‘ആരോഗ്യസേതു’ സ്​ഥിരമാക്കില്ല, വിവരങ്ങൾ ചോർന്നിട്ടില്ല -​േ​കന്ദ്ര സർക്കാർ

ന്യൂഡൽഹി: ആരോഗ്യസേതു ആപ്​ സുരക്ഷിതമാണെന്ന്​ കേന്ദ്രമന്ത്രി രവി ശങ്കർ പ്രസാദ്​. ആപിൽനിന്നും വിവരങ്ങൾ ചോർന്നിട്ടില്ലെന്നും സ്വകാര്യതയിലേക്ക്​ കടന്നുകയറുന്നില്ലെന്നും ആരോഗ്യസേതു ആപ്​ സുരക്ഷിതമാണെന്നും അദ്ദേഹം പറഞ്ഞു. വ്യക്തികളെ തിരിച്ചറിയാൻ ക​ഴിയാത്തവിധമാണ്​ സംവിധാനം. കോവിഡ്​ പ്രതിസന്ധി നേരിടാൻ മത്രമാണ്​ ആപ്​ നിർബന്ധമാക്കിയത്​. ആപ്​ സ്​ഥിരമാക്കില്ലെന്നും അദ്ദേഹം കൂട്ടിച്ചേർത്തു.  

ആപിലെ വിവരങ്ങൾ ചോരുമെന്ന കാര്യത്തിൽ ആശങ്ക​െപ്പടേണ്ടതില്ല. വിവിധ രാജ്യങ്ങൾ ഇത്തരത്തിൽ കോവിഡ്​ 19മായി ബന്ധപ്പെട്ട്​ ആപ്ലിക്കേഷനുകൾ പുറത്തിറക്കിയിട്ടുണ്ടെന്നും ​അദ്ദേഹം പറഞ്ഞു. 

അതേസമയം, കോവിഡ്​ രോഗികളെ നിരീക്ഷിക്കാൻ പുറത്തിറക്കിയ ആരോഗ്യസേതു ആപിൽ സുരക്ഷ വീഴ്​ചയെന്ന്​ വിദഗ്​ധർ ചൂണ്ടിക്കാട്ടിയിരുന്നു. മറ്റു രാജ്യങ്ങളിലെ കോൺടാക്​ട്​ ട്രേസിങ്​ ആപുകൾ അപേക്ഷിച്ച്​ ഇതിന്​ നിലവാരം കുറവാണെന്നും പറയപ്പെടുന്നു.

രാജ്യത്തെ എല്ലാ സർക്കാർ -സ്വകാര്യ സ്​ഥാപനങ്ങളിലെയും ജീവനക്കാർക്ക്​ ആരോഗ്യ സേതു ആപ്​ നിർബന്ധമാക്കി കേന്ദ്രസർക്കാർ ഉത്തരവിട്ടിരുന്നു. ഫോണുകളിൽ മേയ്​ നാലുമുതൽ ആരോഗ്യസേതു ആപ്പ്​ ഉണ്ടായിരിക്കണ​െമന്നായിരുന്നു​ കേന്ദ്ര ആഭ്യന്തര മന്ത്രാലയത്തി​​​​​​​​െൻറ നിർദേശം. ഏതെങ്കിലും ജീവനക്കാരുടെ ഫോണിൽ ആപ്​ ഇല്ലെന്ന്​ ക​ണ്ടെത്തിയാൽ അതി​​​​​​​​െൻറ ഉത്തരവാദിത്തം കമ്പനി മേധാവിക്കായിരിക്കുമെന്നും മന്ത്രാലയം വ്യക്തമാക്കിയിരുന്നു. നേരത്തേ, ഭക്ഷണം ഡെലിവറി ചെയ്യുന്നവർക്കും ​വിവിധ സേവനങ്ങൾ നൽകുന്നവർക്കും മാത്രമായിരുന്നു ആരോഗ്യ സേതു നിർബന്ധമാക്കിയിരുന്നത്​. 

ആരോഗ്യ സേതു ആപിനെതിരെ കോൺഗ്രസ്​ നേതാവ്​ രാഹുൽ ഗാന്ധി രംഗത്തെത്തിയിരുന്നു. ആരോഗ്യ സേതു വിവരങ്ങളുടെ  സുരക്ഷ, സ്വകാര്യത എന്നിവയിൽ ആശങ്ക ഉയർത്തുന്നു. സ്വകാര്യ ഏജൻസിക്കാണ്​ ആരോഗ്യ സേതു ആപി​​​​​​െൻറ നടത്തിപ്പു ചുമതല. പൗരന്മാരുടെ അനുമതിയില്ലാതെ വിവരശേഖരണം നടത്തുന്ന രീതി ഭയാനകമാണെന്നും രാഹുൽ ഗാന്ധി കുറ്റപ്പെടുത്തിയിരുന്നു.