നോയിഡയിൽ ആരോഗ്യസേതു നിർബന്ധം; ആപില്ലെങ്കിൽ ആറുമാസം തടവും 1000 രൂപ പിഴയും

നോയിഡ: നോയിഡയിൽ സ്​മാർട്ട്​ ഫോണുകളിൽ ആരോഗ്യ സേതു ആപ്​ ഇൻസ്​റ്റാൾ ചെയ്യാത്താവർക്ക്​ തടവും പിഴയും. ഫോണിൽ ആപ്​ ഇൻസ്റ്റാൾ ചെയ്​തില്ലെങ്കിൽ 1000 രൂപ പിഴ ഈടാക്കാമെന്നും ആറുമാസം വരെ തടവുശിക്ഷ നൽകാവുന്ന കുറ്റമാണെന്നും ​പൊലീസ്​ പുറത്തിറക്കിയ സർക്കുലറിൽ പറയുന്നു.

ആപ്ലിക്കേഷൻ ഇൻസ്​റ്റാൾ ചെയ്യാതെ പുറത്തിറങ്ങിയാൽ ലോക്​ഡൗൺ ലംഘനമായി കണക്കാക്കി ശിക്ഷ നൽകുമെന്ന്​ നോയിഡ പൊലീസ്​ എ.സി.പി അഖിലേഷ്​ സിങ്​ പറഞ്ഞു. കോവിഡ്​ രോഗിക​െള നിരീക്ഷിക്കാനാണ്​ കേന്ദ്രസർക്കാർ ആരോഗ്യ സേതു ആപ്​ പുറത്തിറക്കിയത്​. ഏകദേശം എട്ടുകോടി ജനങ്ങൾ ആപ്​ ഡൗൺലോഡ്​ ചെയ്​തുകഴിഞ്ഞു. 

അതേസമയം ആരോഗ്യസേതു സുരക്ഷിതമല്ലെന്നും വിവരങ്ങൾ ചോർത്തുമെന്നും ചൂണ്ടിക്കാട്ടി നിരവധി വിദഗ്​ധർ രംഗത്തെത്തിയിരുന്നു. എന്നാൽ ആപിൽനിന്നും വിവരങ്ങൾ ചോർന്നിട്ടില്ലെന്നും സുരക്ഷ വീഴചയില്ലെന്നും കേന്ദ്രസർക്കാർ അറിയിച്ചു.