ആധാർ ഭേദഗതി ബിൽ രാജ്യസഭയും പാസാക്കി

ന്യൂഡൽഹി: ലോക്​സഭ പാസാക്കിയ ആധാർ ഭേദഗതി ബിൽ സർക്കാർ ന്യൂനപക്ഷമായ രാജ്യസഭയും അനായാസം പാസാക്കി. കേരളത്തിൽ നി ന്നുള്ള സി.പി.എം എം.പി എളമരം കരീമി​​െൻറ ഭേദഗതി വോട്ടിനിട്ട്​ തള്ളിയപ്പോൾ മറ്റൊരു സി.പി.എം എം.പിയായ കെ.കെ. രാഗേ ഷ്​ ത​​െൻറ ഭേദഗതി സ്വയം പിൻവലിച്ചു. തൃണമൂൽ കോൺഗ്രസും​ ബില്ലിനെ എതിർത്തു.

മൊബൈൽ ഫോൺ കണക്​ഷനും ബാങ്ക്​ അക്കൗണ്ടിനുംവേണ്ടി ആധാർ തിരിച്ചറിൽ കാർഡായി സ്വമേധയാ സമർപ്പിക്കാൻ അനുവാദം നൽകുന്നതിനാണ്​ കേന്ദ്ര സർക്കാർ ഭേദഗതി കൊണ്ടുവന്നത്​. ആധാർ ഡാറ്റ സംബന്ധിച്ച ആധാർ നിയമത്തിലെ വ്യവസ്​ഥ ലംഘിക്കുന്ന സ്വകാര്യ കമ്പനികൾക്ക്​ ഒരു കോടി പിഴചുമത്താനുള്ള വ്യവസ്​ഥയും ഭേദഗതിയിലുണ്ട്​.

ആധാറിലെ ബയോമെട്രിക്​ വിവരങ്ങൾ ഒരിക്കലും പങ്കുവെക്കപ്പെടില്ലെന്നും പേരും ലിംഗവും വിലാസവും മാത്രമേ എല്ലാവർക്കും അറിയാനാകൂ എന്നും മന്ത്രി പറഞ്ഞു. ശ്രീകൃഷ്​ണ കമീഷൻ റിപ്പോർട്ടി​​െൻറ അടിസ്​ഥാനത്തിൽ ഡാറ്റ ദുരുപയോഗം ചെയ്യുന്നതിന്​ ഇപ്പോഴും നിയമം കൊണ്ടുവന്നില്ലെന്ന്​ കോൺഗ്രസ്​ നേതാക്കളായ അഭിഷേക്​ മനു സിങ്​​​വി, ജയറാം രമേശ്​ എന്നിവർ കുറ്റപ്പെടുത്തി. ഡാറ്റ കൈമാറ്റത്തിന്​ വ്യക്​തികളുടെ സമ്മതം വാങ്ങണമെന്ന ശിപാർശ നടപ്പാക്കാനുള്ള വ്യവസ്​ഥ ഭേദഗതിയിലില്ലെന്ന്​ സിങ്​​വി പറഞ്ഞു.

ആധാറി​​െൻറ പേരിൽ സ്വകാര്യതക്കു മേലുള്ള കടന്നുകയറ്റമാണ് സർക്കാർ നടത്തുന്നതെന്ന്​ സി.പി.​െഎ എം.പി ബിനോയ് വിശ്വം പറഞ്ഞു. പ്രതിപക്ഷം കൊണ്ടുവന്ന ആധാർ ബില്ലിനെ ഇപ്പോൾ അവർ ത​െന്ന എതിർക്കുകയാണെന്ന്​ കേന്ദ്ര നിയമ മന്ത്രി രവിശങ്കർ പ്രസാദ്​ പരിഹസിച്ചു.