ദലിതരോടും ന്യൂനപക്ഷങ്ങളോടുമ​ുള്ള കാഴ്​ചപ്പാട്​ മാറ്റാൻ ബി.ജെ.പി തയാറാകണമെന്ന്​​ രാംവിലാസ്​ പസ്വാൻ

പട്​ന: ഉത്തർ പ്രദേശ്​ ഉപതെരഞ്ഞെടുപ്പിലെ ബി.ജെ.പിയുടെ മങ്ങിയ പ്രകടനം മുന്നറിയിപ്പാണെന്ന്​ കേന്ദ്രമന്ത്രിയും  ലോക്​ ജനശക്​തി നേതാവുമായ രാംവിലാസ്​ പസ്വാൻ. സമൂഹത്തിലെ ചില മേഖലകളിൽ പാർട്ടിയുടെ പ്രതിഛായ വർധിപ്പിക്കേണ്ടതുണ്ടെന്നാണ്​ യു.പി ഉപതെരഞ്ഞെടുപ്പ്​ ഫലം നൽകുന്ന മുന്നറിയി​പ്പ്​. തെരഞ്ഞെടുപ്പ്​ അടുത്ത ഇൗ സമയത്ത്​ എൻ.ഡി.എ നേതാക്കൾ വായിൽ വരുന്നത്​ വിളിച്ചു പറയുന്ന സ്വഭാവം നിർത്തി നയപരമായി ഇടപെടണമെന്നും രാം വിലാസ്​ പസ്വാൻ പറഞ്ഞു. 

ബിഹാറിലെ തെര​െ​ഞ്ഞടുപ്പ്​ ഫലം പ്രതീക്ഷിച്ചതാണ്​. എന്നാൽ യു.പിയിലെ ഫലം ഞെട്ടലുളവാക്കുന്നു. കേന്ദ്രത്തിലും സംസ്​ഥാനത്തും ജനകീയ സർക്കാർ ഭരണത്തിലിരുന്നിട്ടും യു.പിയിൽ രണ്ട്​ സീറ്റും പാർട്ടിക്ക്​ നഷ്​ടമായിയെന്നും പസ്വാൻ ഒാർമിപ്പിച്ചു. 

ബി.ജെ.പി ന്യുനപക്ഷങ്ങളോടും ദലിതരോടുമുള്ള കാഴ്​ചപ്പാട്​ മാറ്റണം. ബി.ജെ.പിയിൽ മതേതര നേതാക്കളില്ലേ. സുശീൽ മോദി, രാം കൃപാൽ യാദവ്​ എന്നിവരുടെ ശബ്​ദം പുറത്തു കേൾക്കാതിരിക്കുകയും മറ്റു ചിലരുടെ വാക്കുകൾക്ക്​ ശ്രദ്ധ ലഭിക്കുകയും ചെയ്യുന്നത്​ എന്തുകൊണ്ടാണെന്നും പസ്വാൻ ചോദിച്ചു. 

ദലിതർക്കും ബ്രാഹ്​മണർക്കും മുസ്​ലിംകൾക്കും വേണ്ടി യാഥാർഥത്തിൽ ഒന്നും ചെയ്യാതെ തന്നെ ദീർഘകാലം ഇവരുടെ പിന്തുണയോടു കൂടി കോൺഗ്രസ്​ എങ്ങനെ രാജ്യം ഭരിച്ചുവെന്നത്​ നാം സൂക്ഷ്​മമായി ശ്രദ്ധിക്കണമെന്നും പസ്വാൻ പറഞ്ഞു. 

അഭിപ്രായങ്ങൾ പ്രകടിപ്പിക്കും മുമ്പ്​ സഖ്യകക്ഷികളുമായി ബി.ജെ.പി കൂടുതൽ ഗൗരവത്തോടെ ചർച്ചകൾ നടത്തണമെന്ന്​ കഴിഞ്ഞ ദിവസം പസ്വാ​​​െൻറ മകൻ ചിരാഗ്​ പസ്വാനും ബി.ജ.പിയെ ഉപദേശിച്ചിരുന്നു.