പശുവിൻെറ വായ്​ തകർന്ന സംഭവം; ഉപയോഗിച്ചത്​ വീട്ടുനിർമിത ബോംബ്​

ധരംശാല: ഹിമാചലിൽ പശുവിൻെറ വായ്​ തകർന്ന സംഭവത്തിൽ പ്രതികൾ ഉപയോഗിച്ചത്​ വീട്ടിൽ നിർമിച്ച ബോംബാണെന്ന്​ പൊലീസ്​. പൊട്ടാസ്യം നൈട്രേറ്റും സൾഫറു​ം ചേർത്ത് വീട്ടിൽ​ നിർമിച്ച ബോംബ്​ ഗോതമ്പുണ്ടയിലാക്കി പശുവിന്​ നൽകുകയായിരുന്നു. 

വയലിലെ കൃഷി നശിപ്പിക്കാനെത്തുന്ന വന്യജീവികളെ തുരത്തുന്നതിനാണ്​ ഇത്തരത്തിൽ ഗോതമ്പുണ്ടയിൽ പൊതിഞ്ഞ നിലയിൽ സ്​​േഫാടകവസ്​തു കൃഷിയിടത്തിൽ സൂക്ഷിച്ചതെന്ന്​ പ്രതി നന്ദലാൽ പൊലീസിനോട്​ പറഞ്ഞു. നന്ദലാലിനെതിരെ മൃഗങ്ങളോടുള്ള ക്രൂരത തടയൽ നിയമ​പ്രകാരം കേസെടുത്തിട്ടുണ്ട്​. 

ഹിമാചൽ പ്രദേശിലെ ബിലാസ്​പൂർ പ്രദേശത്ത്​ മേയ്​ 26നാണ്​ സംഭവം. സ്​ഫോടക വസ്​തുവിൽ പൊതിഞ്ഞ ഗോതമ്പുണ്ട കഴ​ിച്ച പശുവിൻെറ വായ്​ തകരുകയായിരുന്നു. വായിൽനിന്ന്​ ചോരയൊലിച്ച്​ നിൽക്കുന്ന പശു​വിൻെറ വിഡിയോ ഉടമസ്​ഥൻ സമൂഹമാധ്യമങ്ങളിൽ പങ്കുവെച്ചിരുന്നു. 

ഹിമാചലിൽ കൃഷി നശിപ്പിക്കാനെത്തുന്ന മൃഗങ്ങളെ തുരത്തുന്നതിനായി വ്യാപകമായി കെണി ഉപയോഗിച്ചുവരുന്നുണ്ട്​. വലയിൽ കുടുക്കുകയും വിഷം വെക്കുകയും വൈദ്യുത വേലി കെട്ടുകയും ചെയ്യുന്നുണ്ട്​. മിക്കവാറും കുരങ്ങൻ, മുയൽ, കുറുനരി, കാട്ടുപന്നി തുടങ്ങിയവയാണ്​ ഇത്തരത്തിലുള്ള കെണിയിൽ അകപ്പെടാറ്​.