ഗർഭിണിയായ കടുവയെ ക്രൂരമായി കൊലപ്പെടുത്തി വേട്ടക്കാർ; പ്രതിഷേധവുമായി മൃഗസ്​നേഹികൾ

മുംബൈ: ഗർഭിണിയായ കടുവയെ വേട്ടക്കാർ കൊലപ്പെടുത്തിയതിൽ പ്രതിഷേധം ശക്​തമാവുന്നു. മഹാരാഷ്​ട്രയിലെ യുവാത്​മലിലാണ്​ ഗർഭിണിയായ കടുവ കൊല്ലപ്പെട്ടത്​. ഞായറാഴ്​ചയാണ്​ സംഭവം നടന്നതെങ്കിലും പുറംലോകമറിഞ്ഞത്​ ഒരു ദിവസത്തിന്​ ശേഷമാണ്​. കടുവയുടെ മുൻ കാലുകൾ നഖത്തിനായി വേട്ടക്കാർ മുറിച്ച്​ കൊണ്ട്​ പോവുകയും ചെയ്​തു​.

സംഭവത്തിൽ പൊതുജനങ്ങളിൽ നിന്ന്​ പ്രതിഷേധം ഉയർന്ന്​ വരണമെന്നും കർശനമായ നടപടി വേണമെന്നും​ വൈൽഡ്​ ലൈഫ്​ സ്​റ്റേറ്റ്​ ബോർഡ്​ അംഗം കിഷോർ റിതെ ആവശ്യപ്പെട്ടു. 30 വർഷത്തിനിടയിൽ ഒരിക്കൽ മാത്രമാണ്​ ഗർഭിണിയായ കടുവ കൊല്ലപ്പെട്ടിട്ടുള്ളത്​. 2004ൽ വൈദ്യുതാഘാതമേറ്റായിരുന്നു മരണം. എന്നാൽ, ഇത്​ വളരെ ക്രൂരമായി പോ​യെന്ന്​ അദ്ദേഹം പറഞ്ഞു.

വിദഗ്​ധ ഡോക്​ടർമാരുടെ നേതൃത്വത്തിൽ നടക്കുന്ന പോസ്​റ്റ്​മാർട്ടത്തിൽ മാ​ത്രമേ കടുവ എങ്ങനെയാണ്​ കൊല്ലപ്പെട്ടതെന്നത്​ സംബന്ധിച്ച്​ കൂടുതൽ വിവരങ്ങൾ പുറത്ത്​ വരുവെന്ന്​ മഹാരാഷ്​ട്ര വനംവകുപ്പ്​ അധികൃതർ അറിയിച്ചു.

കാടിനുള്ളിലെ ഗുഹയിലെത്തിയ കടുവക്ക്​ പുറത്ത്​ പോകാനാവാത്ത വിധം കല്ലുകളും മുളയും കൊണ്ട്​ തടസം സൃഷ്​ടിച്ചതിന്​ ശേഷമാണ്​ കൊലപ്പെടുത്തിയതെന്നാണ്​ സൂചന. കടുവ ചത്തുവെന്ന്​ ഉറപ്പാക്കാനായി മൂർച്ചയേറിയ ആയുധം കൊണ്ട്​ ശരീരത്തിൽ മുറിവേൽപ്പിച്ചിട്ടുണ്ട്​. ഇതിന്​ ശേഷമാണ്​ കാലുകൾ വെട്ടി​യെടുത്തത്​.