കുംഭമേളക്കുശേഷം ഉത്തരാഖണ്ഡിൽ കുതിച്ചുയർന്ന്​ കോവിഡ്​; വർധന 1800 ശതമാനം

ഡെറാഡൂൺ: കുംഭമേളക്കുശേഷം ഉത്തരാഖണ്ഡിൽ കോവിഡ്​ കേസുകളിൽ വൻവർധന. ഒരുമാസം ​കൊണ്ട്​ 1.3 ലക്ഷം കേസുകൾ റിപ്പോർട്ട് ചെയ്തു. ഹരിദ്വാറിൽ മഹാകുംഭമേള നടന്ന മാർച്ച് 31 മുതൽ ഏപ്രിൽ 24വരെ കോവിഡ്​ കേസുകളിൽ 1800 ശതമാനമാണ്​ വർധന. കുഭമേള അതിതീവ്ര വ്യാപനത്തിന്​ കാരണമായെന്നാണ്​ വിലയിരുത്തൽ. ഏപ്രിൽ 12ന് 35 ലക്ഷത്തിലധികവും ഏപ്രിൽ 14ന് 13.51 ലക്ഷവും ആളുകൾ ഹരിദ്വാറിൽ തടിച്ചുകൂടിയിരുന്നു.

ഈ കാലയളവിൽ സംസ്ഥാനത്ത് 1713 കോവിഡ്​ മരണങ്ങളുണ്ടായി. ഇത്​ 2020ൽ മഹാമാരി ആരംഭിച്ചതുമുതലുള്ള സംസ്ഥാനത്തെ മൊത്തം കോവിഡ്​ മരണങ്ങളുടെ പകുതിയാണെന്നും റി​േപ്പാർട്ടുകളിൽ പറയുന്നു. നിലവിൽ 24 ശതമാനം പോസിറ്റിവിറ്റി നിരക്കുള്ള ഉത്തരാഖണ്ഡിൽ വ്യാഴാഴ്ച 151ഉം വെള്ളിയാഴ്ച 137ഉം മരണങ്ങളുണ്ടായി. കുംഭമേള ആരംഭിച്ച മാർച്ച് 31ന് സംസ്ഥാനത്തെ മൊത്തം ആക്​ടീവ്​ കേസുകളുടെ എണ്ണം 1863 ആയിരുന്നത്​ ഏപ്രിൽ 24 ഓടെ 33,330 ആയി ഉയർന്നു.

ജനങ്ങളുടെ ജീവൻ സർക്കാർ അപകടത്തിലാക്കി​യതായി കോൺഗ്രസ്​ വക്താവ് ഗരിമ ദസൗനി കുറ്റപ്പെടുത്തി. കേസുകളുടെയും മരണങ്ങളുടെയും വൻ വർധനക്ക്​​ കാരണം കുംഭമേളയും സർക്കാറി​​ലെ അനവസരത്തിലുള്ള അധികാര മാറ്റവുമാണെന്ന്​ അദ്ദേഹം പറഞ്ഞു. മുഖ്യമന്ത്രി ആരോഗ്യമന്ത്രി സ്ഥാനം കൈയാളിയ സമയത്ത്​ സംഭവിക്കാൻ പാടില്ലാത്തതാണ്​ സംഭവിച്ചത്​. പുതിയ മുഖ്യമന്ത്രി ഇതിന് മുമ്പ് ഒരു അഡ്മിനിസ്ട്രേറ്റിവ് തസ്തിക വഹിച്ചിട്ടില്ലെന്നും അദ്ദേഹം കുറ്റപ്പെടുത്തി