതാവ്​ എ രാജയുടെ ഭാര്യ പരമേശ്വരി അന്തരിച്ചു

ചെന്നൈ: തമിഴ്​നാട്ടിൽ നിന്നുള്ള എം.പിയും ഡി.എം.കെ നേതാവുമായ എ രാജയുടെ ഭാര്യ എം.എ പരമേശ്വരി അന്തരിച്ചു. അർബുദ ബാധിതയായ പരമേശ്വരി ആറുമാസമായി ചെന്നൈയിൽ ചികിത്സയിലായിരുന്നു. പരമേശ്വരിയുടെ നിര്യാണത്തിൽ തമിഴ്​നാട്​ മുഖ്യമന്ത്രി എം.കെ.സ്​റ്റാലിൻ അനുശോചിച്ചു. പ്രതിസന്ധിഘട്ടങ്ങളിൽ എ.രാജയുടെ കൂടെ പരമേശ്വരി ഉറച്ചുനിന്നുവെന്ന്​ സ്​റ്റാലിൻ അനുശോചന സന്ദേശത്തിൽ പറഞ്ഞു.

ശനിയാഴ്​ന വൈകുന്നേരത്തോടെയായിരുന്നു അന്ത്യം. ദിവസങ്ങളായി ഗുരുതരാവസ്​ഥയിലായിരുന്ന പരമേശ്വരി വെൻറിലേറ്റർ സഹായത്തോടെയാണ്​ ജീവൻ നിലനിർത്തിയിരുന്നത്​. ശനിയാഴ്​ച പകൽ ആശുപത്രിയിൽ രാജയുടെ കുടുംബത്തെ മുഖ്യമന്ത്രി സ്​റ്റാലിൻ സന്ദർശിച്ചിരുന്നു.

എൻ.സി.പി നേതാവ്​ സുപ്രിയ സുലെ പരമേശ്വരിയോടൊപ്പമുള്ള ഒരു ചിത്രം ട്വീറ്റ്​ ചെയ്​താണ്​ അനുശോചനം അറിയിച്ചത്​. നീലഗിരിയിൽ നിന്നുള്ള എം.പിയായ എ രാജ നേരത്തെ കേന്ദ്രത്തിലെ യു.പി.എ സർക്കാറിൽ മന്ത്രിയായിരുന്നു.