മൂന്നുദിവസത്തിനിടെ രണ്ട്​ ജാതിക്കൊലയടക്കം അഞ്ച്​ കൊലപാതകം; തിരുനൽവേലി പിരിമുറുക്കത്തിൽ, പൊലീസിനെ വ്യന്യസിച്ചു

ചെന്നൈ: മൂന്ന് ദിവസത്തിനുള്ളിൽ രണ്ട് ജാതിക്കൊല ഉൾപ്പെടെ അഞ്ച് കൊലപാതകങ്ങൾ റിപ്പോർട്ട് ചെയ്ത തിരുനൽവേലി ജില്ല കടുത്ത പിരിമുറക്കത്തിൽ. ജാതിക്കൊലപാതകങ്ങളുടെ പശ്ചാത്തലത്തിൽ ജില്ലയൊട്ടുക്കും സംഘർഷാവസ്​ഥ നിലനിൽക്കുന്നതായാണ്​ റിപ്പോർട്ട്​. തിങ്കളാഴ്ച മുതൽ ബുധനാഴ്ച രാത്രി വരെയുള്ള സമയത്തിനിടെയാണ്​ ഈ കൊലപാതകങ്ങൾ അരങ്ങേറിയത്​.

തിങ്കളാഴ്​​ച രാത്രി സവർണ സമുദായത്തിൽപ്പെട്ട മുന്നീർപള്ളത്തിനടുത്ത നൈനാർകുളം ശങ്കര സുബ്രമണ്യൻ (37)നെ ഒരുസംഘം കഴുത്തറുത്ത്​ കൊലപ്പെടുത്ത​ിയതാണ്​ തുടക്കം. 2013ൽ മന്തിരം എന്ന പട്ടികജാതിക്കാരനെ കൊലപ്പെടുത്തിയതിന്​ പ്രതികാരമായാണ്​ സംഭവമെന്ന്​ പൊലീസ്​ പറയുന്നു. മന്തിരത്തി​െൻറ മൃതദേഹം സംസ്കരിച്ച സ്​ഥലത്തോട് ചേർന്നാണ്​ ശങ്കര സുബ്രമണ്യന്‍റെ ​മൃതദേഹം കണ്ടെത്തിയത്​. ഇയാളുടെ തല അറുത്തെടുത്ത്​ ശവക്കുഴിക്ക്​ മുകളിൽ ഉപേക്ഷിച്ചു. സംഭവത്തിൽ മന്തിരത്തി​െൻറ മകൻ കോത്തൻകുളം സ്വദേശി മഹാരാജ (20) ഉൾപ്പെടെ ആറുപേരെ പിടികൂടി.

ഇതിന്​ പ്രതികാരമായി സവർണ സമുദായാംഗങ്ങൾ ബുധനാഴ്​ച പുലർ​​െച്ച അഞ്ചിന്​ ഗോപാലസമുദ്രം സ്വദേശി മാരിയപ്പ​​ൻ എന്നയാളെ കൊലപ്പെടുത്തി. ശങ്കര സുബ്രമണ്യ​െൻറ മൃതദേഹം കണ്ടെത്തിയ സ്​ഥലത്ത്​ മാരിയപ്പ​െൻറ അറുത്ത്​ മാറ്റിയ തല ഉപേക്ഷിച്ചാണ്​ പ്രതികൾ കടന്നുകളഞ്ഞത്​. 2014 ൽ നടന്ന മറ്റൊരു ജാതിക്കൊലയിലെ പ്രതികളിലൊരാളാണ് മാരിയപ്പൻ. ഇതോടെ മുന്നീർപള്ളം ഗ്രാമത്തിലും പരിസര പ്രദേശങ്ങളിലും സംഘർഷ സാധ്യത ഉടലെടുത്തു. കനത്ത പൊലീസ്​ സന്നാഹം മേഖലയിൽ നിലയുറപ്പിച്ചിട്ടുണ്ട്​.

ജില്ല പൊലീസ് സൂപ്രണ്ട് മണിവണ്ണൻ സ്​ഥലത്ത്​ എത്തി. പ്രതികളെ പിടികൂടാൻ ​െഡപ്യൂട്ടി പൊലീസ് സൂപ്രണ്ട് പാർഥിഭ​െൻറ നേതൃത്വത്തിൽ എട്ട് പ്രത്യേക സംഘങ്ങൾ രൂപീകരിച്ചിട്ടുണ്ട്​. മാരിയപ്പ​ൻ വധക്കേസിൽ മേളസേവലിലെ എസ്. ശിവ (23), എം. ശിവ (24) എന്നിവരടക്കം എട്ട് പേരെ പൊലീസ് അറസ്റ്റ് ചെയ്തു. അക്രമങ്ങൾ ആവർത്തിക്കാതിരിക്കാനും സാമുദായിക സൗഹാർദം നിലനിർത്താനും സർവകക്ഷി യോഗം വിളിച്ചുചേർക്കുമെന്ന്​ എസ്​.പി മണിവണ്ണൻ അറിയിച്ചു.

ജാതിക്കൊലപാതകങ്ങളുമായി ബന്ധപ്പെട്ട സംഘർഷാവസ്​ഥ നിലനിൽക്കവെയാണ്​ തിരുനൽവേലി സിറ്റി പൊലീസ്​ പരിധിയിൽ അബ്ദുൽഖാദർ എന്നയാൾ കുത്തേറ്റ്​ മരിച്ചത്​. സാത്താൻകുളം സ്വദേശിയായ പണമിടപാടുകാര​െൻറ കൊലപാതകത്തിന്​ പകപോക്കലായാണ്​ ഇതെന്ന്​ സൂചനയുണ്ട്​.

നെടുവിളൈയിലും അംബാസമുദ്രത്തിലുമാണ്​ മറ്റ്​ രണ്ടുകൊലപാതകങ്ങൾ അരങ്ങേറിയത്​. കളക്കാടിനടുത്ത നെടുവിളൈയിൽ കുടുംബ തർക്കത്തി​നിടെ കൃഷ്ണൻ (59) എന്നയാൾ ഭാര്യാപിതാവ് പൊന്നുദുരൈയെ വെട്ടിക്കൊല്ലുകയായിരുന്നു​. അംബാസമുദ്രത്തിൽ തങ്കപാണ്ടിയെന്ന 28കാരനെ അയൽവാസികൾ ചേർന്ന്​ വെട്ടിക്കൊലപ്പെടുത്തി. ഇൗ കേസിൽ രണ്ടു പേരെ അറസ്​റ്റ്​ ചെയ്​തിട്ടുണ്ട്​.

തമിഴ്​നാട്ടിൽ ജാതിവേർതിരിവുകളും ഇതി​െൻറ പേരിൽ അക്രമ സംഭവങ്ങളും ഏറ്റവും കൂടുതൽ നടക്കുന്ന ജില്ലകളിലൊന്നാണ്​ തിരുനൽവേലി.