​ 20 വർഷം പഴക്കമുള്ള കേസിൽ വിവരാവകാശ പ്രവർത്തകന്​ തടവ്​

ജയ്​പൂർ: വിവരാവകാശ പ്രവർത്തകൻ നിഖിൽ ദേവിന്​ 20 വർഷം മുമ്പുള്ള കേസിൽ നാലു മാസത്തെ തടവു ശിക്ഷക്ക്​ വിധിച്ചു. നിഖിൽ ദേവ്​ ഉൾപ്പെടെ അഞ്ച്​ വിവരാവകാശ പ്രവർത്തകരെയാണ്​ രാജസ്ഥാൻ ഹൈകോടതി തടവുശിക്ഷക്ക്​ വിധിച്ചത്​. 1998 മേയിൽ രജിസ്​റ്റർ ചെയ്​ത​ ‘അതിക്രമിച്ചു കയറി ഉപദ്രവമേൽപ്പിച്ചു’വെന്ന കേസിലാണ്​ സാമൂഹിക പ്രവർത്തകർക്ക്​ തടവ്​ ശിക്ഷ വിധിച്ചിരിക്കുന്നത്​.

ജയ്​പൂരിന്​ സമീപമുള്ള ഗ്രാമപ്രദേശങ്ങളിലെ വികസനപ്രവർത്തനങ്ങൾക്കായി ഫണ്ട്​ വിനിയോഗിച്ചതിൽ അഴിമതി നടന്നുവെന്ന ആ​രോപണത്തിൽ അന്വേഷണം നടത്തവെയാണ്​ നിഖിൽ ദേവ്​ ഉൾപ്പെടെയുള്ളവർക്കെതിരെ കേസെടുത്തത്​. സർപഞ്ചായ പ്യാരിലാൽ വീടുകളിൽ ശൗചാലയം നിർമിക്കുന്നതിനും മറ്റ്​ പ്രവർത്തനങ്ങൾക്കുമായി ലഭിച്ച സർക്കാർ ഫണ്ട്​ അർഹതപ്പെട്ടവർക്ക്​ നൽകാതെ തിരിമറി നടത്തിയിരുന്നു. തുടർന്ന്​ ​മേയ്​ ആറിന്​ നിഖിൽ ദേവ്​ ഉൾപ്പെടെയുള്ള അഞ്ചംഗ സംഘം ഗ്രാമത്തിലെത്തുകയും സർക്കാർ പദ്ധതികൾക്കായി ഫണ്ട്​ ഉപയോഗിച്ചതി​​​െൻറ രേഖകൾ ആവശ്യപ്പെടുകയുമായിരുന്നു.

ഒാഫീസ്​ അവധിയാണെന്ന കത്തു കിട്ടിയതിനാൽ പ്രവർത്തകർ സർപഞ്ചി​​​െൻറ വീട്ടിലേക്ക്​ പോവുകയായിരുന്നു. എന്നാൽ ത​​​െൻറ വീട്ടിൽ അതിക്രമിച്ചു കയറി ഉപദ്രവിച്ചെന്നു കാണിച്ച്​ സർപഞ്ച്​ പ്യാരിലാൽ വിവരാവകാശ പ്രവർത്തകർക്കെതിരെ കേസ്​ രജിസ്​റ്റർ ചെയ്യുകയായിരുന്നു. ഇൗ കേസിലാണ് നിഖിൽ ദേവ്​ ഉൾപ്പെടെയുള്ളവർക്ക്​ ഹൈകോടതി ശിക്ഷ വിധിച്ചിരിക്കുന്നത്​.