യു.പിയിൽ കോവിഡ്​ ബാധിച്ച്​ മരിച്ച മെഡിക്കൽ ഓഫിസറുടെ മൃതദേഹം മാറിനൽകി; തിരിച്ചറിഞ്ഞത്​ ദഹിപ്പിക്കുന്നതിന​ിടെ

വാരണാസി: ഉത്തർപ്രദേശിലെ വാരണാസിയിൽ കോവിഡ്​ ബാധിച്ച്​ മരിച്ച അഡീഷനൽ ചീഫ്​ മെഡിക്കൽ ഓഫിസറുടെ​ ബന്ധുക്കൾക്ക്​ കൈമാറിയത്​ മറ്റൊരു മൃതദേഹം. പ്രധാനമന്ത്രി ​നരേന്ദ്രമോദിയുടെ മണ്ഡലമായ വാരണാസിയിലെ ബനാറസ്​ ഹിന്ദു ആശുപത്രിയിലാണ്​ സംഭവം. കോവിഡ്​ സ്​ഥിരീകരിച്ച്​ ചികിത്സയിലായിരുന്ന എ.സി.എം.ഒ ഡോ. ജങ്​ ബഹദൂർ സിങ്​ ചൊവ്വാഴ്​ച രാത്രിയാണ്​ മരിച്ചത്​.

ബുധനാഴ്​ചയാണ്​ ബന്ധുക്കൾക്ക്​ മൃതദേഹം വിട്ടുനൽകിയത്​. എ.സി.എം.ഒയുടെ മൃത​ദേഹം സംസ്​കരിക്കാനായി ഹരിശ്ചന്ദ്ര ഘട്ടിൽ എത്തിക്കുകയും ചിതയൊരുക്കുകയും ചെയ്​തു. മൃതദേഹം പാതി കത്തിയതോടെ ഗാസിപ്പൂരിൽ കോവിഡ്​ ബാധിച്ച്​ മരിച്ച മറ്റൊരു വ്യക്തിയുടെ ബന്ധുക്കൾ സ്​ഥലത്തെത്തുകയും എ.സി.എം.ഒയുടെ മൃതദേഹം അല്ലെന്ന്​ അറിയിക്കുകയുമായിരുന്നു. പാതികത്തിയ മൃതദേഹത്തിൽനിന്ന്​ തുണി മാറ്റിയതോടെ ബന്ധുക്കൾ ഞെട്ടി. മൃതദേഹം മാറിയതായി​ മനസിലാക്കിയ ബന്ധുക്കൾ ആശുപത്രി മോർച്ചറിയി​െലത്തി എ.സി.എം.ഒയ​ുടെ മൃതദേഹം ഏറ്റുവാങ്ങി. പാതി കത്തിയ മൃതദേഹം ബന്ധുക്കൾ അവിടെതന്നെ സംസ്​കരിച്ചു.

ജില്ലയിലെ എല്ലാ കോവിഡ്​ ആശുപത്രികളിലും മതിയായ സൗകര്യം ഒരുക്കുന്നതിൻെറ ഉത്തരവാദിത്തം എ.സി.എം.ഒക്കായിരുന്നു. ഒരാഴ്​ചമുമ്പ്​ ഇ​ദ്ദേഹത്തിന്​ രോഗം സ്​ഥിരീകരിക്കുകയും സ്വകാര്യ ആശുപത്രിയിൽ പ്രവേശിക്കുകയും ചെയ്​തു. പിന്നീട്​​ കോവിഡ്​ പരിശോധന ഫലം ആദ്യം നെഗറ്റീവായിരുന്നെങ്കിലും വീണ്ടും പോസിറ്റീവാകുകയായിരുന്നു. തുടർന്ന്​ എ.സി.എം.ഒയെ ബി.എച്ച്​.യു ആശുപത്രി ഐ.സി.യുവിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

കോവിഡ്​ ബാധിച്ച്​ മരിച്ചതിനാൽ ഇരുവ​രുടെയും മൃതദേഹം മാനദണ്ഡങ്ങൾ പാലിച്ച്​ പൊതിഞ്ഞിരുന്നു. ഇതേതുടർന്ന്​ ഗാസിപുരിൽ ബുധനാഴ്​ച രാവിലെ മരിച്ച വ്യക്തിയുടെയും എ.സി.എം.ഒയുടെയും മൃതദേഹം മോർച്ചറിയിൽവെച്ച്​ മാറിപ്പോകുകയായിരുന്നുവെന്ന്​ അധികൃതർ അറിയിച്ചു.