'ഇസ്ലാമിന്‍റെ അവിഭാജ്യ ഘടകം അറിയാനല്ല കോടതിയിൽ പോയത്​'; ഹിജാബ്​ വിധിക്കെതിരെ ആക്ടിവിസ്റ്റുകളും വിദ്യാർഥികളും

ന്യൂഡൽഹി: ഇസ്ലാമിന്‍റെ അവിഭാജ്യ ഘടകം അറിയാൻ മുസ്​ലിംകൾക്ക്​ കോടതിയിൽ പോകേണ്ട കാര്യമില്ലെന്നും അതറിയാൻ മതപണ്ഡിതരുടെ അടുത്തേക്കാണ്​ പോകുകയെന്നും സാമൂഹിക പ്രവർത്തക ഖാലിദ അബ്ബ. ഹിജാബ്​ ഇസ്​ലാമിന്‍റെ അവിഭാജ്യഘടകമാണോ എന്നറിയാനല്ല മുസ്​ലിം പെൺകുട്ടികൾ ഹൈ​കോടതിയിൽ പോയത്​. അതിനാൽ വിധിയിൽ നിരാശയും രോഷവുമുണ്ട്​ എന്നും അവർ കുട്ടിച്ചേർത്തു. ​

മുസ്​ലിം വനിതാ ആക്ടിവിസ്റ്റുകളും വിദ്യാർഥികളും ന്യൂഡൽഹി പ്രസ്​ ക്ലബിൽ നടത്തിയ വാർത്തസമ്മേളനത്തിൽ​ കർണാടക വിധിക്കെതിരെ രൂക്ഷവിമർശനമാണ്​ നടത്തിയത്​.

ഹൈകോടതി വിധി സ്വീകാര്യമല്ല. അത് കൊണ്ടാണ് സുപ്രീംകോടതിയിൽ നിയമയുദ്ധത്തിന്​ വരുന്നത്​. യൂനിഫോമിന് എതിരല്ല. എന്നാൽ യൂനിഫോം എല്ലാ വിഭാഗങ്ങളെയും ഉൾക്കൊള്ളണം. കർണാടക ഹൈകോടതി വിധിയെ തുടർന്ന്​ രാജ്യത്തിന്‍റെ ഏത്​ ഭാഗത്തും ആൾകൂട്ട ആക്രമണം ഉണ്ടാകാവുന്ന സാഹചര്യം സൃഷ്ടിച്ചതിന്​ സർക്കാർ ആയിരിക്കും ഉത്തരവാദി. ഭരണഘടനയും ജനാധിപത്യവുമാണ്​ ഞങ്ങൾ സംസാരിക്കുന്നത്.

എന്നാൽ മാധ്യമങ്ങൾ കൊച്ചു കുട്ടികളെ പോലും പീഡിപ്പിക്കുകയാണെന്നും ചാനൽ ആങ്കർമാർ ജഡ്ജിമാർ ആകുകയാണെന്നും അവർ വിമർശിച്ചു. ഹിജാബിന്‍റെ പേരിൽ മുസ്ലിം സ്ത്രീകൾക്ക് നേരെ കർണാടകയിൽ വർഷങ്ങളായി നടന്നുകൊണ്ടിരിക്കുന്ന ആക്രമം നിയമപരമാക്കുകയാണ് ഹൈകോടതി ചെയ്തതെന്ന്​ വിദ്യാഭ്യാസ പ്രവർത്തക നബിയ ഖാൻ വിമർശിച്ചു. കർണാടകയിലെ മുസ്​ലിം സ്ത്രീകൾ വേഷത്തിന്‍റെ കാര്യത്തിൽ അനുഭവിക്കുന്ന വിവേചനം പുതിയതല്ല എന്നാണ് ഇ​തേ കുറിച്ച്​ നടത്തിയ വസ്തുതാന്വേഷണ റിപ്പോർട്ട്​ പറയുന്നത്​.

2009ൽ ബജ്റങ്ദൾ പരസ്യമായി ഹിജാബിനെതിരെ രംഗത്തുവന്നു തുടങ്ങിയിട്ടുണ്ട്​. 2016ൽ മംഗലാപുരം ശ്രീനിവാസ് കോളജ്​ ഹിജാബ്​ വിലക്കിയത്​ മൂലം ശിരോവസ്ത്രം ധരിക്കുന്ന വിദ്യാർഥികൾക്ക്​ പഠനം നിർത്തി വേറെ കോളജിലേക്ക് പോകേണ്ടി വന്നിരുന്നു. വിദ്യാർഥികളെ ഹിജാബ് ധരിച്ച് പരീക്ഷ എഴുതാൻ അനുവദിക്കണമെന്ന്​ അവർ ആവശ്യപ്പെട്ടു. മുസ്​ലിം പെൺകുട്ടികൾക്ക്​ ഹിജാബാണോ വിദ്യാഭ്യാസമാണോ വേണ്ടത്​ എന്ന ചോദ്യം ഉയർത്തുമ്പോൾ രണ്ടും ഒരുമിച്ച്​ തന്നെ കൊണ്ടുപോകും എന്ന ഉത്തരമാണ്​ തങ്ങൾക്ക്​ നൽകാനുള്ളതെന്ന്​ വിദ്യാർഥി നേതാവ്​ സിംറ അൻസാരി വ്യക്​തമാക്കി.

വിദ്യാഭ്യാസമാണോ അസ്തിത്വമാണോ വേണ്ടതെന്ന ചോദ്യത്തിന്​ പ്രസക്​തിയില്ല. മുസ്ലിം സ്ത്രീകളെ അടിച്ചമർത്തലിൽ നിന്ന് മോചിപ്പിക്കണമെന്ന്​ പറയുന്നവർ അവർ പൊതു ഇടത്തിലേക്ക് വരുമ്പോൾ തിരിച്ചോടിക്കുകയാണ്​. ഹൈകോടതി വിധി മുസ്​ലിം വിദ്യർഥിനികളുടെ മനോബലം തകർക്കുന്നതാണെന്നും സ്ത്രീകളുടെ ഏജൻസി ചോദ്യം ചെയ്യുന്നതാണെന്നും ഹുമ മസീഹ്​ പറഞ്ഞു. ഹിജാബ്​ അണിഞ്ഞ മുസ്​ലിം സ്ത്രീകൾക്ക് എതിരെ കർണാടകയിൽ കൈയേറ്റം നടന്നിട്ടു പോലും ഇടപെടാതിരുന്ന ദേശീയ വനിതാ കമീഷൻ വിവാദ വിധിയെ സ്വാഗതം ചെയ്തിരിക്കുകയാണ്​. സുപ്രീംകോടതിതിൽ നീതി ലഭിക്കുമെന്ന വിശ്വാസം ഉണ്ട്.

രാജ്യത്തെ പല കാമ്പസുകളും ഈ വിധി പിന്തുടർന്നാൽ നിരവധി മുസ്ലിം പെൺകുട്ടികൾ വിദ്യാഭ്യാസത്തിൽ നിന്ന് പുറത്താകും എന്ന്​ ജാമിഅ മില്ലിയ ഇസ്​ലാമിയ വിദ്യാർഥി ഹിബ വി പറഞ്ഞു. ഹിജാബിനെ മതേതരത്വത്തിന്‍റെയും മറുഭാഗത് നിർത്തുകയാണ്. പൗരത്വ ഭേദഗതി നിയമത്തിനെതിരെ സമരം നടന്നപ്പോൾ വേഷത്തിൽ നിന്ന്​ സമരക്കാരെ തിരിച്ചറിയാമെന്ന്​ പ്രധാനമന്ത്രി പറഞ്ഞത്​ ഹിജാബ്​ ഉദേശിച്ചായിരുന്നുവെന്നും ഹിബ പറഞ്ഞു.